İbrahim Məmmədov 16 iyul 1964-cü ildə Zərdab rayonunda anadan olub. Bir müddət burada yaşadıqdan sonra ailəsi ilə birlikdə Göyçay rayonuna köçüb. Orta məktəbi Göyçayda bitirdikdən sonra N.Tusi adına Pedaqoji Universitetdə təhsil alıb. Tarix və hüquq fakültəsini fərqlənmə diplomu ilə bitirib. "Azərbaycana qarşı Sumqayıt təxribatı. Qriqoryanın işi" adlı elmi monoqrafiyanın, "Üç əsrin alqoritmləri və ya tarix necə təkrarlanır (1700-2019)" adlı kitabın və yüzlərələ məqalənin müəllifidir. "1988-ci il Sumqayıt hadisələri Ermənistanın Azərbaycana qarşı təcavüzünün tərkib hissəsidir" adlı elmi işi müdafiə edərək tarix üzrə fəlsəfə doktoru elmi dərəcəsi alıb. "Əməkdar jurnalist"dir. "Sovet imperiyasının gizlinləri. Qriqoryanın işi" adlı 3 hissəli sənədli filmin müəllifidir.

"Azadlıq" qəzetində, "Space" və ANS telekanallarında işləyib.

2005-2006-cı illərdə Azərbaycan Respublikası Prezidentinin Administrasiyasının ictimai-siyasi məsələlər şöbəsində baş məsləhətçi kimi çalışıb. 2006-cı ildən 2012-ci ilin fevralınadək Azərbaycan Televiziya və Radio Verilişləri Qapalı Səhmdar Cəmiyyətində İctimai-siyasi proqramlar baş redaksiyasının baş redaktoru olub. 2012-ci ilin fevralından 2015-ci ilin sentyabrınadək Azərbaycan Televiziya və Radio Verilişləri Qapalı Səhmdar Cəmiyyətində sədr müavini vəzifəsində çalışıb. Region TV-nin sədr müavinidir. Hazırda Azərbaycan Nazirlər Kabinetinin mətbuat xidmətinin rəhbəridir. Ailəlidir, 2 övladı var.

1. "Kənd saatı" — redaktor
2. "Mənə inanın!" (Prezident İlham Əliyevə həsr olunmuş 3 hissəli sənədli film) — müəllif
3. "Liderlik missiyası". Heydər Əliyevin fəaliyyətinə həsr olunmuş 3 hissəli sənədli film — müəllif
4. "Günün nəbzi"
5. "Həftə" (analitik-informasiya proqramı) — müəllif
6. Əsas məsələ
7. "Sovet imperiyasının gizlinləri. Qriqoryanın işi" (3 hissəli sənədli film, 2011) — müəllif
8. "Cənubi Qafqaz tarixi: miflər və reallıq" (sənədli film) — müəllif
9. "Çəkiclə zindan arasında" (sənədli film) — müəllif
10. "Yüksəlişə üçrəngli yol" (Azərbaycan bayraqlarının tarixinə həsr olunmuş sənədli film) — müəllif
11. "Günə baxış" (analitik-informasiya proqramı)
12. "Həftəyə baxış" (analitik-informasiya proqramı)

•  2008 — 4 noyabr 2008-ci ildə Azərbaycan Respublikasının Prezidenti tərəfindən Azərbaycan Respublikasının əməkdar jurnalisti adına layiq görülüb.

•  2024 — 16 iyul 2024-cü ildə Azərbaycan Respublikasında media sahəsində səmərəli fəaliyyətinə görə İbrahim Məmməd oğlu Məmmədov 3-cü dərəcəli “Əmək” ordeni ilə təltif edilib.