Ziya Salman oğlu Hacızadə (29 aprel 1934, Baş Göynük, Nuxa rayonu – 29 sentyabr 2004, Bakı) — Azərbaycan alimi, geologiya-mineralogiya elmləri namizədi.
| Ziya Hacızadə | |
|---|---|
| Ziya Salman oğlu Hacızadə | |
| Doğum tarixi | |
| Doğum yeri | |
| Vəfat tarixi | (70 yaşında) |
| Vəfat yeri | Bakı, Azərbaycan SSR, ZSFSR, SSRİ |
| Vətəndaşlığı |
 SSRİ→ Azərbaycan |
| İş yerləri | |
| Təhsili | |
Ziya Hacızadə 29 aprel 1934-cü ildə Şəki rayonunun Baş Göynük kəndində anadan olmuşdur. O, 1951-ci ildə Bakı şəhər 1 saylı orta məktəbi bitirmiş, ardınca isə Məşədi Əzizbəyov adına Azərbaycan Sənaye İnstitutunun (indiki ADNA) geoloji-kəşfiyyat fakültəsinə daxil olmuşdur. Hacızadə buradan 1956-cı ildə məzun olmuşdur. O, məzun olduqdan sonra Neft Daşlarına işə göndərilmiş, 1962-ci ilə qədər orada operator, mühəndis və böyük mühəndis vəzifələrində çalışmışdır. Hacızadə 1967-ci ildə Azərbaycan Neft və Kimya İnstitutunda "Neft və qaz yataqlarının geologiyası və kəşfiyyatı" kafedrasında əyani aspiranturanı bitirmiş və "Neftlilik-qazlılıqla əlaqədar olaraq Abşeron vilayəti qərb kənar zonasında qırməkanaltı lay dəstəsinin hidrogeoloji və hidrokimyəvi xüsusiyyətləri" mövzusunda namizədlik dissertasiyası müdafiə etmişdir.[1]
Ziya Hacızadə namizədlik dissertasiyasını müdafiə etdikdən sonra Azərbaycan Neft və Kimya İnstitutunun "Neft və qaz yataqlarının geologiyası və kəşfiyyatı" kafedrasında mühəndis, elmi işçi vəzifələrində çalışmışdır. O, 1968–1972-ci və 1980–1981-ci illərdə Əlcəzairdə, Əhməd Buqarə adına Bumerdes Universitetində fransız dilində geoloji fənlərdən dərs demişdir. Hacızadə 1972-ci ildən isə Azərbaycan Dövlət Neft Akademiyasının "Neft-qaz mədən geologiyası" kafedrasında dosent vəzifəsində çalışmışdır. O həmçinin, uzun müddət geoloji-kəşfıyyat fakültəsinin dekan müavini və dekanı olmuşdur.[1]
Ziya Hacızadə 29 sentyabr 2004-cü ildə Bakı şəhərində vəfat etmişdir.[1]
Ziya Hacızadə bir sıra dərslik, dərs vəsaiti və metodik göstərişlərin müəllifidir. 1981-ci ildə onun 27,8 ç.v. həcmində "Neft-qaz axtarışı və neft-mədən geologiyası" dərsliyi "Maarif" nəşriyyatında çap edilmişdir. 1966-cı ildə "Hidrogeologiya" (3,5 ç.v.), 1979-cu ildə "Neft-qaz yataqlarının hidrogeologiyasının əsas məsələlərinə dair" (5 ç.v.), "SSRİ-nin əsas neftli-qazlı artezian hövzələrinin hidrogeologiyası" (2,75 ç.v.) dərs vəsaitləri Az.NKİ-nin nəşriyyatında çap olunmuşdur. Bunlardan əlavə o, neft və qaz ehtiyatlarının hesablanması, struktur geologiya fənləri üzrə bir sıra metodik göstəriş və laboratoriya tapşırıqlarının müəllifidir.[1]
Bir sıra elmi konfranslarda hidrogeologiya üzrə məruzələr etmişdir. Onun 50-dən artıq elmi məqaləsi vardır ki, onlardan üçü Əlcəzairdə çap edilmişdir. Ziya Hacızadə 1991-ci ildə SSRİ Geologiya Nazirliyi tərəfindən "Yer dərinliklərinin kəşfı əlaçısı" nişanı ilə təltif edilmişdir.[1]
- ↑ 1 2 3 4 5 "Şəki. Alim və ziyalılar" (az.). Bakı: Bakı Universiteti Nəşriyyatı. 2002. səh. 209. 2021-09-01 tarixində arxivləşdirilib (#archive_missing_url).
- Mirzəyev, Məmməd. Qara qızıl ağ səadət rəngində (az.). Azərbaycan nəşriyyatı. 2001. səh. 153.