Ziya Babaşov

Ziya Babaşov 6 yanvar 2002-ci ildə Cəlilabad rayonunda anadan olub. 2013-cü ildən güləşlə məşğul olmağa başlayıb. Cavid Qurbanovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Ziya Babaşov beynəlxalq səviyyədə birinci uğuruna 2019-cu ilin iyulunda Bolqarıstanın Sofiya şəhərində baş tutan yeniyetmələr arasında Dünya Çempionatının final görüşündə məğlub olaraq gümüş medala sahib olmaqla imza atdı. O, həm də 2019 və 2021-ci illərdə ardıcıl olaraq 2 dəfə Azərbaycan Çempionatlarını bürünc medallarla başa vurdu.

Daha sonra Babaşov 2022-ci ildə Plovdiv şəhərində (Bolqarıstan) 23 yaşlılar arasında Avropa Çempionatını gümüş medalla başa vurdu. Bundan sonra Babaşovun nəticələri bir qədər zəiflədi. 2022-ci il ərzində U20 Avropa Çempionatını 11-ci, U20 Dünya Çempionatını 8-ci, U23 Dünya Çempionatını 5-ci pillələrdə, həmçinin 2023-cü il ərzində U23 Avropa Çempionatını 8-ci və U23 Dünya Çempionatını 10-cu pillələ başa vuran Ziya Babaşov uğursuz seriyaya 2024-cü ildə son qoydu.

2024-cü ilin martında Ziya Babaşov Antalya şəhərində Vəhbi Əmrənin xatirəsinə həsr olunmuş beynəlxalq turniri gümüş medalla başa vurdu. Mayda isə Azərbaycanın ev sahibliyində baş tutan U23 Avropa Çempionatında bütün rəqibləri üzərində qələbə qazanaraq turnirin qalibi oldu. Bununla belə Babaşov həmin il Albaniyada baş tutan U23 Dünya Çempionatında uğursuz çıxış etdi və turniri 17-ci pillədə başa vurdu.

Ziya Babaşov 2022, 2023 və 2024-cü illərdə ardıcıl olaraq üç dəfə Azərbaycan Çempionatlarının qalibi oldu.

2025-ci ildə yunan-roma güləşi üzrə Azərbaycan yığmasının əsas heyətinə cəlb olundu və həmin ilin fevralında Xorvatiyada Zagreb Open beynəlxalq turnirini beşinci pillədə başa vurdu. Martda isə o, Tirana şəhərində baş tutan 23 yaşlılar arasında Avropa Çempionatının final görüşündə məğlub olaraq turniri gümüş medalla başa vurdu.