Zirəddin Bayramov

Zirəddin Bayramov 7 may 2002-ci ildə Şəmkir şəhərində anadan olub. 2009-cu ildə güləşlə məşğul olmağa başlayıb. Elçin Həsənovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Zirəddin Bayramovun beynəlxalq səviyyədə debütü 2019-cu ilin mayında İtaliyada baş tutan yeniyetmələr arasında Avropa Çempionatı oldu. Həmin turnirdə o, bürünc medalın sahibi oldu. İyulda isə Bayramov Bolqarıstanda yeniyetmələr arasında Dünya Çempionatını 8-ci pillədə başa vurdu.

2021-ci il Bayramov üçün ən uğurlu mövsümlərdən biri oldu. Əvvəlcə o, mayda KYRM-da 23 yaşlılar arasında Avropa Çempionatında bürünc medalın sahibi oldu, ardınca isə Rusiyada gənclər arasında Dünya Çempionatının final görüşündə məğlub olaraq turniri gümüş medalla başa vurdu. Noyabrda isə o, Serbiyada U23 Dünya Çempionatının bürünc medalla tamamladı. Həmin il Bayramov həm də Azərbaycan Çempionatında bütün rəqibləri üzərində qələbə qazanaraq turnirin qalibi oldu.

Zirəddin Bayramov 2022-ci ilin martında Bolqarıstanın Plovdiv şəhərində baş tutan 23 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Həmin ay o, həm də Macarıstanda Avropa Çempionatında debüt etdi və medalın bir addımlığında məğlub olmaqla turniri beşinci pillədə tamamladı. Avqustda Bayramov Bolqarıstanda 20 yaşlılar arasında Dünya Çempionatının final görüşündə məğlub olaraq turniri gümüş medalla başa vurdu.

2023-cü ildən Zirəddin Bayramov tədricən sərbəst güləş üzrə Azərbaycan yığmasının əsas heyətinə cəlb edildi. İyunda o, İstanbul şəhərində Yaşar Doğunun xatirəsinə həsr olunmuş beynəlxalq turniri bürünc medalla başa vurdu. Noyabrda isə Tirana şəhərində 23 yaşlılar arasında Dünya Çempionatında final görüşündə məğlub olaraq turniri gümüş medalla tamamladı. Həmin il Bayramov Azərbaycan Çempionatının final görüşündə Əli Rəhimzadəyə məğlub olaraq turniri gümüş medalla tamamladı.

2024-cü il Zirəddin Bayramov üçün uğursuz alındı. Yanvarda Xorvatiyada Zagreb Open beynəlxalq turnirini 12-ci pillədə başa vuran Bayramov martda İstanbul şəhərində Yaşar Doğunun xatirəsinə həsr olunmuş beynəlxalq turnirdə də uğursuz çıxış etdi (8-ci pillə). Bununla da o, mövsüm ərzində nüfuzlu beynəlxalq turnirlərdə heç bir uğura imza ata bilmədi. Həmin il Bayramov Azərbaycan Çempionatının final görüşündə Kənan Heybətova məğlub olaraq turniri gümüş medalla tamamladı.