Bu məqalədəki məlumatların yoxlanıla bilməsi üçün əlavə mənbələrə ehtiyac var. |
Yusifov Ramiz Yusif oğlu (15 may 1936, Ağdam – 9 fevral 2022, Bakı) — Azərbaycan geoloq alimi, geologiya elmləri namizədi (1965), professor, təcrübi-metodiki geofiziki ekspedisiyanın baş geoloqu (1980–1997), Boks üzrə SSRİ mükafatçısı, 5 dəfə Azərbaycan çempionu, SSRİ idman ustası (1958), boks üzrə Beynəlxalq dərəcəli hakim (1996). Azərbaycan Boks Federasiyasının vitse-prezidenti (1995–2009), həmin federasiyanın icraçı komitəsinin üzvü, Milli Olimpiya Komitəsinin üzvü, Veteranlar Şurasının sədri və Prezident təqaüdçüsüdür (2012).[1]
| Ramiz Yusifov | |
|---|---|
| Doğum tarixi | 15 may 1936 |
| Doğum yeri | |
| Vəfat tarixi | 9 fevral 2022 (85 yaşında) |
| Vəfat yeri | |
| Atası | Yusif Yusifov |
| Elm sahəsi | geologiya |
| İş yerləri | |
| Təhsili | |
| Mükafatları |
 |
Yusif Yusifovun oğludur.
Yusifov Ramiz Yusif oğlu 15 may 1936-cı ildə Ağdam rayonunda anadan olub. O, ilk ibtiadi təhsilini Ağdam rayonunda 1 saylı məktəbdə sonra, Naxçıvan şəhər 1 saylı orta məktəbin 7-ci sinfini, 1954-cü ildə isə Bakı şəhər 199 saylı orta məktəbini bitirib.
1954-cü ildə BDU-nun Geoloji-Coğrafiya fakültəsinə qəbul olunub. 1959-cu ildə BD -nun Geoloji-Coğrafiya fakültəsinin neft-qaz axtarış şöbəsini bitirib. Onun elmi fəaliyyəti neft və qaz yataqlarının geologiyası-geofizikası, seysmologiyası ilə bağlıdır. O, 1959-ci ildə BDU-da müvafiq kafedrada fəaliyyətə başlamış və “Azneftkəşfiyyat” trestində elmi təcrübədə olub. 1965-ci ildə elmlər namizədi elmi dərəcəsi adını alıb. Ramiz Yusifov 1966-cı ildə AMEA-nın Geologiya İnstitutunda əvvəlcə kiçik elmi işçi, sonra isə böyük elmi işçisi, 1980–1997-ci illərdə isə təcrübi-metodiki geofiziki ekspedisiyanın baş geoloqu vəzifələrində işləyib. O, ixtisası üzrə bir çox xarici ölkələrdə olub. Belə ki, R. Yusifov 1984-cü ildə Özbəkistanda Qazlı, 1985-ci ildə Səmərqənd-Buxarada, 1989-cu ildə İranın Rüdbar və 1997-ci ildə İranın Ərdəbil zəlzələlərinin nəticələrinin aradan qaldırılması işlərində iştirak edib.
Ramiz Yusifov 90-dan çox elmi məqalənin müəllifidir.
Ömrünün 50 ilini boksa həsr edib və 1952-ci ildən boksla məşğul olub. 1954–1957-ci illərdə Ümumittifaq Spartak Cəmiyyətinin yarışlarının gümüş və bürünc medallarını qazanıb. O, 1954-cü ildə Tbilisidə 2-ci yeri, 1955-ci ildə Riqada 2-ci yeri, 1956 -cı ildə Vilnüsdə keçirilən 6-cı Spartakiadada 3-cü yeri tutub. R.Yusifov 5 dəfə Azərbaycan çempionu olub. O, 1958-ci ildən SSRİ idman ustasıdır.
O, 1996-cı ildən bu günə kimi boks üzrə Beynəlxalq dərəcəli hakimdir. Dəfələrlə Avropa və Dünya çempionatlarında müvəffəqiyyətlə iştirak edib. Bu ərəfədə boksçularımızın Avropa və Dünya çempionatlarında 1 qızıl, 2 gümüş və 2 bürünc, Olimpiya oyununda isə 3 bürünc medal qazanmasında onun müstəsna əməyi olub. Onun rəhbərliyi altında boksçularımız dünyanın 5 qitəsində Azərbaycan bayrağını dalğalandırıblar.
R.Yusifov 1995-ci ildən 2009-cu ilin yanvarınadək Azərbaycan Respublikası Boks Federasiyasının vitse-prezidenti olub. Hazırda o, həmin federasiyanın icraçı komitəsinin üzvü, Milli Olimpiya Komitəsinin üzvü, Veteranlar Şurasının sədri və Prezident təqaüdçüsüdür. "Azpetrol LTD"nin birinci müavini və təhlükəsizlik xidmətinin rəisi olmuş, hazırda isə ictimaiyyətlə əlaqə departamentinin müdiridir.
- ↑ "Ramiz Yusif oğlu Yusifov". AR Gənclər və İdman Nazirliyi. 2022-02-09. 2025-01-13 tarixində arxivləşdirilib. İstifadə tarixi: 2025-01-13.