Yoşi

Mario seriyasının yaradıcısı olan video oyun dizayneri Şiqeru Miyamoto Super Mario Bros.-un ilk buraxılışından bəri Marionundinozavr yoldaşı olmasını istəyirdi, lakin Nintendo mühəndisləri oyunun o vaxtki videooyun konsulunun texniki məhdudiyyətləri səbəbi ilə oyuna belə bir obraz əlavə edə bilməmişdilər.^[1][2][3] Yoşi üçün ilham 1984-cü ildə yayımlanmış Devil World video oyunundakı yaşıl əjdaha Tamaqona qədər gedib çıxır. Tamaqon obrazı da Yoşi obrazı kimi Miyamoto tərəfindən yaradılmışdı. Həmçinin hər iki obraz yumurtadan çıxan və böyük ağızları ilə düşmənləri yeyə bilən yaşıl kərtənkələdir və hər ikisi yumurtadan çıxanda eyni səsi çıxarırlar.^[4][5] Super Mario Bros. 3 yaradılarkən Miyamotonun masasının ətrafında bir sıra eskizlər, o cümlədən Marionun at sürdüyü təsvir var idi.^[6][7] Mario seriyasının tərtibatçısı olan Takaşi Tezuka Miyamotonun at sürməyə, eləcə də vestern konseptinə olan sevgisinin Yoşi obrazının yaradılmasına təsir etdiyini söyləmişdir.^[8][9]

Daha güclü bir videooyun konsulunun buraxılmasından sonra nəhayət Miyamotonun istəyi reallaşdı və o, Yoşini Super Mario World video oyununa daxil etdi.^[10] Super Mario World oyunu inkişaf etdirilərkən komanda oyunu "dinozavrlar ölkəsində" qurmağı seçdi və buna görə Tezuka dizayner Şiqefumi Hinodan Miyamotonun eskizləri əsasında sürünənə bənzər bir məxluq çəkməyi xahiş etdi. ^[11] Tezuka, Hinonun çəkdiyi ilk eskizi Mario dünyasına uyğun hesab etmədi və buna görə də dizayneri "daha sevimli" bir xarakter yaratmağa təşviq etdi.^[11] Fərdi Yoşi obrazı ilə yanaşı oyunda eyni adı daşıyan və rəng müxtəlifliyi ilə xarakterizə olunan növün digər üzvləri də təqdim edilmişdi.^[12]