Yetkinliyə çatma

Yetkinliyə çatma və ya Yetkinlik yaşına çatmaq — gənc bir fərdin uşaqlıqdan yetkinlik dövrünə keçidini ifadə edir. Bu keçidin baş verdiyi yaş və forma cəmiyyətdən cəmiyyətə görə dəyişir. O, sadə bir hüquqi tənzimləmə də ola bilər, yaxud bir çox icmada müşahidə olunduğu kimi, dini və ya mənəvi ayinin tərkib hissəsi də ola bilər. Tarixdə və müasir dövrdə bəzi icmalarda bu keçid cinsi yetkinlik yaşı ilə, xüsusilə də qızlarda ilk aybaşının görünməsi və oğlanlarda ilk spermanın xaric olması ilə əlaqələndirilir.^[1] Digər icmalarda isə dini məsuliyyət yaşı ilə əlaqələndirilir.

Müasir hüquqi tənzimləmələr yeniyetməlik dövrünün sonu ilə yetkinlik dövrünün əvvəllərində müəyyən edilmiş bir nöqtəni keçid kimi qəbul edir və adətən 17 ilə 21 yaş arasındakı yeniyetmələr artıq yetkin hesab olunaraq qanun qarşısında yetkinlərlə eyni hüquq və məsuliyyətlərə malik olurlar. Hər halda, bəzi mədəniyyətlər yetkinliyi təsdiqləmək üçün keçid mərasimləri icra etməyə davam edirlər. yetkinliyə çatma hekayələri ədəbiyyatda, film sənayesində və hətta komikslərdə yer alan bir alt-janrdır.