Xuraman Canıbəyova

1957-ci il 26 avqust – Hacıqabul (keçmiş Qazıməmməd) şəhərində anadan olmuşdur. 1973-cü il – şəhər 6 (indiki 3) saylı səkkizillik məktəbdə natamam orta təhsil almışdır. 1975-cü il – şəhər 5 (indiki 1) saylı orta ümumtəhsil məktəbi bitirmişdir. 1980 – Dövlət Pedaqoji İnstitutun kimya fakultəsində ali təhsil alaraq, kimya müəllimi ixtisası əldə etmişdir. 1980-1982-ci illər – orta məktəbdə kimya müəllimi vəzifəsində işləmişdir. 1982-1985-ci illər – Elmlər Akademiyasının Qeyri – Üzvi və Fiziki Kimya Elmi – Tədqiqat İnstitutunun aspiranturasında əyani təhsil almışdır. İnstitutun "Səth hadisələri və səthi-aktiv maddələr" laboratoriyasında "Səthi-aktiv maddələrin metal və lay süxurları səthində adsorbsiyanın tədqiqi"nə dair elmi-tədqiqat işləri aparmağa başlamış, aldığı tədqiqat nəticələri ilə respublika, ümumittifaq və beynəlxalq konfranslarda dəfələrlə çıxış etmiş, məqalələri dövri ədəbiyyatda – "Azərbaycan Neft Təsərrüfatı" jurnalında və elmi-tədqiqat toplularında dərc olunmuşdur. 1985-1995-ci illər - Elmlər Akademiyasının Qeyri – Üzvi və Fiziki Kimya Elmi – Tədqiqat İnstitutunda mühəndis, Kimya Texnologiyasının Nəzəri Problemləri Elmi – Tədqiqat İnstitutunda kiçik elmi işçi vəzifələrində işləmişdir. 1995-ci ildən – Neft hasilatının artırılması istiqamətində apardığı elmi tədqiqatlarını Neft-Qaz Sənayesi Elmi-Tədqiqat Layihə İnstitutunda davam etdirmişdir. 2001-ci il – "Lay süxurlarının və yeraltı avadanlıqların səthində səthi – aktiv maddələrin adsorbsiyasının tədqiqi yolu ilə neftçıxarma göstəricilərinin artırılması" mövzusunda dissertasiya işini müdafiə edərək, "Neft və qaz yataqlarının işlənməsi və istismarı" ixtisası üzrə texnika elmləri namizədi alimlik dərəcəsi almışdır. 2003-cü ildən - Neft-Qaz Sənayesi Elmi-Tədqiqat Layihə İnstitutunda böyük elmi işçi vəzifəsində işləmişdir. 1 ixtiranın, 16 elmi məqalənin müəllifidir. Elmi işləri səthi aktiv maddələrin tətbiqi ilə neft hasilatının artırılması və neft – mədən avadanlıqlarının korroziyadan mühafizəsi istiqamətindədir. Hazırda neft-qaz quyularının qazılmasında istifadə olunan, çoxfunksiyalı qazma məhlullarının daha bir funksiyasını – korroziya aktivliyini tədqiq edir.