Xornu nekropolu I — Culfa rayonunun Göynük kəndindən ş.-də, Xornu çayının vadisində arxeoloji abidə.

Nekropol yaşayış yerinin yuxarısında hündür təpənin yamacındadır. Nekropoldakı qəbirlərin yerüstü əlamətləri itmişdir. Qəbirlərin ikisi kiçik həcmli kurqan tipində olduğundan diqqəti cəlb etmiş və dağıdılmışdır. Dağıdılmış qəbir abidələrinin tədqiqi onların kromlexlə əhatə edildiyini göstərir. Kromlexlərin mərkəzi hissəsində daş qutu tipli qəbirlər olmuşdur. Dəfndən sonra qəbirlərin üzərində torpaq kurqan düzəldilmişdir. Ətrafa səpələnmiş insan skeletinin qalıqları qəbirlərdə inqumasiya üsulu ilə dəfn aparıldığını təsdiq edir. Nekropol V. B. Baxşəliyev tərəfindən qeydə alınmışdır. Dağıdılmış qəbirlərin biri 2006 ildə V. B. Baxşəliyev və S. H. Aşurov tərəfindən araşdırılmışdır. Tədqiqat zamanı qərb-şərq istiqamətində yönəlmiş skelet qalıqları və daş qutu qəbirin bir qismi aşkar olunmuşdur. Aşkar olunan materiallara əsasən nekropolu e.ə. IV–III minilliklərə aid etmək olar.

Culfa rayonunun Göynük kəndindən ş.-də, Xornu çayının sol sahilində, çaya doğru uzanan təpənin yamacında arxeoloji abidə. Nekropol V. B. Baxşəliyev tərəfindən qeydə alınmışdır. Qəbirlər daş qutu tiplidir. Onlar yanlarda iri, yastı sal daşlarla qurulmuş, eyni tipli daşlarla qapadılmışdır. Qəbirlər yamacda yerləşdiyindən aşınma nəticəsində üzə çıxmış və qarət edilmişdir. Qəbirlərdən aşkar olunan çəhrayı və boz rəngli keramika parçaları ətrafa səpələnmişdir. 2003 ildə Nekropoldakı dağıdılmış qəbirlərin bəzisi V. B. Baxşəliyev və A. Q. Seyidov tərəfindən tədqiq edilmişdir. Tədqiqat zamanı dəmirdən hazırlanmış ox ucluqları və keramika parçaları aşkar edilmişdir. Aşkar edilmiş arxeoloji materiallara əsasən II Xornu nekropolunu I–II əsrlərə aid etmək olar.

Culfa rayonunun Göynük kəndindən ş.-də, ikinci nekropoldan bir qədər yuxarıda, Xornu çayının sol sahilində, çaya doğru uzanan təpənin yamacında arxeoloji abidə.

Nekropol V. B. Baxşəliyev tərəfindən qeydə alınmışdır. Qəbirlər daş qutu tiplidir. Onlar yanlarda iri, yastı sal daşlarla qurulmuş, eyni tipli daşlarla qapadılmışdır. Qəbirlər yamacda yerləşdiyindən aşınma nəticəsində üzə çıxmış və qarət edilmişdir. Qəbirlərdən aşkar olunan çəhrayı və boz rəngli keramika parçaları ətrafa səpələnmişdir. 2003 ildə nekropoldakı dağıdılmış qəbirlərin bəzisi V. B. Baxşəliyev və A. Q. Seyidov tərəfindən tədqiq edilmişdir. Tədqiqat zamanı çəhrayı və boz rəngli keramika parçaları aşkar edilmişdir. Aşkar edilmiş arxeoloji materiallara əsasən III Xornu nekropolunu I–II əsrlərə aid etmək olar