Xasay Həsənli

Xasay Həsənli 12 yanvar 2002-ci ildə Lənkəran şəhərində anadan olub. 2012-ci ildə güləşlə məşğul olmağa başlayıb. İntiqam Alıyevin rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasıda təhsil alıb.

Xasay Həsənlinin beynəlxalq turnirində debütü 2019-cu ilə təsadüf edib. Həmin ilin iyununda o, İtaliyada baş tutan yeniyetmələr arasında Avropa Çempionatında bürünc medalın sahibi oldu. Həmin ilin iyulunda Həsənli Azərbaycanda baş tutan Avropa Gənclər Yay Olimpiya Festivalında da bütün rəqibləri üzərində qələbə qazanaraq turnirin qızıl medalına sahib oldu. Bir həftə sonra isə o, Sofiya şəhərində (Bolqarıstan) baş tutan yeniyetmələr arasında Dünya Çempionatını yeddinci pillədə başa vurdu.

2021-ci ilin aprelində Xasay Həsənli Avropa Çempionatında debüt etdi. Polşanın Varşava şəhərində baş tutan turnir onun üçün uğursuzluqla nəticələndi (8-ci pillə). Mayda KYRM-da baş tutan 23 yaşlılar arasında Avropa Çempionatında doqquzuncu pillədə qərarlaşan Həsənli iyulda Almaniyada gənclər arasında Avropa Çempionatının bürünc medalına sahib oldu. Avqustda isə o, Rusiyada gənclər arasında Dünya Çempionatını beşinci pillədə tamamladı. Həmin il Xasay Həsənli Azərbaycan Çempionatının gümüş medalına da sahib oldu.

Xasay Həsənli 2022-ci ilin martında Bolqarıstanın Plovdiv şəhərində baş tutan 23 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Daha sonra o, iyunda Roma şəhərində, avqustda isə Sofiya şəhərində baş tutan gənclər arasında Avropa və Dünya Çempionatlarıda çıxış etsə də, ciddi nəticələrə imza ata bilmədi. O, həmin il yalnızca Azərbaycan Çempionatını bürünc medalla başa vurdu.

2023-cü ildə Xasay Həsənli əvvəlcə martda Rumıniyanın Buxarest şəhərində baş tutan 23 yaşlılar arasında Avropa Çempionatında, ardınca isə noyabrda Albaniyanın Tirana şəhərində baş tutan 23 yaşlılar arasında Dünya Çempionatında final görüşlərində məğlub olaraq gümüş medalların sahibi oldu. Həmin il Həsənli həm də Azərbaycan Çempionatında bütün rəqibləri üzərində qələbə qazanaraq birinci dəfə turnirin qalibi oldu.

2024-cü il də Xasay Həsənli üçün məhsuldar alındı. Həsənli mayda Azərbaycanın ev sahibliyində baş tutan 23 yaşlılar arasında Avropa Çempionatında bütün rəqibləri üzərində qələbə qazanaraq turnirin qalibi oldu. Noyabrda isə o, Tirana şəhərində U23 Dünya Çempionatını bürünc medalla tamamladı.

2025-ci ildə Həsənlinin birinci turniri fevralda baş tutan Zagreb Open beynəlxalq turniri oldu və o, həmin yarışı doqquzuncu pillədə başa vurdu. Martda isə Həsənli Tirana şəhərində baş tutan 23 yaşlılar arasında Avropa Çempionatında bürünc medalın sahibi oldu.