Xanlar Kazım oğlu Qurbanov (20 yanvar 1950, Bakı – 8 avqust 2020, Bakı) — SSRİ idman ustası, beynəlxalq dərəcəli güləş hakimi, alim, pedaqoq, pedaqoji elmlər üzrə fəlsəfə doktoru, professor. Azərbaycan Milli İdman Növləri Assosiasiyasının təsisçisi və prezidenti, Azərbaycan Olimpiya Akademiyasının vitse-prezidenti, Avropa Beynəlxalq Zorxana Konfederasiyasının vitse-prezidenti olmuşdur.
| Xanlar Qurbanov | |
|---|---|
| Xanlar Kazım oğlu Qurbanov | |
 Professor Xanlar Qurbanov (1950–2020) | |
| Şəxsi məlumatlar | |
| Doğum tarixi | |
| Doğum yeri |
Bakı,  SSRİ |
| Vəfat tarixi | |
| Vəfat yeri |
Bakı,  Azərbaycan |
| Vətəndaşlığı |
Azərbaycan |
| Təhsili | Azərbaycan Dövlət Bədən Tərbiyəsi və İdman İnstitutu |
| İxtisası | Bədən tərbiyəsi və idman |
| Fəaliyyəti | Güləşçi, məşqçi, alim, idman təşkilatçısı |
| Ailəsi | Oğlu – Kazım Qurbanov |
|
|
|
| Təltifləri |
    |
Xanlar Qurbanov 20 yanvar 1950-ci ildə Bakı şəhərinin Dağlı məhəlləsində anadan olmuşdur. O, Xızı-Bərmək mahalının qədim Xələnc kəndinin pəhləvan nəslindən gəlir.
1968-ci ildə Azərbaycan Dövlət Bədən Tərbiyəsi və İdman İnstitutuna daxil olmuş, 1972-ci ildə oranı uğurla bitirmişdir.
Tələbəlik illərində sərbəst güləş üzrə respublika və beynəlxalq yarışlarda iştirak etmiş, mükafatlar qazanmışdır. 1970-ci ildə sərbəst güləş üzrə SSRİ idman ustası adına layiq görülmüşdür.[1]
1972-ci ildən Azərbaycan Dövlət Bədən Tərbiyəsi və İdman İnstitutunun güləş kafedrasında müəllim kimi fəaliyyətə başlamışdır.
1977-ci ildə “Güləşmə və onun metodikası” kafedrasının baş müəllimi olmuşdur. 1982-ci ildə Ümumittifaq dərəcəli hakim adına layiq görülmüşdür.
1986-cı ildə Moskva şəhərində Ümumittifaq Bədən Tərbiyəsi Elmi-Tədqiqat İnstitutunda dissertasiya müdafiə edərək pedaqoji elmlər namizədi (pedaqoji elmlər üzrə fəlsəfə doktoru) elmi dərəcəsini almışdır.[2]
1988-ci ildə Məşqçilik fakültəsinin dekan müavini, elə həmin ildə dosent vəzifəsinə təyin edilmişdir.
1989–2020-ci illərdə “Güləşmə və onun metodikası” (sonradan “İdmanın təkmübarizlik növləri”) kafedrasının müdiri olmuşdur.
200-dən artıq elmi məqalənin, dərsliklərin, dərs vəsaitlərinin və metodiki vəsaitlərin müəllifidir.
1990–1995-ci illərdə Bakı Şəhər Sovetinin deputatı olmuş, ictimai-siyasi həyatda fəal iştirak etmişdir.
1990-cı ildən Azərbaycan Milli İdman Növləri Assosiasiyasının prezidenti kimi fəaliyyət göstərmişdir.
Azərbaycan Güləş Federasiyasının Sərbəst və Yunan-Roma güləşi üzrə İcra Komitəsinin üzvü olmuşdur.
1991-ci ildə Azərbaycan Respublikasının Əməkdar məşqçisi fəxri adına layiq görülmüşdür.
1995–2003-cü illərdə Azərbaycan qadın güləşi yığma komandasının baş məşqçisi vəzifəsində çalışmışdır.
1996-cı ildə Azərbaycan Olimpiya Akademiyasının vitse-prezidenti seçilmişdir.
Xanlar Qurbanov beynəlxalq idman ictimaiyyətində tanınmış mütəxəssis olmuşdur.
1995-ci ildə Türkiyənin İstanbul Tibb-Spor Universiteti tərəfindən “professor” fəxri adına layiq görülmüşdür.
1993-cü ildə Beynəlxalq Güləş Federasiyasının (FİLA) Elmi Komissiyasının üzvü olmuşdur.
2006-cı ildə FİLA-nın beynəlxalq dərəcəli hakimi, 2007-ci ildə isə Beynəlxalq Zorxana İdman Federasiyasının (BZİF) beynəlxalq dərəcəli hakimi olmuşdur.
2008-ci ildə BZİF-in Texniki Komissiyasının üzvü, elə həmin ildə Avropa Zorxana İman Federasiyasının (EZİF) vitse-prezidenti və texniki komissiyasının sədri seçilmişdir.[3]
- 1970 — SSRİ idman ustası
- 1982 — Ümumittifaq dərəcəli hakim
- 1991 — Azərbaycan Respublikasının Əməkdar məşqçisi
- 2001 — “Tərəqqi” medalı
- 2006 — Azərbaycan Respublikasının Əməkdar bədən tərbiyəsi və idman xadimi
- 2006 — FİLA-nın beynəlxalq dərəcəli hakimi
- 2007 — Beynəlxalq Zorxana İman Federasiyasının beynəlxalq dərəcəli hakimi
- “Azərbaycanın tanınmış alimləri”
- “XXI əsr Azərbaycan ziyalıları” diplomları
(Vektor Beynəlxalq Elmi Mərkəzi tərəfindən)
Xanlar Qurbanov 8 avqust 2020-ci ildə Bakı şəhərində vəfat etmişdir.[4] [5] [6]
Oğlu Kazım Qurbanov — idman sahəsində fəaliyyət göstərən mütəxəssisdir.
- ↑ "Azərbaycan Respublikasının Gənclər və İdman Nazirliyi — Xanlar Kazım oğlu Qurbanov". mys.gov.az (az.). İstifadə tarixi: 4 dekabr 2025.
- ↑ "Azərbaycan İdman Jurnalistləri Assosiasiyası — Xanlar Qurbanov". aija.az (az.). İstifadə tarixi: 4 dekabr 2025.
- ↑ "Konkret.az — Xanlar Qurbanov haqqında". Konkret.az (az.). İstifadə tarixi: 4 dekabr 2025.
- ↑ "Sonxeber.az — Xanlar Qurbanov vəfat etdi". Sonxeber.az (az.). İstifadə tarixi: 4 dekabr 2025.
- ↑ "Qaynarinfo.az — Xanlar Qurbanov dünyasını dəyişdi". qaynarinfo.az (az.). İstifadə tarixi: 4 dekabr 2025.
- ↑ "Publika.az — Xanlar Qurbanov vəfat etdi". Publika.az (az.). İstifadə tarixi: 4 dekabr 2025.