Müzakirə:Vətən Müharibəsi Qəhrəmanı
| Bu, Vətən Müharibəsi Qəhrəmanı məqaləsinin müzakirə səhifəsidir. |
Məqalə prinsipləri
|
Bir sıra yerlərdə "Vətən Müharibəsi Qəhrəmanı" adının "Azərbaycanın Milli Qəhrəmanı" adından üstün olduğu qeyd edilir. Amma qanunvericilikdə bu öz əksini tapmayıb.
"Vətən Müharibəsi Qəhrəmanı" adının təsis edilməsi haqqında qanunda qeyd edilir:
- "Vətən Müharibəsi Qəhrəmanı" adı Azərbaycan Respublikasının ən ali fərqlənmə dərəcəsidir.
- "Vətən Müharibəsi Qəhrəmanı" Azərbaycan Respublikasının medalı döşün sol tərəfinə, digər orden və medallardan yuxarıda "Qızıl Ulduz" medalından əvvəl taxılır.
Təbii ki, burada biz bu adı avtomatik olaraq ölkənin ən üstün fərqlənmə dərəcəsi olaraq qəbul edə bilərik. Buna baxmayaraq, sözügedən ad təsis edilərkən "Azərbaycanın Milli Qəhrəmanı" adı haqqında əsasnamə heç bir düzəliş edilməyib. Sözügedən qanunda qeyd edilir:
- "Azərbaycanın Milli Qəhrəmanı" adı respublikanın ən yüksək fərqlənmə dərəcəsidir, Azərbaycan Respublikasının müstəqilliyi və tərəqqisi naminə xalq qarşısında müstəsna xidmətlərə və rəşadətə görə verilir.
- "Qızıl Ulduz" medalı döşün sol tərəfinə, digər orden və medallardan yuxarıda taxılır.
Bu qanunda yalnız bir dəfə – 1998-ci ildə dəyişiklik edilib. O da ada görə verilən "Ay-ulduz" medalının "Qızıl ulduz" medalı ilə əvəz edilməsi ilə bağlı olub.
Digər nüans isə təqaüdlərlə bağlıdır. "Vətən Müharibəsi Qəhrəmanı" adına görə 2200, "Azərbaycanın Milli Qəhrəmanı" adına görə isə 2000 manat aylıq təqaüd nəzərdə tutulub.
Bu adlar arasında əsas fərq onların təyinatıdır. "Azərbaycanın Milli Qəhrəmanı" adı, əsasnamədə də qeyd edildiyi kimi, Azərbaycan Respublikasının müstəqilliyi və tərəqqisi naminə xalq qarşısında müstəsna xidmətlərə və rəşadətə görə verilir. Bu adın verilməsi hələ də davam etdirilir və hər hansısa fəaliyyət sahəsi ilə limitlənməyib. Əsasən, müharibə şəraitində göstərilən qəhrəmanlığa görə verilsə də, metro faciəsi, təyyarə qəzası kimi hallarda da bu ada layiq görülənlər olub. "Vətən Müharibəsi Qəhrəmanı" adı isə, digər tərəfdən, yalnız işğal olunmuş ərazilərinin azad olunmasına görə verilib.
"Vətən Müharibəsi Qəhrəmanı" medalının "Qızıl ulduz" medalından əvvəl taxılmasına, adlara görə aylıq təqaüddəki fərqlərə baxmayaraq, qanunvericilikdə hər ikisi də ən ali (ən yüksək) fərqlənmə dərəcəsidir. Buna görə də məqalənin girişində, həmçinin şablondakı müvafiq parametrdə bununla bağlı qeyd yerləşdirirəm. – Toghrul R (m) 10:11, 29 dekabr 2025 (UTC)