1996-cı ildə İqtisadiyyat və İnformatika Ali Məktəbi adı ilə fəaliyyətə başlayan bu təhsil müəssisəsi Polşanın ilk özəl ali məktəblərindən biridir. Bu ali təhsil ocağı 2011-ci ilin 11 fevral tarixindən etibarən universitet statusu əldə edərək Vistula Universiteti adlandırılıb.

Universitet 25 000 m² sahəni əhatə edən əraziyə malikdir. Burada seminar məşğələləri üçün 2200 yerlik 7 auditoriya və 46 mühazirə zalı inşa edilib. Ali təhsil ocağında 10 kompüter zalı fəaliyyət göstərir. Eyni zamanda, ali məktəbin dəhlizlərində internetə çıxışla təmin olunmuş kompüterlər qoyulub. Bütün auditoriyalar müasir multimedia vasitələri və qurğularla təchiz edilib, seminar zallarında müasir audiovizual avadanlıqlar qurulub.

Universitet şəhərciyində idman zalı, tennis kortu və trenajor zalları inşa olunub. Bütün tələbələrə pulsuz olaraq tibbi xidmətlər göstərilir.

Universitetin elmi kitabxanası tələbələrin rahatlığı baxımından yüksək səviyyədə layihələndirilib, müasir kompüterlərlə və qiraət zalı ilə təchiz edilib. Burada nəşriyyatların və Milli kitabxana bazalarına giriş mövcuddur. Kitabxana pulsuz simsiz internetlə təmin edilib.

Vistula Universitetində 8 fakültə fəaliyyət göstərir.

• İqtisadiyyat,
• İnformatika
• Beynəlxalq münasibətlər,
• Turizm və istirahət,
• Maliyyə və mühasibat uçotu,
• İdarəetmə,
• Sosiologiya,
• İngilis filologiyası.

Ali məktəbdə təlim polyak və ingilis dillərində həyata keçirilir.

Vistula Universitetində illik təhsil haqqı təqribən 2500-3000 avro təşkil edir.

Universitetin bakalavriatura proqramı qeyd edilən fakültələrdə yaradılan 45 ixtisas üzrə təhsil verir. Təhsil müddəti altı semestr təşkil edir və bakalavr dərəcəsinin alınması ilə bitir. Yalnız informatika fakültəsində tələbələr nəticədə mühəndis dərəcəsini almaqla 7 semestr təlim keçirlər.

Universitetin magistr proqramı iqtisadiyyat sahəsində biliklərə əsaslanır. Təhsil müddəti dörd semestr təşkil edir və magistr dərəcəsinin alınması ilə bitir.

Bu proqram üzrə təhsil artıq ilk ali təhsil pilləsini bitirən, mikro və makro səviyyədə iqtisadiyyatın əsasları ilə tanış olan, iqtisadi hadisələrin tədqiqatının analitik metodları sahəsində daha geniş biliklər əldə etməyə maraq göstərən tələbələr üçün nəzərdə tutulub.

İqtisadiyyat sahəsində magistr proqramı COOP-EDUCATION proqramı çərçivəsində biznes dünyasının nümayəndələri ilə sıx əməkdaşlıq əsasında həyata keçirilir. Ümumi biliklərə əlavə olaraq, bu proqram tələbələrə iş tapmaq üçün praktik bacarıqları təkmilləşdirməyə imkan verir. Akademik tədris proqramı müəllimlərin biznes-təcrübələrinə əsaslanır və böyük müəssisələrdə təcrübə keçmə imkanı təmin edir.

Maarifləndirici proqramlardan əlavə universitet tələbələrə təqaüd proqramı, peşəkar təcrübə və Erasmus, AIESEC kimi beynəlxalq proqramlarda iştirak etmək imkanını təqdim edir. Bundan əlavə, SOOR-EDUCATION elit proqramı üzrə fəaliyyət göstərən ali məktəb IBM, Microsoft, Aster, Oracle və digər nüfuzlu şirkətlərlə əməkdaşlıq edir.

İnformasiya texnologiyalarının istismarı sahəsində ixtisaslaşdırılmış mütəxəssislərin çatışmazlığı ölkənin bütün müəssisələrinin əhəmiyyətli hissəsini təşkil edən kiçik və orta müəssisələr halında xüsusilə gözə çarpır. Bu şirkətlərdə əksər hallarda məlumat bazalarının inzibatçılığı və İT-sistemlərin analizi sahəsində mütəxəssis çatışmır. Bunu nəzərə alaraq Vistula Universiteti sözügedən sahə, xüsusilə biznesdə İT-nin tətbiqi üzrə peşəkar kadrların yetişdirilməsinə xüsusi diqqət ayırır.

Tədris proqramı müəllimlərin akademik və peşəkar nailiyyətlərinə əsaslanır. Bunun sayəsində, tələbələr yalnız fundamental nəzəri bilikləri deyil, həm də praktik hazırlığı mənimsəyirlər, çünki tələbə təcrübələri maarifləndirici prosesin məcburi hissəsidir. Universitet Polşa və xarici firmalarla əməkdaşlıq edir, tələbələr öz ilk peşəkar təcrübəsini bu müəssisələrdə ala bilərlər. Universitetdə 210-dan çox əməkdaş, həmçinin 50 professor və elmlər doktoru çalışır. Ali məktəb həmçinin bütün dünyada akademik mərkəzlərin görkəmli elmi işçiləri əməkdaşlıq edir.

İqtisadiyyat, kompüter texnologiyaları və ingilis dili sahəsində mütəxəssislərin təhsili Vistula Universitetin əsas missiyasıdır. Universitetin maarifləndirici profili müasir əmək bazarının tələblərinə cavab verir.

Hazırda ali məktəbdə dünyanın 30-dan artıq ölkəsindən tələbələr təhsil alır. Universitetdə tələbə özünüidarəetməsi fəaliyyət göstərir. Nümayəndələri həmçinin universitetlərarası təşkilatların üzvüdür. Onlar ali məktəbin inkişaf strategiyasının yaradılmasında iştirak edirlər.

Tələbə həyatının əhəmiyyətli elementini beynəlxalq əməkdaşlıq təşkil edir. Başqa ali məktəblərlə universitetin əlaqələri nəticəsində bütün dünyada, tələbələr maraqlı beynəlxalq proqramlarda iştirak edə, həmçinin xarici mütəxəssislərin məruzələrini dinləyə bilərlər.

Avropanın ən maraqlı və ən sürətlə inkişaf edən paytaxt şəhərlərindən birində yerləşən və Avropanın 27 üzv ölkəsində akkreditə olunmuş Vistula Universitetində müasir texnologiyalar əsasında həyata keçirilən təhsil proqramları ilə unikal beynəlxalq atmosfer yaradılıb.

Vistula Universiteti eyni zamanda beynəlxalq səviyyədə elmi dairələrdə təmsil olunan təşkilatların akkreditasiyasına malikdir. Onlar ali məktəbdə reallaşan bütün maarifləndirici proqramların keyfiyyət zəmanətidir. Universitet International Association of Universitier (IAU) - ali təhsil müəssisələrinin beynəlxalq assosiasiyasının üzvüdür. Bu qurum dünyanın təxminən 120 ölkəsindən müəssisələri və təşkilatları birləşdirir, ali təhsil sahəsində müxtəlif beynəlxalq, regional və milli təşkilatlarla əməkdaşlıq edir. Vistula Universiteti eyni zamanda 2010-cu ildən WACE-in (Advancing Cooperative & Work-Integrated Education) üzvüdür. Bu təşkilat təhsillə iş təcrübəsini müvəffəqiyyətlə uyğunlaşdıran proqramları dəstəkləyir.

Hazırda Vistula Universiteti Polşa unversitetləri sırasında ilk onluqda yer alır. Son üç il ərzində universitet iki dəfə Business Centre Club Avropa medalı, 2011-ci ildə Liderlər Universiteti sertifikatı, həmçinin Polşa Elminin Səfiri fəxri titulu ilə təltif edilib.

• Cahangir Atakişiyev. .  (az.)