Atəm Vaqif oğlu Əliyev (16 dekabr 1982, Abad, Ağdaş rayonu – 2 oktyabr 2020, Murovdağ döyüşüləri) — Azərbaycan Silahlı Qüvvələrinin polkovnik–leytenantı, USTA dərəcəli hərbi qulluqçu, Murovdağ döyüşlərinin iştirakçısı, İkinci Qarabağ müharibəsi şəhidi.[1]
Atəm Əliyev 1982-ci il dekabrın 16-da Ağdaş rayonunun Abad kəndində anadan olub. 1989-1996-cı illərdə Abad kənd tam orta məktəbində, 1996-2000-ci illərdə isə Cəmşid Naxçıvanski adına Hərbi Liseydə təhsil alıb. 2000-2004-cü illərdə Heydər Əliyev adına Azərbaycan Ali Hərbi Məktəbində ali hərbi təhsil alıb.[2]
Ailəli idi. Bir oğlu və bir qızı var.
Azərbaycan Ordusunun polkovnik-leytenantı olan Atəm Əliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb. Atəm Əliyev oktyabrın 2-də Murovdağ döyüşləri zamanı şəhid olub. Uzun müddət axtarışların nəticəsində nəşi tapılmışdır. 2021-ci il yanvarın 24-də anadan olduğu kənddə, Ağdaş rayonunun Abad kəndində dəfn olunub.[3]
Azərbaycan Respublikasının Prezidenti İlham Əliyevin 24.06.2021-ci il tarixli sərəncamına əsasən şəhid polkovnik-leytenant Atəm Vaqif oğlu Əliyev ölümündən sonra “Azərbaycan Bayrağı” ordeni, “Vətən uğrunda” və “Kəlbəcərin azad olunmasına görə” medalları ilə təltif olunub.[4][1]