Vakae adası və ya Vakaecima (和賀江島?) – Yaponiyanın Kamakura şəhərində yerləşən süni ada. Yaponiyada ən qədim süni adadır. Hazırda sadəcə qalıqları qalıb.
Kamakura şoqunluğunun dövründə Saqami körfəzi ticarət gəmilərinin tez-tez keçdiyi yerlərdən biri olmuşdur. Lakin körfəz dayaz olduğu burada gəmi qəzaları baş verirdi. 1232-ci ildə Oamidabutsu adlı yerli buddist rahibi körfəzin vəziyyəti haqqında şikayət etmiş və gəmilərin təhlükəsiz şəkildə yanaşması üçün süni adasının salınması üçün şoqunluqdan rəsmi icazə almışdır. Hoco Yasutokinin dəstəyi ilə salınan adanın tikintisində İzu daşları və digər materiallar istifadə olunmuşdur.[1] Ada Zaymokuza çimərliyinin qayalıqlarında inşa olunmuş və Vakae adası kimi tanınmışdır. Ada Yaponiyada ən qədim süni ada hesab olunur.[2]
Vakae adası Edo dövrününün sonuna qədər – XIX əsrə qədər istifadə olunmuşdur. Daha sonra tərk edilmiş və dəniz dalğalarının erozisiyasına məruz qalmışdır. Hazırda adanın sadəcə qalıqları qalsa da, bəzən qayıqlar adaya yanaşmağa davam edirlər. Körfəzdə çəkilmə baş verdikdə adaya ayaqla çatmaq mümkündür.[2]
1924-cü ildə Kamakura Gənclik Klubu adasının xatirəsini əks etdirən daş stela ucaltmışdır. Ada 1968-ci ildə Yaponiya hökuməti tərəfindən Milli Tarixi Yer elan olunmuşdur.[2]
- ↑ "Wakae Island". Visit Kamakura (ingiliscə). 16 iyun 2025 tarixində arxivləşdirilib. İstifadə tarixi: 16 iyun 2025.
- ↑ 1 2 3 "Wakae Island Ruins". Atlas Obscura (ingiliscə). 13 iyun 2025. İstifadə tarixi: 16 iyun 2025.