Uketsu (雨穴?, hərf. Yağış dəliyi[a]) – Yaponiya YouTuberi, qorxu və cinayət romançısı. 2020-ci illərdə Yaponiyanın ən çox satan cinayət romançılarından biri hesab olunur. İlk romanı "Qəribə evlər" bestseller olmuşdur. O, çıxışlarında maskadan istifadə edir. Uketsunun əsl kimliyi, görünüşü və səsi naməlumdur. O, "Yaponiyanın Riçard Ozmanı" adlandırılmışdır.[2]
| Uketsu | |
|---|---|
| yap. 雨穴 | |
| Fəaliyyəti | YouTuber, yazıçı |
| Fəaliyyət illəri | 2018 – hazırda |
| Əsərlərinin dili | yaponca |
| Janrlar | qorxu, cinayət, müəmma |
| İlk əsəri | "Qəribə evlər" (2021) |
| uketsu.jp | |
 Vikianbarda əlaqəli mediafayllar | |
Uketsu 2 yaşından 6 yaşına kimi İngiltərədə yaşamışdır.[2] Valideynləri o, gənc ikən boşanmışdır.[3] Kollecdə iqtisadiyyat üzrə təhsil almışdır.[1] Məzun olduqdan sonra manqa və musiqi ilə məşğul olmaq istəsə də, uğur qazanmamışdır. 2018-ci ildə "Omokoro" zarafat saytı üçün məqalələr yazmışdır.[1] Uketsu ilk növbədə "YouTube"da paylaşdığı sürreal videolarla məşhur olmuşdur: doğrandıqda barmaqlara çevrilən qulançar, paltar kimi "qurumağa" asılmış ət parçaları, təkərdə fırlanan 8 qulaq videolarını öz kanalına yükləmişdir.[3] O, "YouTube" karyerasına 2018-ci ildə – supermarketdə işləyərkən başlamışdır. Müştərilərin və iş yoldaşlarının onun qorxulu videolar çəkdiyini bilməməsi üçün anonim olmağa qərar vermişdir.[2] Uketsunun kanalında 1,73 milyon abunəçi var.[1]
Uketsu 2020-ci ilin oktyabrında yazdığı 21 dəqiqəlik müəmma hekayəsinin videosunu yayımlamışdır. "Asukashinsha" nəşriyyatı əsəri 2021-ci ilin iyulunda "Qəribə evlər" adlı roman kimi nəşr etdirmişdir.[1] Bundan sonra Uketsu romanlar yazmağa davam etmiş, yazdığı romanların çoxu bestsellerə çevrilmişdir. Onun üç romanı 2024-cü ildə Yaponiyada ən çox satılan 10 qeyri-bədii kitab siyahısına daxil olmuşdur. Onun "Qəribə şəkillər" adlı bestseller romanı 2025-ci ildə ingilis dilinə tərcümə olunmuşdur.[3] "Qəribə evlər 2" adlı davam romanı 2024-cü ildə Yaponiyada ən çox satılan əsər olmuşdur.[1]
Uketsu romanlarında ağır diaqramlardan istifadə edir.[1] Onun əsərlərində qadınlar antaqonist mövqedə çıxış edirlər. Belə ki, valideynləri boşandıqdan sonra anasının ailəsi ilə yaşamağa başlamış, məktəbdə oxuyanda üzv olduğu klublarda bir çox qadınla qarşılaşmışdır.[3] Əsərlərində istifadə qorxu üslubunda İngiltərə illərinin böyük təsirinin olduğunu bildirmiş, Britaniyanın kabuslu evlərindən ilhamlanmışdır.[2]
Uketsunun kimliyi və görünüşü naməlumdur. Uketsu bir müsahibəsində təxminən 30 nəfərin əsl kimliyini bildiyini qeyd etmişdir: ailə üzvləri, əsərlərinin naşirləri və layihəyə başlayarkən birlikdə işlədiyi şəxslər. Cinsini bildirən əvəzlikdən istifadə etməsə də, kişi olduğu məlumdur, verdiyi məlumatlara görə Kanaqava prefekturasında yaşayır.[3] O, anonimliyini brendinin bir hissəsi hesab etdiyi üçün kimliyi barədə verilən suallara cavab verməkdən qaçınır. O, bir müsahibəsində evində dovşanlar saxladığını, "Pink Floyd" qrupuna qulaq asdığını, gitara və piano çaldığını bildirmişdir. "Bir ananın nöktürnü" adlı videosu üçün öz bəstələdiyi musiqidən istifadə etmişdir.[2]
Uketsu videolarında kartondan hazırlanmış ağ maska və qara paltarla çıxış edir,[3] səsini qalınlaşdırmaq üçün cihazdan istifadə edir.[1] Onun görünüşü "Ruhlarla sovrulanlar" anime filmindəki Üzsüz personajına bənzədilmişdir. Lakin o bir müsahibəsində bu oxşarlığın sadəcə təsadüf olduğunu, kostyumu üçün yapon teatrında tamamilə qara rəngli paltar geyinən kurokolardan ilhamlandığını qeyd etmişdir. Ənənəvi baş geyimini hazırlamaq çətin olduğu üçün karton maskadan istifadə etməyə qərar vermişdir.[3]
- ↑ 1 2 3 4 5 6 7 8 "'Uketsu': The internet phantom haunting Japan's bestseller lists". The Japan Times (ingiliscə). 7 fevral 2025. İstifadə tarixi: 7 fevral 2025.
- ↑ 1 2 3 4 5 Kerridge, Jake. "Is the man behind this terrifying mask Japan's answer to Richard Osman?". Telegraph (ingiliscə). 14 yanvar 2025. İstifadə tarixi: 7 fevral 2025.
- ↑ 1 2 3 4 5 6 7 Creamer, Ella. "'Am I a Cyclopian monster?' How masked writer Uketsu went from asparagus videos to literary sensation". The Guardian (ingiliscə). 27 yanvar 2025. 29 yanvar 2025 tarixində arxivləşdirilib. İstifadə tarixi: 7 fevral 2025.
- uketsu.jp — rəsmi saytı