Uşak Universiteti Türkiyənin Uşak vilayətində yerləşən ali təhsil müəssisəsidir.
Universitetin yaradılmasına dair qərar 1 mart 2006-cı il tarixli və 5467 saylı Rəsmi Qəzetdə dərc olunmuşdur. 2006-cı ildə 4 fakültə və 5 peşə məktəbi ilə Afyon Kocatepe Universitetindən ayrılaraq Uşak Universiteti adı altında fəaliyyətə başlamışdır.
Universitetin qurucu rektoru Prezident Əhməd Necdət Sezər tərəfindən təyin olunan Adnan Şişman olmuşdur. 2011-ci ildə keçirilən rektor seçkilərini qazanan Sait Çəlik, Prezident Abdullah Gül tərəfindən ikinci rektor olaraq təyin edilmişdir. 2015-ci ildə isə Prezident Tayyib Ərdoğan tərəfindən Türkiyə Respublikası Konstitusiyasının 130-cu maddəsi və 2547 saylı Ali Təhsil Qanununun 13-cü maddəsinə əsasən, Ali Təhsil Şurasının təklif etdiyi namizədlər arasından Prof. Dr. Sait Çəlik ikinci dəfə Uşak Universitetinin rektoru təyin edilmişdir. Rektor Çəlik daha 4 il müddətinə vəzifəsini davam etdirəcəkdir. Sait Çəlik Uşak Universitetində keçirilən namizəd seçkilərində 267 müəllim üzvündən ümumilikdə 171 səs qazanmışdır.