Tlauelpuçi — Meksikanın Tlaskala ştatına aid xalq inanclarında yer alan vampir xüsusiyyətli cadugərdir. Bu əfsanə Nahua mədəniyyətinə əsaslanır.
Tlauelpuçi sözü Nahuatl dilindəki tlāhuihpoçtli (çoxluq forması: tlātlāhuihpoçtin) ifadəsindən yaranıb. Bu söz tlāhuia ("işıqlandırmaq") və pōçtli ("duman", "cənub", "gənc" və ya "qalan" mənalarını verə bilər) sözlərinin birləşməsindən ibarətdir. Buna görə Tlauelpuçi ifadəsi "işıq saçan duman" və ya "parlaq gənc" kimi yozula bilər.[1]
Tlauelpuçi vampir və cadugər xüsusiyyətlərinə malik varlıqdır. O, adi insanlar kimi ailəsi ilə yaşayır, lakin gecələr körpələrin qanını içmək üçün fərqli formaya düşə bilir. Şəkil dəyişdirdikdə ətrafında parlaq bir aura əmələ gəlir. Tlauelpuçi bu lənətlə doğulur və ondan qurtula bilmir. Öz kimliyini yeniyetməlik dövründə dərk edir. Əksər hallarda qadın olurlar və qadın Tlauelpuçilər kişilərdən daha güclüdür.
Tlauelpuçilər müəyyən bir cəmiyyət yaradır və hər biri öz ərazisinə sahib olur. Onlar şamanlar və digər fövqəltəbii varlıqlarla razılığa gəlirlər, belə ki, bir şaman heç vaxt Tlauelpuçini ifşa etmir. Tlauelpuçinin öldürdüyü qurbanlarda əsasən bədənin yuxarı hissəsində göyərmələr olur. Onlar əsasən uşaqları hədəf alsalar da, bəzən böyükləri də öldürə bilərlər.
Tlauelpuçi bədənini ayaqlarından ayıraraq formadan formaya keçə bilir. Ayaqları evdə qalır, özü isə ov axtarışına çıxır. Adətən hind toyuğu və ya leş yeyən quş formasına düşür. Qurbanının evinə daxil olmaq üçün xüsusi ritual icra etməlidir: evin üzərində şimaldan cənuba, şərqdən qərbə xaçvari hərəkət etməlidir.[2]
Tlauelpuçi ən azı ayda bir dəfə qan içməlidir, əks halda ölür. Ən çox körpə qanına üstünlük verir. Onu yalnız hərəkət edərkən yaxalamaq mümkündür, çünki ailəsi onu qoruyur. Bir ailə üzvü Tlauelpuçini öldürərsə, lənət ona keçir. Lənəti aradan qaldırmaq mümkün deyil və əgər kimsə Tlauelpuçinin kim olduğunu bilsə, onu dərhal öldürməlidir. Tlauelpuçini qovmaq üçün sarımsaq, soğan və metal istifadə olunur.
- Bowles, David (2012). Mexican Bestiary. Donna, TX: VAO Publishing
- Fragoso, Temoltzin Bárbara (2007)- "¡Se lo chupó la bruja! Luminiscencias nocturnas en fuga de las arcaicas resonancias conceptuales; una aproximación simbólica a la Tlahuelpuchi y su vínculo con la figura del vampiro" Escuela Nacional de Antropología e Historia, México, D.F.
- Martínez González, Roberto (2006)- "Le nahualli-tlahuipuchtli dans le monde nahuatl." Journal de la société des américanistes [On line], 92-1 et 2 | 2006, uploaded January 2012. http://jsa.revues.org/3127
- Nutini, Hugo G., and John M. Roberts (1993) - Bloodsucking Witchcraft: An Epistemological Study of Anthropomorphic Supernaturalism in Rural Tlaxcala. The University of Arizona Press, Tucson.
- ↑ Martínez González, Roberto (2006)- "Le nahualli-tlahuipuchtli dans le monde nahuatl." Journal de la société des américanistes [On line], 92-1 et 2 | 2006, uploaded January 2012. http://jsa.revues.org/3127
- ↑ Bowles, David (2012). Mexican Bestiary. Donna, TX: VAO Publishing