Taryer Bəşirov

Taryer Bəşirov 20 Aprel 1959-cu ildə tarixində Ağsu rayonunda anadan olmuşdur. Xalça rəssamı kimi peşə təhsilini 1983-1988-ci illərdə Azərbaycan Dövlət İncəsənət İnstitutunda (indiki Azərbaycan Dövlət Mədəniyyət və İncəsənət Universiteti) oxuyarkən almışdır.

T. Bəşirovun yaradıcılığı xalça əsərlərində mövzuların açılmasına müxtəlif yanaşmaları ilə seçilir. Rəssamın kompozisiyalı xalça əsərləri mürəkkəb quruluşları ilə fərqlənir. T. Bəşirov tematik ideyanın həlli və həyata keçirilməsi üçün xalçanın bütün bədii imkanlarından istifadə etməyə çalışmışdır. Bunun üçün ənənəyə üz tutaraq, yenilik yaradan rəssam xalça estetikasına dair öz şəxsi bədii baxışını yaratmışdır. Rəssamın yaradıcılığının ana xəttini xalqının tarixi ilə bağlı dərin maraqlı mövzuların, onun mənəvi tərkib hissəsinin mürəkkəb kompozisiyalarda incə dekorativ həllərlə əks etdirilməsi təşkil etmişdir. T. Bəşirovun fəaliyyətinin digər qolu unudulmuş və itirilmiş toxuculuq texnologiyaların bərpası, bu texnologiyalardan istifadə etməklə yeni əsərlər yaratmaqdan ibarətdir. T. Bəşirov xalçadan əlavə, həm də Azərbaycan xalqının qədim sənət növlərindən olan çətən sənətində də uğurlar əldə etmişdir. Sənətkar bir çox ornamental və süjetli çətənlərin müəllifi olmuşdur.^[1] Rəssam bütün yaradıcılıq boyunca çoxlu sayda rəngarəng xalça kompozisiyaları yaratmışdır. Azərbaycan xalqının ümummilli lideri Heydər Əliyevin 100 illik yubileyinə həsr olunmuş “Tarixin salnaməsi” adlanan xalça Azərbaycan Prezidentinin sərəncamı ilə 2023-cü ilin “Heydər Əliyev ili” elan edilməsi şərəfinə toxunmuşdur.^[2] Həmçinin T. Bəşirov xalq rəssamı Tahir Salahovun bir neçə tablosunu da xalça səthinə köçürmüşdür. Rəssamın bilavasitə müəllimi Lətif Kərimova həsr etdiyi “Zirvələrin nəğməsi” (2006), “Leyli və Məcnun” (2019), “Bəhram Gur və Dürsəti” (2020), “Qələbə” (2021) və bir çox digər xalça əsərlərinin dekorativ həllində peşəkar rəssam yanaşması hiss olunur. “Mstislav Rostropoviç” portret xalçası (2003), “Əfşan” (2024), “Beşiyim əbədiyyətim” ( 2024), “Tarixin salnaməsi” (2023), “Göllü” (1985), “Ləçək-turunc” (2022), “Zəfər” (2021), “Müqəddəs üçlük” (2017), “Türkün inancı, tarixin qazancı” (2016) əsərləri də bu sıraya aiddir.

• Azərbaycan Respublikasının əməkdar rəssamı (2017)^[3]

• Azərbaycan rəssamlarının siyahısı