Takopi's Original Sin,[a] Yaponiyada tanınan adı ilə Takopi no Genzai[b] – Tayzan 5 tərəfindən yazılmış və illüstrasiya olunmuş veb-manqa seriyası. 2021-ci ilin dekabrından 2022-ci ilin martına qədər "Shueisha" nəşriyyatının "Shōnen Jump+" platformasında serializasiya olunmuşdur. Manqa seriyasının 2 tankobon cildi buraxılmışdır. Manqa seriyası Xoşbəxtlik planetindən Yerə səyahət edən Takopi adlı yadplanetlinin Şizuka Kuze adlı 9 yaşlı qızla tanış olmasından bəhs edir. Takopi ailəsi tərəfindən sayılmayan, məktəbdə zorakılığa məruz qalan, çətin həyat keçirən Şizukanı xoşbəxt etməyə çalışır, lakin insanların hislərini yaxşı başa düşmədiyi üçün işlər qarışır.
| Takopi's Original Sin | |
 Birinci tankobon cildinin üzlüyü. Personaj: Şizuka Kuze. | |
| タコピーの原罪 (Takopi no Qenzay) | |
|---|---|
| Janr | antiutopiya, qorxu, elmi fantastika |
| Manqa | |
| Manqaka | Tayzan 5 |
| Nəşriyyat | Shueisha |
| İmprint | Jump Comics+ |
| Jurnal | Shōnen Jump+ |
| Nəşr tarixi | 10 dekabr 2021 – 25 mart 2022 |
| Cildlər | 2 (cild siyahısı) |
| Fəsil sayı | 16 |
| ONA | |
| Rejissor | Şinya İino |
| Prodüsser |
|
| Ssenarist | Şinya İino |
| Bəstəkar | Yoşiaki Fucisava |
| Studiya | Enishiya |
| Lisenziya | Crunchyroll |
| Buraxılış tarixi | 28 iyun 2025 – 2 avqust 2025 |
| Seriyalar | 6 (seriya siyahısı) |
"Enishiya" studiyası tərəfindən istehsal olunmuş və 6 seriyadan ibarət olan ONA adaptasiyası 2025-ci ilin iyunundan avqustuna qədər yayımlanmışdır. Manqa seriyası 2022-ci ildə Yaponiya Karikaturaçılar Assosiasiyasının Mükəmməllik Mükafatının qalibi olmuşdur.
2016-ci ildə Xoşbəxtlik planetindən olan Nueinukf adlı yadplanetli Yerə enərək xoşbəxtliyi digərlərinə də yaymağa qərar verir. Yaxalanmadan son anda qurtulan o, məktəbdə bullinqə məruz qalan və Çappi adlı itindən başqa heç bir dostu olmayan Şizuka Kuze adlı 9 yaşlı qızla qarşılaşır. Şizuka onu səkkizayaqlıya oxşatdığı üçün ona Takopi adını verir. Takopi planetinin Xoşbəxt alətlərindən istifadə edərək Şizukaya kömək etməyə qərar verir, lakin tezliklə Şizukanı döyülmüş vəziyyətdə və Çappi olmadan tapır. Şizuka onun Xoşbəxt alətlərindən birindən istifadə edərək intihar edir. Vəziyyətin səbəbkarlarından biri olduğunu başa düşən Takopi başqa bir alətdən istifadə edərək zamanda geriyə gedir və Şizukanın həyatını düzəldəcəyinə ümid edir.
Bu zaman döngülərinin birində Şizuka və onu bullinq edən Marina Kirarazaka arasında münaqişə yaşanır. Belə ki, Şizukanın anası Marinanın atası ilə görüşdüyü üçün Marinanın ailəsi çətin günlər yaşayır. Takopi Şizukanı xilas etmək üçün Xoşbəxt kamera ilə Marinanı öldürür. Alət sınır və nəticədə, Takopi vəziyyəti düzəltmək üçün zamanda geriyə gedə bilmir. Şizukanın sinif yoldaşlarından biri olan Naoki Azumanın köməyi ilə cəsədi basdırırlar və cinayəti ört-basdır etməyə çalışırlar. Takopi cinayətə gizlətmək üçün Marinanın cildinə girsə də, tezliklə işçilər cəsədi tapırlar. Şizuka atasının yanına gedib Çappini xilas etmək üçün Naokidən cinayət məsuliyyətini öz üzərinə götürməsini istəyir. Şizuka Tokioya gedəndə atasının yeni ailəsi ilə qarşılaşır və Çappini tapa bilmir. Bu, onu daha çox ümidsizliyə sürükləyir. Bu zaman Takopi hər şeyi xatırlamağa başlayır: o, ilk olaraq Yerə 2016-cı ildə yox, 2022-ci ildə gəlibmiş və Marina ilə qarşılaşıbmış. Takopi Marinanı xoşbəxt etmək üçün Şizukanı öldürməyə qərar veribmiş və planetindəki Böyük Xoşbəxt Saat ilə 2016-ci ilə səyahət edibmiş, lakin bu zaman planetin matriaxı onun yaddaşını silibmiş.
Takopi Şizukanın acısını başa düşmədiyi ondan üzr istəyir və onunla son dəfə vaxt keçirir. O, həyat enerjisindən istifadə edərək son dəfə Xoşbəxt kameradan istifadə edir və zamanı Şizukanın onunla tanış olduğu vaxta qaytarır. Lakin bu dəfə Takopi fiziki olaraq mövcud olmur. Marina və Şizuka artıq onu xatırlamasalar da, Takopinin eskizini görüb duyğulanırlar. 6 il sonra – 2022-ci ildə Şizuka və Marina çətin uşaqlıq keçirən, amma xoşbəxt böyüyən yaxın dostlara çevrilirlər.
- Takopi (タコピー, Takopi?) / Nueinukf (んうえいぬkf?)
- Səsləndirən: Kurumi Mamiya
- Xoşbəxtlik planetindən olan yadplanetli. Səkkizayaqlıya oxşayır. Onun əsas məqsədi Xoşbəxt alətlərindən istifadə edərək xoşbəxtliyi bütün insanlara yaymaqdır. Lakin insanların hislərini başa düşməkdə çətinlik çəkir.
- Şizuka Kuze (久世 しずか, Kuze Şizuka?)
- Səsləndirən: Reyna Ueda
- Takopinin Yerə gəldikdən sonra dostlaşdığı qız. Anası ekskort kimi işlədiyi üçün məktəbdə bullinqə məruz qalır və heç bir dostu yoxdur. Təkcə iti Çappi ilə vaxt keçirməkdən zövq ala bilir.
- Marina Kirarazaka (雲母坂 まりな, Kirarazaka Marina?)
- Səsləndirən: Honoka Kuroki (səsli komiks),[1] Konomi Kohara (anime)
- Şizukanın sinif yoldaşı. Şizukaya bullinq etməyi sevir. Əslində bunun səbəbi Şizukanın anasının onun atası ilə görüşməsidir. Bu səbəbdən Marinanın anası da ona bullinq edir.
- Naoki Azuma (東 直樹, Azuma Naoki?)
- Səsləndirən: Anna Naqase
- Şizukanı dəstəkləməyə çalışan sinif yoldaşı. Lakin Şizuka hər dəfə onun köməyini geri çevirir. Qardaşı Cunya ondan daha bacarıqlı olduğu üçün anasının təzyiqlərinə məruz qalır.
Tayzan 5 bir müsahibəsində bildirmişdi ki, bir gün redaktoru ondan istədiyi hər hansı bir mövzuda bir iş hazırlamasını istəmişdir. O, bundan sonra "Doraemonun qaranlıq versiyasını" hazırlamaq qərarına gəlmiş və zaman döngüsündən bəhs edən bir iş hazırlayarsa, serializasiya olunacağını düşünmüşdür. Tayzan 5 "Re:Zero" seriyasının fanatı olduğunu bildirmişdir. Manqanın serializasiyası barəsində keçirilən iclasdan sonra redaktor departamenti hekayənin 2 cilddən sonra yekunlaşdırılmasını tövsiyə etmişdir. Tayzan 5 artıq hekayəni işləmiş, serializasiya zamanı sadəcə sonluqla bağlı dəyişikliklər aparmışdır. O, hər fəsili çəkmək üçün adətən 5 gün, bəzən isə 7 gün vaxt sərf etmişdir.[2]
Tayzan 5 daha əvvəl hazırladığı van-şot manqalarında əsasən deformasiyaya uğramış personaj təsvirlərindən istifadə etsə də, "Takopi's Original Sin" üzərisində işləyərkən personajların üz ifadələrini daha detallı işləmiş və daha çox xətt əlavə etmişdir. O, fəsillərdə açılış və sonluğun oxucunun üzərisində güclü təsir buraxmasına əhəmiyyət verdiyini qeyd etmiş, həmin səhnələrdə personajların yaxın üz təsvirlərindən istifadə etməyə üstünlük vermişdir. O, animelərdəki təsvirlərdən nümunə kimi istifadə etdiyini, çünki animelərdə ağlayan personajların üzlərini sevdiyini qeyd etmişdir. Manqanın telefonda rahat oxunmasını təmin etmək üçün panellərin sayını azaltmış və danışıq şarlarının ölçüsünü böyütmüşdür.[2]
Manqa seriyası Tayzan 5 tərəfindən yazılmış və illüstrasiya olunmuşdur. Bu onun ilk serializasiya olunmuş işidir. Manqa seriyası 10 dekabr 2021-ci ildən 25 mart 2025-ci ilə qədər "Shueisha" nəşriyyatının "Shōnen Jump+" platformasında serializasiya olunmuşdur.[3][4] Manqa seriyasının iki tankobon fəsli buraxılmışdır.[5]
| № | Nəşr tarixi | ISBN | ||
|---|---|---|---|---|
| 1 | 4 mart 2022[6] | 978-4-08-883049-0 | ||
| 2 | 4 aprel 2022[5] | 978-4-08-883104-6 | ||
Anime adaptasiyası 9 dekabr 2024-cü ildə anons edilmişdir.[7] "Enishiya" studiyası tərəfindən istehsal olunan 6 seriyalıq ONA adaptasiyasının rejissoru və ssenaristi Şinya İino, personaj dizayneri Keyta Naqaharadır.[8] Animeyə ilkin baxış 20 may 2025-ci ildə baş tutmuşdur.[9] Anime 28 iyundan 2 avqust 2025-ci ilə qədər "Abema", "Hulu", "Amazon Prime Video", "Netflix", "Lemino" kimi striminq xidmətləri vasitəsilə yayımlanmışdır.[10][8][11] Açılış mahnısı Ano tərəfindən ifa olunan "Happy Lucky Chappy"[c] mahnısı, bağlanış mahnısı Tele tərəfindən ifa olunan "Glass no Sen"[d] mahnısıdır.[8]
| № | Azərbaycanca adı Yaponca adı |
Rejissor | Ssenari müəllifi | Animasiya rejissoru | Yayım tarixi |
|---|---|---|---|---|---|
| 1 | "2016-cı ildəki sənə" "Nisencuroku-nen no Kimi e" (2016年のきみへ) | Şinya İino | Şinya İino | Keyta Naqahara | 28 iyun 2025 |
| 2 | "Takopinin qurtuluşu" "Takopi no Kyusay" (タコピーの救済) | Moaanq | Ko Nekota | Moaanq | 5 iyul 2025 |
| 3 | "Takopinin etirafı" "Takopī no Kokkay" (タコピーの告解) | Rikka | Şinya İino | Rikka, Hirotoşi Aray və Tsuyoşi İida | 12 iyul 2025 |
| 4 | "Azuma-kunun qurtuluşu" "Azuma-kun no Kyusay" (東くんの救済) | Toya Ooşima | Ko Nekota | Hayate Nakamura | 19 iyul 2025 |
| 5 | "2022-ci ildəki sənə" "Nisennicuni-nen no Kimi e" (2022年のきみへ) | Hirotaka Mori | Ko Nekota | Tsi Yi Çjuo | 26 iyul 2025 |
| 6 | "2016-cı ildəki sizə" "Nisenjuroku-nen no Kimi-tachi e" (2016年のきみたちへ) | Şinya İino və Masayuki Sakoi | Şinya İino | Keyta Naqahara, Hirotoşi Aray, Toya Ooşima və Moaanq | 2 avqust 2025 |
Manqa seriyası "Shōnen Jump+" platformasında tək gündə 2 milyondan baxış alan ilk manqa seriyası olmuşdur.[12] 2022-ci ildə Yaponiya Karikaturaçılar Assosiasiyasının Mükəmməllik Mükafatının qalibi olmuşdur.[13]
- ↑ Shōnen Jump Channel [jumpch_youtube]. "✨『#タコピーの原罪』ボイコミちら見せ…✨" (Tweet) (yaponca). 4 aprel 2022. 9 dekabr 2024 tarixində arxivləşdirilib. İstifadə tarixi: 5 avqust 2025.
- ↑ 1 2 "【第86回】『タコピーの原罪』タイザン5先生インタビュー". Rookie Shonen Jump (yaponca). 18 mart 2022. İstifadə tarixi: 6 avqust 2025.
- ↑ "「タコピーの原罪」ジャンプ＋で話題沸騰！ いじめ、毒親…小学生の"闇深"ドラマから目が離せない". AnimeAnime.jp (yaponca). 4 fevral 2022. İstifadə tarixi: 5 avqust 2025.
- ↑ "『タコピーの原罪』最終回が25日0時より"ジャンプ＋"にて公開。重い鬱展開で心えぐられる怪作の結末に注目". Famitsu (yaponca). 24 mart 2022. İstifadə tarixi: 5 avqust 2025.
- ↑ 1 2 "タコピーの原罪 下" (yapon). Shueisha. 7 may 2022 tarixində arxivləşdirilib. İstifadə tarixi: 4 avqust 2025.
- ↑ "タコピーの原罪 上" (yaponca). Shueisha. 7 may 2022 tarixində arxivləşdirilib. İstifadə tarixi: 4 avqust 2025.
- ↑ "Takopi's Original Sin Manga Gets Anime". Anime News Network (ingiliscə). 9 dekabr 2024. İstifadə tarixi: 6 avqust 2025.
- ↑ 1 2 3 "Takopi's Original Sin Anime's Promo Video Reveals Theme Songs, June 28 Premiere". Anime News Network (ingiliscə). 20 may 2025. İstifadə tarixi: 6 avqust 2025.
- ↑ "アニメ「タコピーの原罪」先行上映会＆キャストトークショーが池袋で、最新情報も解禁". Comic Natalie (yaponca). 10 may 2025. İstifadə tarixi: 6 avqust 2025.
- ↑ "配信情報 アニメ「タコピーの原罪」公式サイト". Animenin rəsmi saytı (yaponca). İstifadə tarixi: 6 avqust 2025.
- ↑ "アニメ「タコピーの原罪」最終話が本日配信、完結記念ビジュアル＆PV公開". Comic Natalie (yaponca). 2 avqust 2025. İstifadə tarixi: 6 avqust 2025.
- ↑ "「タコピーの原罪」上巻発売で間宮くるみ、上田麗奈出演のPVを公開". Comic Natalie (ingiliscə). 4 mart 2022. İstifadə tarixi: 6 avqust 2025.
- ↑ "Golden Kamuy Manga Wins Japan Cartoonists Association Award". Anime News Network (ingiliscə). 20 may 2022. İstifadə tarixi: 6 avqust 2025.
- shonenjumpplus.com/episode/3269754496638370192 — Shōnen Jump+ saytında manqanın rəsmi saytı
- tbs.co.jp/anime/takopi_project/ — Animenin rəsmi saytı