Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinTağıyev: Neft - Xeyriyyəçi Hacı Zeynalabdin Tağıyevin həyat və fəaliyyətindən bəhs edən bədii film.[1] 2025-ci ildə Azərbaycanın "Ən yaxşı beynəlxalq bədii film" kateqoriyasında 98-ci Kino Akademiyasının "Oskar" mükafatına namizəd təqdim edilib.[2]
| Tağıyev: Neft | |
|---|---|
| Janr | tarixi |
| Rejissor | Zaur Qasımlı |
| Prodüserlər | Arzu Əliyeva, Orman Əliyev |
| Ssenari müəllifləri | İsmayıl İman, Asif İsgəndərli və Zaur Qasımlı |
| Operator | Vladimir Artemyev |
| Bəstəkar | Etibar Əsədli |
| Rəssam | Səbuhi Atababayev |
| Geyim rəssamı | Vüsal Rəhim |
| İlk baxış tarixi | 2024 |
| Filmin növü | tetralogiya |
| Ölkə |
 Azərbaycan |
| Dil | azərbaycanca |
| İl | 2024 |
| IMDb | ID34740878 |
Filmdə XIX əsrin sonları və XX əsrin əvvəllərində Bakı şəhəri və Azərbaycanın müxtəlif regionlarında baş vermiş mühüm tarixi hadisələrə toxunulmuşdur. Azərbaycan tarixinin bu dövrünün öyrənilməsi və milli dəyərlərin təbliği baxımından əhəmiyyət kəsb edən bu dörd seriyalı ekran əsərinin 2024-cü ildə təqdim edilməsinə səbəb xeyriyyəçi Hacı Zeynalabdin Tağıyevin vəfatının 100 illiyinin qeyd olunmasıdır. Film Hacı Zeynalabdin Tağıyevin həyatının müxtəlif dövrlərini əhatə edir. Bakıda başmaqçı ailəsində dünyaya gələn Tağıyev sonralar bir milyonçu kimi Azərbaycan xalqına böyük xidmətlər göstərmişdir. Ekran əsərində onun həyatında baş verən çətinliklər, verdiyi qərarlar, insanlara göstərdiyi dəstək, eləcə də təhsil sahəsində atdığı addımlar geniş şəkildə təsvir olunur. Bu film vasitəsilə izləyicilər Tağıyevin yaşadığı dövrün sosial-iqtisadi və mədəni mənzərəsi ilə də tanış olmaq imkanı əldə edirlər.[3]
Ekran əsərində Hacı Zeynalabdin Tağıyevin müsəlman Şərqində qızların təhsili üçün ilk xüsusi məktəbin təsis edilməsindəki rolu, Azərbaycanda neft sənayesinin inkişafına və Bakı şəhərinin infrastrukturunun formalaşmasına verdiyi töhfələr diqqət mərkəzindədir. Film Hacı Zeynalabdin Tağıyevin fəaliyyətini daha dərindən araşdırmaq və onun Azərbaycan tarixində oynadığı rolu təbliğ etmək məqsədi daşıyır.[4][5]
Filmin çəkilişləri miqyasına görə Azərbaycan kinematoqrafiyası tarixində mühüm hadisə kimi qiymətləndirilir. Ekran əsəri 76 fərqli məkanda çəkilmiş və kütləvi səhnələrdə 2500-dən çox yaradıcı şəxs iştirak etmişdir. Tarixi səhnələrin realistik şəkildə təqdim edilməsi məqsədilə 300-dən artıq dekorasiya hazırlanmışdır. Hacı Zeynalabdin Tağıyevin yaşadığı dövrün ətraflı təsvirini təmin etmək üçün xüsusi geyim emalatxanası yaradılmış, çox sayda geyim, aksesuar, zərgərlik nümunəsi və xüsusi rekvizitlər hazırlanmışdır.[6]
Ekran əsəri Heydər Əliyev Fondu, Mədəniyyət Nazirliyi və Kino Agentliyinin dəstəyi ilə Bakı Media Mərkəzi tərəfindən lentə alınıb.[1]
Filmin baş prodüseri Arzu Əliyeva, prodüseri Orman Əliyev, rejissoru Zaur Qasımlı, ssenari müəllifləri İsmayıl İman, Asif İsgəndərli və Zaur Qasımlı, operatoru Vladimir Artemyev, rəssamı Səbuhi Atababayev, geyim rəssamı Vüsal Rəhim, bəstəkarı isə Etibar Əsədlidir. Filmdə tarixi personajları tanınmış aktyorlar canlandırmışdır. Baş rolda, Hacı Zeynalabdin Tağıyevi xalq artisti Pərviz Məmmədrzayev oynayır. Digər tarixi obrazları xalq artisti Qurban İsmayılov, Məmməd Səfa, əməkdar artistlər Rasim Cəfər, Elşən Rüstəmov və Natavan Hacıyeva ilə yanaşı geniş peşəkar aktyor heyəti canlandırmışdır. Bu yaradıcı kollektivin iştirakı filmin yüksək sənətkarlıq səviyyəsinə və tarixi realizmə əsaslanmasına əhəmiyyətli töhfə vermişdir.[3][4][1]
Filmin 2007-ci ilə aid "There Will Be Blood" filmindən təsirləndiyi iddia edilib.[7] Rejissor Zaur Qasımlı plagiat iddialarını qəbul etməsə də, təsirin normal olduğunu bildirib.[8]
- ↑ 1 2 3 "Tağıyevin neft sevdası..." Qafqazinfo (az.). 9 dekabr 2024. İstifadə tarixi: 10 dekabr 2024.
- ↑ ""Tağıyev: Neft" filmi "Oskar" mükafatına namizəd təqdim edilib". Azertag.az. İstifadə tarixi: 8 sentyabr 2025.
- ↑ 1 2 ""Tağıyev: Neft" bədii filminin premyerası oldu". Kulis.az (az.). İstifadə tarixi: 10 dekabr 2024.
- ↑ 1 2 ""Tağıyev: Neft" bədii filminin premyerası olub". Aztv.az (ingilis). İstifadə tarixi: 10 dekabr 2024.
- ↑ Rüstmova, Həmidə. ""Tağıyev: neft" – kinotetralogiyanın ilk bölümü böyük ekranda". medeniyyet.az.
- ↑ ""TAĞIYEV: NEFT" bədii filmi kinoteatrlarda təqdim olunacaq". Report İnformasiya Agentliyi (az.). 4 noyabr 2024. İstifadə tarixi: 10 dekabr 2024.
- ↑ Sultanova, Sevda. "Taghiyev: The legend of oil in cinematic interpretation". Aze.Media (ingilis). 9 oktyabr 2024. İstifadə tarixi: 21 sentyabr 2025.
- ↑ ""Çoxu düşünürdü ki, bu film alınmayacaq" - "Tağıyev: Neft" filminin rejissoru Zaur Qasımlı ilə söhbət". 525.az. İstifadə tarixi: 21 sentyabr 2025.