Tərlan Növrəs oğlu Növrəsli (22 yanvar 1978, Bakı) — Azərbaycan alimi, sənətşünaslıq üzrə fəlsəfə doktoru, dosent, şair. Azərbaycan Turizm və Menecment Universitetinin (ATMU) "Mehmanxana və restoran biznesi" kafedrasının müdiridir.[1]
| Tərlan Növrəsli | |
|---|---|
| Doğum tarixi | |
| Doğum yeri | Bakı, Azərbaycan SSR, SSRİ |
| Vətəndaşlığı |
 Azərbaycan |
| Milliyyəti | azərbaycanlı |
| Atası | Növrəs Rza oğlu |
| Elm sahələri | Turizm, sənətşünaslıq |
| Elmi dərəcəsi | Sənətşünaslıq üzrə fəlsəfə doktoru (2015) |
| Elmi adı | Dosent (2019) |
| İş yerləri | Azərbaycan Turizm və Menecment Universiteti |
| Mükafatları |
Türkiyə Respublikası Mədəniyyət və Turizm Nazirliyi tərəfindən "Təşəkkür Belgesi". (2004) TİKA və Azərbaycan Mədəniyyət və Turizm Nazirliyinin birgə sertifikatı. (2012) Dövlət Turizm Agentliyinin sədri tərəfindən "Fəxri Fərman". (2021) |
Tərlan Növrəsli 22 yanvar 1978-ci ildə Bakı şəhərində ziyalı ailəsində anadan olmuşdur. Tərlan Növrəsli Şuşada fəaliyyət göstərmiş məşhur "Məclisi-üns" şairlər məclisinin üzvü, tanınmış şair Mirzə Ələsgər Növrəsin kötükcəsidir.
Ailəlidir, üç övladı (Mirşah, Sevda, Mirxan) var. Qardaşları Şahin Növrəsli (Azərbaycan Respublikasının əməkdar artisti, bəstəkar) və Nurlan Növrəsli (Azərbaycan Respublikasının əməkdar artisti, vokalçı), həmçinin Arslan Növrəsli (tarzən) Azərbaycan mədəniyyətində tanınmış simalardır.[2]
- 1992–1994: Turizm Peşə Məktəbində aşbaz-şirniyyatçı ixtisası üzrə subbakalavr təhsili almışdır.
- 1995: Bakı şəhər 248 saylı orta məktəbi bitirmişdir.
- 1995–1999: BƏKİ-nin "Kommersiya" fakültəsində bakalavr təhsili almışdır.
- 1999–2001: Azərbaycan Dövlət İqtisad Universitetində (UNEC) magistr pilləsini fərqlənmə diplomu ilə bitirmişdir.
- 2002–2003: Türkiyənin Ege Universitetində türk dili üzrə təkmilləşdirmə proqramını "A" səviyyəsi ilə tamamlamışdır.
- 2003–2010: Türkiyənin Dokuz Eylül Universitetində fəlsəfə doktoru (Ph.D) proqramında təhsil almış və "Azerbaycan Turizm Potansiyelinin Kalkınma Amaçlı Değerlendirilmesi" mövzusunda dissertasiya müdafiə etmişdir.
2011-ci ildən Azərbaycan Turizm İnstitutunda (hazırkı ATMU) əmək fəaliyyətinə başlamışdır. Burada baş laborant, müəllim, baş müəllim və dosent vəzifələrində çalışmışdır. 2015-ci ildə dissertasiyasının nostrifikasiyası nəticəsində sənətşünaslıq üzrə fəlsəfə doktoru elmi dərəcəsini, 2019-cu ildə isə "Turizm biznesi" kafedrası üzrə dosent elmi adını almışdır.
O, həmçinin UNEC, ADMİU, Qərbi Kaspi Universiteti kimi ali təhsil müəssisələrində akademik fəaliyyət göstərir, müdafiə şuralarında təmsil olunur. 2018-ci ildən ATMU-da elmlər doktoru proqramı üzrə Qarabağ və Şuşa şəhərinin rekreasiya-animasiya turizm potensialı mövzusunda tədqiqatlarını davam etdirir.
Tərlan Növrəsli 3 dərs vəsaitinin, 17 elmi məqalənin və 30-a yaxın fənn proqramının müəllifidir. Onun Türkiyədə müdafiə etdiyi doktorluq işi beynəlxalq səviyyədə Azərbaycanın turizm sənayesini araşdıran mühüm tədqiqatlardan biri hesab olunur.