Tək gecəlik münasibət

Tək gecəlik münasibət və ya bir gecəlik münasibət — bir-biri ilə yeni tanış olmuş və ya tanış olmayan iki insanın qarşılaşmanı təkrarlamaq və ya münasibətə başlamaq niyyəti olmadan birdəfəlik cinsi əlaqəsidir.

ABŞ sosioloqlarının araşdırmasına görə, yataqxanalarda yaşayan amerikalı tələbələrin 80%-ə qədəri bir gecəlik seksi təcrübə ediblər.^[1] Çox vaxt yad insanlar bir-birləri ilə cinsi əlaqəyə spirtli içkinin və ya digər psixoaktiv maddələrin təsiri altında daxil olur.^[1] ABŞ-də bir gecəlik cinsi əlaqəni təsvir etmək üçün one-night stand^[2] terminindən istifadə olunur. Bu, tez-tez tanışlıq saytlarında ONS olaraq qısaldılır.

Bu tip əlaqəni kortəbii, planlaşdırılmamış, ön sevişmə olmadan edilən ala-tələsik seksdən (ingilisdilli jarqonda: quickie) fərqləndirmək lazımdır.

Bir gecəlik münasibət xəyanətin ən geniş yayılmış formasıdır^[3] və tez-tez hər hansı bir zamanda cəmiyyətdə əxlaqsızlıq səviyyəsini müəyyən etmək üçün araşdırma, anket və sorğularda istifadə olunur.^[4] Bu tip seksin uzunmüddətli münasibətləri təhdid edə biləcəyi irəli sürülür:

Bir gecəlik münasibət, qarşılıqlı düşüncə və razılaşma əsasında qurulmuş bir sevgili tapmaqdan daha riskli ola bilər. Bu cür hallar, xüsusilə səfərdə olan və ya ezamiyyətdə olan iş adamları üçün əlverişli görünsə də, hətta tək gecəlik münasibət üçün belə kiminlə yatağa girdiyinizi bilmək olduqca vacibdir. Heç kim, məsafədən və ya şəraitdən asılı olmayaraq, Sizə problem yaratmaq ehtimalından kənarda deyil. Bir gecəlik münasibət, yenə də xəyanət forması sayılır və əgər aşkara çıxarsa, həm Sizin, həm də həyat yoldaşınız üçün eyni dərəcədə dağıdıcı ola bilər.^[5]

Tək gecəlik görüşlər, "Tinder" və "Grindr" kimi onlayn mobil proqramların meydana çıxması ilə daha da yayğınlaşdı. Bu kimi tətbiqlər insanlara cinsi əlaqəyə daxil olmaq məqsədi ilə partnyor tapmağa imkan versə də, bu vasitələrdən daha uzunmüddətli münasibət axtarışları üçün də istifadə edilə bilər.^[6]