Türkçülər günü — Türk millətçiliyinin və milli şüurun gücləndirilməsi məqsədilə hər il 3 may tarixində qeyd olunan simvolik gündür. Bu gün, 1944-cü ildə Ankarada baş verən hadisələrin və Hüseyn Nihal Atsızın məhkəməyə verilməsinin nəticəsi olaraq Türk gəncləri və milliyyətçi ziyalılar arasında formalaşan bir hərəkata əsaslanır. Günü həmçinin Millətçilik Günü və ya Millətçilər Günü olaraq da adlandırırlar.
1940-cı illərdə, İkinci Dünya Müharibəsinin sonuna yaxın dövrlərdə, Türkiyədə daxili siyasətdə milliyyətçilik və kommunizm ideologiyaları arasında gərginlik artmışdı. Xüsusilə 1944-cü ildə SSRİ-nin Qars və Ərdəhan torpaqları ilə bağlı irəli sürdüyü iddialar siyasi atmosferi daha da həssaslaşdırmışdı. Bu dövrdə tanınmış Türkçü ziyalı Hüseyn Nihal Atsız, Orhun dərgisində dövrün Baş naziri Şükrü Saracoğluna ünvanladığı iki açıq məktub dərc etmişdi. İkinci məktubda o, yazıçı Səbahəddin Aliyə Sovet casusu və vətən xaini deyə müraciət etmiş, bunun nəticəsində Ali ona qarşı təhqir iddiası ilə məhkəməyə müraciət etmişdi.
1944-cü il 3 may tarixində Hüseyn Nihal Atsızın Ankara məhkəməsində ikinci məhkəmə iclası keçirildi. Bu məhkəmə iclası böyük bir izdihamın iştirakı ilə müşayiət olundu. Atsızı dəstəkləyənlər Ankaraya toplaşaraq, kommunizm əleyhinə və Türk millətçiliyini müdafiə edən şüarlar səsləndirdilər. Səbahəddin Ali və Nazim Hikmətin kitabları mitinq iştirakçıları tərəfindən yandırıldı. Daha sonra iştirakçılar Ulus meydanına yürüş etdilər və burada polis qüvvələri ilə qarşıdurma yaşandı. Hadisədən sonra Hüseyn Nihal Atsız, Alparslan Türkeş, Zəki Vəlidi Toğan, Nəcdət Səncər və digər millətçi ziyalılar həbs olundu. Bu hadisələr tarixə Irqçılıq–Turançılıq Davası kimi düşən prosesin başlanğıcı oldu.
1945-ci il 3 may tarixində Topxana Hərbi Həbsxanasında saxlanılan Reha Oğuz Türkkan, Hüseyn Nihal Atsız, Alparslan Türkeş və digərləri, bir il əvvəlki hadisələri xatırlamaq və Türkçülüyə dəstək məqsədilə həbsxanada bir toplantı keçirdilər. Bu toplantı sonradan 3 May Türkçülük Gününün qeyd edilməsinin başlanğıcı hesab edildi.
3 May Türkçülük Günü, Türk millətinin öz tarixinə, mədəniyyətinə, milli kimliyinə və mənəvi dəyərlərinə sahib çıxmaq iradəsinin simvolu kimi qəbul edilir. Bu gün, xüsusilə gənc nəsil arasında Türkçülük ideologiyasının yaşadılması və müdafiə olunması baxımından mühüm əhəmiyyət kəsb edir.
Bu gün hal-hazırda Türk Ocakları, Milliyyətçi Hərəkat Partiyası (Millətçilər Günü adı ilə), İYİ Partiya, Ədalət və İnkişaf Partiyası və digər milliyyətçi təşkilatlar və siyasətçilər tərəfindən qeyd olunur. 1967-ci ildə Türk Milliyyətçiləri Birliyi bu günün əhəmiyyətini vurğulamaq üçün xüsusi bir kitab da nəşr etmişdir.
- Nihal Atsız, "3 Mayıs 1944", 3 Mayıs 1944, 50. Yılında Türkçülük Armağanı, İzmir 1994, s. 2.
- Nejdet Sancar, "Türkçülük Günü", 3 Mayıs 1944, 50. Yılında Türkçülük Armağanı, İzmir 1994, s. 3.
- Reha Oğuz Türkkan, Tabutluktan Gurbete, 3.bask. 1988.