Supermen (film, 2025)

Klark Kent/Supermen Boraviya ordusunun qonşu Carhanpur dövləti ərazisinə hücumunun qarşısını alır və Boraviya prezidenti Vasil Qurkosa xəbərdarlıq edərək işğalçı planından əl çəkməsini tapşırır. Metropolisdə "Boravia baltası" adlı metainsanla döyüşən Supermen ilk dəfə rəqibinə məğlub olur və Kripto adlı itinin köməyi ilə Antraktikada yerləşən Tənhalıq qəsrinə uçur. Bu zaman onları, milyarder və supercani Leks Lütorun müttəfiqi olan başqa bir metainsan - Ancelika Spika/Mühəndis gizlincə izləyir. Tənhalıq qəsrindəki robotlar konsentratlaşdırılmış günəş enerjisi olə Supermenin yaralarını sağaldaraq, valideynləri Cor-El və Lara Lor-Vanın Kriptonun məhv olmasından əvvəl Supermeni Yerə göndərərkən yazdıqları videomesajı göstərərək sakitləşdirirlər. Bu videomesaj ulduzlararası səyahət zamanı zədələndiyindən yalnız bir hissəsini izləmək mümkündür. Yenidən Metropolisə qayıdan Supermen, "Boravia baltası" ləqəbi altında gizlənən, əslində Lütorun gizli müttəfiqi olan Ultramenlə yenidən döyüşə girir.

Supermen, "Daily Planet"dən həmkarı və sevgilisi olan Lois Leynə müsahibə verməyə razılaşır. Müsahibə zamanı Lois, Supermenin Boraviyadakı aktivliyinin etik və hüquqi tərəfləri ilə bağlı basqı edir və bu, mübahisəyə səbəb olur. Leks Lütor, Metropolisə kaydzyu buraxır, özü isə Ultramen və Mühəndislə birlikdə Tənhalıq qəsrinə daxil olur. Onlar robotları məhv edir, Kriptonu əsir alır və Supermenin valideynlərinin videomesajını ələ keçirirlər; Mühəndis supergücünü tətbiq edərək videomesajın zədələnmiş hissəsini bərpa edir. Supermen, Yaşıl Fənər, Mister Terrifik və Şahin-qızdan ibarət "Ədalət Dəstəsi"nin iştirakı ilə kaydzyu ilə döyüşür və şəhər sakinlərini xilas edir. Supermen bədheybəti də xilas etməyə çalışsa da, Mister Terrifik onu öldürür. Lütor, Supermenin valideynlərinin videomesajını bərpa edilmiş ikinci hissəsi ilə birlikdə televiziyada yayımlayır; bərpa edilmiş yarıda valideynlərinin Supermeni Dünyanı işğal etməyə və Kripton əhalisini bərpa etmək üçün hərəmxana yaratmağa çağırması, Supermen də daxil olmaqla hər kəsi şoka salır.

Videomesajın yayımlanmasından sonra ictimai fikir Supermenin əleyhinə çevrilir, Kriptonu axtaran Supermenin qəzəblə Lütorun ofisinə soxulması isə vəziyyəti daha da qəlizləşdirir. Lois Supermeni sakitləşdirərək, ona inandığını bildirir, Supermen isə hakimiyyətə təslim olmamışdan əvvəl onu sevdiyini etiraf edir. Supermeni saxlayacaq həbsxanaya malik olmayan dövlət qurumları, onu dindirmək və həbsdə tutmaq üçün Lütora təhvil verirlər. Lütor, Supermeni xüsusi yaradılmış cib kainatına aparır. Burada o, bütün düşmənlərini, o cümlədən, yenicə ələ keçirilmiş Kriptonu saxlayır, ictimai fəaliyyət üçün gizli ofis kimi istifadə edir. Supermen, Metamorfo adlı metainsanla bir kameraya salınır. Metamorfonun Coui adlı kiçik oğlunu əsir saxlayan Lütor, istədiyini etdirmək üçün onu alət kimi istifadə edir. Supermenin zəifləməsi üçün isə, Metamorfoya əlini kriptonitə çevirməyi buyurur. Supermenin dindirilməsi zamanı, ona təsir etmək üçün Lütor, dondurma satan və bir dəfə Supermen tərəfindən xilas edilmiş şəhər sakini Malik Əlini öldürür. Onun günahsız insanı bu cür soyuqqanlılıqla qətlə yetirməsi Metamorfonu dəhşətə gətirir. Bundan sonra, o, Supermenin kameradan qaçmasına kömək edir; güclərini birləşdirən cütlük Coui və Kriptonu azad etməyə müvəffəq olur. Bu arada, Ədalət Dəstəsi ilə görüşən Louis onları Supermenə kömək etmək üçün yola gətirməyə razı salmağa çalışır. Lakin, komandadan yalnız Mister Terrifik buna razılaşır. Birlikdə cib kainatına yol tapan cütlük orda həbs edilmiş digər əsirləri də xilas edir. Lois, gücünü bərpa etməyə vaxt qazanması üçün Supermeni dünyəvi valideynləri Marta və Conatan Kentin evinə gətirir. Conatan Supermenə deyir ki, onun kim olduğunu valideynlərinin mesajı yox, etdiyi hərəkətlər müəyyən edir.

Lütorun sevgilisi İv Taşmaxer, "Daily Planet"in müxbiri Cimmi Olsenə aşiq olur və ona, Lütorun, Cahanpur ərazisinin yarısını ələ keçirmək üçün Boraviyaya kömək etməsinin sübutlarını təqdim edir. Onu həbsə salan Lütor, yenidən Supermeni Metropolisə cəlb edir; bunun üçün o, cib kainatına qeyri-stabil portal açır və beləliklə də, reallıqda getdikcə genişlənən çat yaradır. Boravianın Cahanpura təkrar hücumunun qarşısını almaq üçün, Supermen, Yaşıl Fənər, Şahin Qız və Metamorfonu hadisə yerinə göndərir. Şahin-qız Boravia tiranı Qurkosu öldürür, Yaşıl Fənər isə Metamorfonu Ədalət Dəstəsinə qoşulmağa dəvət edir. Metropolisdə Supermen və Mister Terrifik, Mühəndis və Ultramenə qarşı döyüşür. Mühəndisi məğlub edən Supermen, öyrənir ki, Ultramen onun klonudur. Supermeni məğlub etməyə çalışan Lütor, reallıqda baş verən çatı qapatmağa qoymur və bu, şəhərin iki yerə parçalanmasına gətirib çıxarır. Supermen və Kripto tərəfindən məğlub edilən Ultramen, reallıq çatı altında yaranan qara dəliyə düşür. Bundan sonra Supermen, Kripto və Mister Terrifik tərəfindən Leks Lütorun qərargahı ələ keçirilir. Supermen Lütoru ödürməkdən imtina edir, Mister Terrifik isə reallqda yaranan çatı bağlayır.

Lütorun əməllərinin üstünü açan Lois və Cimmi, Supermenə haqq qazandırır. Bundan sonra, Lütor və ona xidmət edənlər həbs olunur, İv də daxil olmaqla, cib kainatında həbs olunanlar isə azadlığa çıxır. Lois də Supermenə, onu sevdiyini etiraf edir. Supermen özünə gəlmək üçün, Tənhalıq qəsrinə gəlir. Bir müddət sonra, onun əmisi qızı Kara Zor El də kefli halda qəsrə gəlir və köpəyi Kriptonu götürmək istədiyini bildirir. Supermeni sakitləşdirmək üçün, robotlar ona yerdə keçən uşaqlığının videogörüntülərini göstərirlər.

• Devid Korensvet - Klark Kent / Supermen:
  

Məhv olmuş Kripton planetinin sakini, yadplanetli kimi Yerdə yaşayır. Gizli şəxsiyyəti altında müxbir kimi Metropolisin "Daily Planet" qəzetində çalışır.^[6][7] Rejissor Ceyms Qann bildirir ki, filmdə Supermen 25 yaşındadır və bu da onu aktyor Tom Uellinq tərəfindən "Smolvil" serialında (2001-2011) canlandırılmış Supermendən daha yaşlı, lakin, Henri Kavill tərəfindən DC Genişləndirilmiş Kaintında canlandırılmış Supermendən daha gənc edir.^[8] Prodüsser Piter Safran, personajın DC Kainatında (DCK) təfsirini, "həqiqət, ədalət və Amerikan həyat tərzinin təcəssümü" və "xeyirxahlığı köhnədəblilik hesab edən dünyada xeyirxahlıq nümunəsi" adlandırır.^[9] Qann bildirir ki, filmdə, SUpermen həm müxbir, həm də superqəhrəman kimi uğur qazansa da, həyatına daxil olan yeni elementlər balansı pozur. Həmin elementlərə iş yoldaşı Lois Leynə dəlicəsinə aşiq olması, onu saf hesab edən digər superqəhrəmanlarla dostluğu aiddir. Filmdə, bu elementlərin, Supermenin mükəmməl olmayan seçimlərinə necə təsir etməsi və öz yolunu tapması göstərilir.^[10] Korensvet, Klarkın valideynləri ilə əlaqəsi və "Daily Planet"dəki işi ilə Supermeni bir-birindən fərqləndirir. O, Supermeni sakit və hakim olan ictimai şəxs kimi təqdim edir. Personaj üçün hazırlaşarkən, aktyor, Qrant Morrison və Frenk Kuaytli tərəfindən yazılmış "All-Star Superman" (2005–2008) komiksindən, presonajın duruş və hərəkət texnikası üçün isə, 1978-ci ildə təqdim edilmiş Supermen filmində aktyor Kristofer Riv tərəfindən yaradılmış Supermen obrazından ilham almışdır. O eyni zamanda, personajın xarakterini yaradarkən ögey qardaşından ilham almışdır və onu, 2 metrdən hündür boya və 270 fut çəkiyə malik olmasına baxmayaraq "ən sakit, ən mükəmməl insan" kimi təsvir edir; buna görə də, Korensvet üçün Supermen, "mümkün qədər balaca və sakit" olmağa çalışan böyük bir varlıqdır.^[11] Personajın etimadsızlığının dayandırılması, Klarkın dual kimliyi formalaşdırmaq üçün hipnotik eynək istifadə məsələlərini dəqiqləşdirmək üçün, Qann, DC Comics yazarı Tom Kinq ilə məsləhətləşmişdir.^[12] Filmdə, Korensvet həm də, "Boravia baltası" ləqəbi altında gizlənən, Supermenin qəddar klonu Ultrameni canlandırmışdır.^[13]