Sunay Akın

Şükrü Sunay Akın (d. 12 sentyabr 1962, Trabzon) — Türk şairi, yazıçısı, jurnalisti, coğrafiyaşünası və teatr aktyorudur.

Sunay Akın
Şükrü Sunay Akın
Doğum adı	Şükrü Sunay Akın
Doğum tarixi	12 sentyabr 1962(1962-09-12)[1][2] (63 yaş)
Doğum yeri	Ortahisar, Trabzon, Türkiyə[3]
Uşağı	2
Təhsili	İstanbul Universiteti
Fəaliyyəti	jurnalist, yazıçı, şair, televiziya aparıcısı
sunayakin.com.tr
Vikianbarda əlaqəli mediafayllar

12 sentyabr 1962-ci ildə Trabzonda Nəriman və Tuncay Akının ikinci oğlan övladı olaraq dünyaya gəldi. Ailəsi onun daha yaxşı təhsil ala bilməsi üçün 10 yaşında olarkən İstanbula köçdü. Orta təhsilini İstanbul Heydərpaşa Liseyində başa vurdu. İstanbul Universitetinin Coğrafiya fakültəsini (bölümünü) bitirdi.

Özünün dediyinə görə, ilk şeirini yeddi yaşında valideynlərinin otağında yerləşən paltar şkafında boş qalan yeganə asqıya yazır və ona “Üşümüyor musun?” (“Üşümürsənmi?”) deyə sual verir. İlk şeir kitabı 1989-cu ildə “Makiler” adı ilə nəşr olunur. Adını Cemal Sürəyyanın verdiyi bu kitabdan sonra “Antik Acılar”, “Kaza Süsü”, “62 Tavşanı” kitabları çap edilir. O, dostları ilə birlikdə 1989-cu ildə “Yeni Yaprak”, 1990-cı ildə isə “Olmaz” adlı şeir jurnallarını təsis edib nəşr etdirmişdir.

1987-ci ildə “Noktalı Virgül” adlı dosyası ilə Xəlil Qocagöz Şeir Mükafatına layiq görülür. 1990-cı ildə isə Orxon Murad Arıburnu Şeir Mükafatını^[4][5] şeiri ilə qazanır.

Ani ilhamlara əsaslanan və adətən qısa həcmli olan şeirləri, Orxan Vəli Qanıqın poeziyasındakı bəzi xüsusiyyətləri müasir dövrdə davam etdirən bir quruluşa malikdir. Bununla yanaşı, bu tip şeirlərdə adətən rast gəlinməyən yumşaq, lirik bir ton da mövcuddur. Şeirlərində xüsusilə incə istehza (yergi) ünsürlərindən istifadədəki rahatlığı ilə seçilir. Camal Sürəyanın təsiri altında yazdığı şeirlərdə dil oyunlarına əsaslanan güclü istehza və gözlənilməzlik, uşaqlara və kədərə yönələn mövzularla birlikdə şairin maraq dairəsini və həssaslığını aydın şəkildə nümayiş etdirir.

Mərmərə Universitetinin Gözəl Sənətlər Fakültəsində dərs deyib. Müjdat Gəzən Sənət Mərkəzində isə 5 il ərzində həm dərs keçib, həm də təhsil alıb. Bu təcrübənin də köməyi ilə tək nəfərlik tamaşalar hazırlayıb səhnəyə qoymağa başlayıb. Türkiyənin bir çox şəhərlərində və xaricdə (Frankfurt, Nürnberg, London) tək nəfərlik tamaşalarını dəfələrlə nümayiş etdirib. O, “İki Kitap Bir Heves” adlı tamaşasını hazırda da təqdim etməyə davam edir.

23 aprel 2005-ci ildə dünyanın dörd bir yanından 11 il ərzində topladığı oyuncaqlarla, uzun illər xəyalını qurduğu İstanbul Oyuncaq Muzeyini İstanbulun Göztəpə səmtində, ailəsinə məxsus dörd mərtəbəli tarixi malikanədə açdı. Bu muzey Türkiyədə öz növündə ilk və yeganə nümunədir və Avropa Şurasına bağlı Avropa Muzey Forumu (European Museum Forum) tərəfindən təqdim edilən "Avropada ilin muzeyi" müsabiqəsinə 2010-cu il üçün namizəd göstərilmişdir. 2015-ci ildə ODTÜ Gənc Sahibkarlar Cəmiyyəti tərəfindən təşkil olunan V Kristal Ağac Mükafat Mərasimində “Mədəniyyət və İncəsənət Sektorunda İlin Sahibkarı” mükafatına layiq görülmüşdür.^[6]

TRT 2 və CNN Türk kanallarında “Stüdyo İstanbul”, “İzler”, “Akşama Doğru”, “5N1K” kimi mədəniyyət və incəsənət proqramları, sənədli filmlər hazırlayıb onlara töhfə verən Sunay Akın, TV8 (Türkiyə) kanalında da “Gezgin Korkuluk” və “Mahya Işıkları” adlı proqramları hazırlayıb aparmışdır.

Yaşam Radyo, Radyo Kent və Best FM radiolarında proqramlar hazırlayıb aparıb. Mərmərə Universitetinin Gözəl Sənətlər Fakültəsində və Müjdat Gəzən Sənət Mərkəzində müəllim kimi dərs deyib.^[7] Hıncal Uluç, Haşmət Babaoğlu və Nəbil Özgəntürk ilə birlikdə “Yaşamdan Dakikalar” proqramında yer alıb. Skyturk360 kanalında isə “Hayat Deyince” adlı proqramı aparıb.

2023-cü ildə Sunay Akın adına bir fond yaradılmışdır. Fondun məqsədi Şükrü Sunay Akının təmsil etdiyi, yaratdığı, inkişaf etdirdiyi və önəm verdiyi — başda mədəniyyət, incəsənət və ədəbiyyat olmaqla, bütün universal dəyərləri Türkiyədə və bütün dünya cəmiyyətləri səviyyəsində qorumaq və yaymaq, bu yolla ictimai fayda təmin etməkdir. Bu məqsədlə Şükrü Sunay Akının adını və bu adın təmsil etdiyi dəyərləri qorumaq və yaşatmaq, onun ad hüquqlarını bütün platformalarda müdafiə etmək, icazəsiz istifadənin qarşısını almaq və fondun nizamnaməsində göstərilən digər məqsədləri həyata keçirmək əsas hədəflər sırasındadır.^[8]