Sultan Süleyman türbəsi — İstanbulun Fateh rayonunda yerləşən XVI əsrdə inşa olunan Süleymaniyyə külliyəsinə aid türbə.
Osmanlı memarlığının ən gözəl nümunəsi olan Süleymaniyyə külliyəsi 1550-1558-ci illərdə inşa olunmuşdur. Külliyə məscid, mədrəsə, darül-hədis, 2 türbə (Sultan Süleyman türbəsi və Xürrəm Sultan türbəsi), darüş-şəfa və imarətdən ibarətdir. Külliyənin açılışı 15 oktyabr 1557-ci ildə baş tutdu. Külliyəyə aid olan türbənin inşası isə 1566-cı ildə Memar Sənan tərəfindən tamamlanmışdı. Türbəyə ilk dəfn olunan şəxs 10-cu Osmanlı sultanı Sultan Süleyman oldu. 7 sentyabr 1566-cı ildə davam edən Zigetvar səfəri əsnasında vəfat edən Sultan Süleymanın cənazəsi ordudan gizli şəkildə yarıldı və daxili orqanları sultan çadırının içində qazılan məzarda basdırıldı. Mumyalanan bədəni isə İstanbula göndərildi. Daxili orqanların dəfn olunduğu yerə sonrakı illərdə türbə inşa edildi. Ancaq sonrakı illərdə baxımsız qaldı və kilsəyə çevrildi.
Sultan Süleyman türbəsi Memar Sənanın fərqli əsərlərindən biridir. Səkkizbucaqlı formada olan türbə kəsmə daşdan inşa olunub. Türbənin giriş qapısı üzərinə Məkkədən gətirilən qara daş yerləşdirilmişdir. Daxili isə çinilərlə bəzədilmişdir. Türbədə dəfn edilənlər bunlardır:
- I Süleyman
- I Süleymanın qızı Mihrimah Sultan
- Sultan İbrahimin qızı Beyhan Sultan
- II Süleyman
- Validə Saliha Dilaşub Sultan
- II Əhməd
- II Əhmədin xanımı Rabiyə Sultan
- II Əhmədin qızı Asiyə Sultan
- II Mustafanın qızı Safiyə Sultan