Samir Əsədov

Samir 11 oktyabr 1987-ci ildə Ağstafa şəhərində anadan olub. O, 1995–2005-ci illərdə Bülbül adına Orta İxtisas Musiqi Məktəbində, 2005–2009-cu illərdə Üzeyir Hacıbəyli adına Bakı Musiqi Akademiyasında professor Hökümə Əliyeva və xalq artisti, professor Azər Rzayevin sinfində violin ixtisası üzrə təhsil almışdır.

2007–2013-cü illərdə "Con tempo" müasir musiqi ansamblının konsertmeysteri olmuşdur. 2008–2012-ci illərdə Azərbaycan Dövlət Akademik Opera və Balet teatrında Orkestr artisti, 2012–2017-ci illərdə Üzeyir Hacıbəyli adına Azərbaycan Dövlət Simfonik Orkestrinin artisti vəzifəsində çalışmışdır. Azərbaycan, İran, Türkiyə, Rusiya, Gürcüstan, Ukrayna, Yunanıstan, Fransa, Almaniya, Avstriya, Küveyt və s. ölkələrdə keçirilən beynəlxalq festivalların, dövlət tədbirlərinin iştirakçısı olmuş və xüsusi diplomlara layiq görülmüşdür. 2014–2017-ci illərdə "Baku-Simfonietta" orkestrin direktoru və konsertmeysteri olmuşdur. Həmin illərdə Azərbaycan Bəstəkarlar İttifaqının "Oazis" simli kvartetinin üzvü olmuşdur. Yüzə yaxın əsərin ilk ifaçısı və redaktoru olmuşdur. Əllidən çox film və tamaşaların musiqisini ifa etmiş və xeyli sayda əsərləri kamera, simfonik, estrada, xalq çalğı alətləri orkestri və müxtəlif tərkibli ansambllar üçün işləmişdir. 2015-ci ildəki uğurlu və səmərəli fəaliyyətinə görə Azərbaycan Respublikası İdman və Gənclər Nazirliyinin təsis etdiyi "Gənclər Mükafatı"na layiq görülüb. 2016-cı ildə "CadeNZa" ansamblını yaratmışdır.^[1] 2017–2019-cu illərdə Çin Xalq Respublikasının Kunming Beynəlxalq Filarmonik Orkestrinin konsertmeyster köməkçisi vəzifəsində çalışıb.^[2] Kunming Filarmoniyasının simli kvartetinin və Kamera orkestrinin üzvü olmuşdur.^[3] 2018-ci ilin iyununda Azərbaycan Xalq Cümhuriyyətinin yaranması və dahi Azərbaycan bəstəkarı Qara Qarayevin anadan olmasının 100 illiyi ilə əlaqədar Kunming Beynəlxalq Filarmoniyası və Azərbaycanın Çin Xalq Respublikasındakı səfirliyi ilə birgə Azərbaycan və Çin bəstəkarlarının əsərlərindən ibarət konsertin təşkilatçılarından olmuş və həmin konsertdə simfonik orkestrin müşayiəti ilə solo ifa etmişdir.^[4][5] 2018-ci ilin noyabrında Kunming İncəsənət Universitetinin Kamera Musiqisi zalında "Cadenza" ansamblı ilə müasir Çin bəstəkarlarının əsərlərindən ibarət konsert proqramı ilə çıxış etmişdir. Həmin ildə "Kunming International Music Festival"da 4 gün ardıcıl müxtəlif proqramla Filarmonik Kamera orkestrinin müşayiəti ilə solo çıxış etmişdir. Samir Əsədov 2019-cu ildə Pekin şəhərində Xocalı Soyqırımının 27-ci ildönümü ilə əlaqədar anım tədbirini təşkil etmiş və yaratdığı "CadeNZa" ansamblı ilə çıxış etmişdir. 2020–2021-ci illərdə müxtəlif beynəlxalq onlayn layihələrin iştirakçısı olmuşdur. 2024-cü ilin iyulunda Qarabağ Univeristetinin İncəsənət fakültəsinin Laboratoriya müdiri vəzifəsinə təyin olunub. Hal-hazırda "Bakı Müasir Musiqi Günləri festivalı"nın təşkilat komitəsinin üzvü, 2021-ci ildən orkestr kimi fəaliyyətini davam etdirən "CadeNZa" orkestrinin dirijorudur.^[6][7][8][9]