Sərxan Məmmədov

Sərxan Məmmədov 2 mart 2001-ci ildə Masallı rayonunun Tatyanoba kəndində anadan olub. 2010-cu ildə güləşlə məşğul olmağa başlayıb. Zöhrab Abbasovun rəhbərliyi altında məşq edir, Neftçi İdman Klubunda çıxış edir. Azərbaycan İdman Akademiyasında təhsil alıb.

Sərxan Məmmədovun beynəlxalq səviyyədə debütü 2017-ci ilə təsadüf edib. Həmin il o, iyunda Latviyada yeniyetmələr arasında Avropa Çempionatını yeddinci, iyulda isə Yunanıstanda yeniyetmələr arasında Dünya Çempionatını doqquzuncu pillədə başa vurdu.

2018-ci ildə Məmmədov beynəlxalq arenada birinci uğurlarına imza atdı. O, mayda KYRM-da yeniyetmələr arasında Avropa Çempionatının bürünc medalına sahib oldu, iyulda isə Xorvatiyada yeniyetmələr arasında Dünya Çempionatını final görüşündə məğlub olaraq turniri gümüş medalla başa vurdu. Həmin il Məmmədov həm də gənclər arasında Dünya Çempionatında debüt etdi və turniri 8-ci pillədə tamamladı.

2019-cu ildə isə Sərxan Məmmədovun nəticələrində eniş yaşandı. Martda Serbiyada U23 Avropa Çempionatını 12-ci, iyunda İspaniyada gənclər arasında Avropa Çempionatını 8-ci, avqustda Estoniyada gənclər arasında Dünya Çempionatını isə 18-ci pillələrdə tamamladı.

2021-ci ildə Məmmədovun nəticələri bir qədər yaxşılaşdı. O, mövsüm ərzində 23 yaşlılar arasında Dünya və Avropa Çempionatlarında yeddinci pillələrdə qərarlaşdı. İyulda Dortmund şəhərində (Almaniya) baş tutan gənclər arasında Avropa Çempionatını da yeddinci pillədə başa vuran Məmmədov avqustda Ufa şəhərində (Rusiya) baş tutan gənclər arasında Dünya Çempionatının final görüşündə məğlub olaraq turniri gümüş medalla başa vurdu. Həmin il o, həm də Azərbaycan Çempionatında bütün rəqibləri üzərində qələbə qazanaraq turnirin qalibi oldu.

2022-ci ildə Sərxan Məmmədovun uğuru martda Bolqarıstanın Plovdiv şəhərində baş tutan 23 yaşlılar arasında Avropa Çempionatını bürünc medalla başa vurmaq oldu. O, həmin il həm də İspaniyada U23 Dünya Çempionatını medalın bir addımlığında — beşinci pillədə başa vurdu, Azərbaycan Çempionatında isə gümüş medalın sahibi oldu.

Sərxan Məmmədov 2023-cü ildə yunan-roma güləşi üzrə Azərbaycan yığmasının əsas heyətinə cəlb edildi və fevralda Xorvatiyada baş tutan Zagreb Open beynəlxalq turnirində mübarizə apardı (turniri 11-ci pillədə başa vurdu). Bununla belə o, yığmanın əsas heyətində "bir nömrə" ola bilmədi və mövsüm ərzində nüfuzlu beynəlxalq turnirlərdən uzaq qaldı. Həmin il Məmmədov martda Rumıniyanın Buxarest şəhərində 23 yaşlılar arasında Avropa Çempionatını beşinci pillədə başa vurdu, noyabrda isə Albaniyanın Tirana şəhərində 23 yaşlılar arasında Dünya Çempionatının bürünc medalına sahib oldu. Həmin il o, həm də Azərbaycan Çempionatını bürünc medalla tamamladı.

2024-cü ildə də Sərxan Məmmədov yığmanın "bir nömrəsi" ola bilmədi. Məmmədov il ərzində Azərbaycanda və Albaniyada baş tutan 23 yaşlılar arasında Dünya və Avropa Çempionatlarında çıxış etdi və turnirləri müvafiq olaraq 10-cu və 14-cü pillələrdə tamamladı. Həmin il o, Azərbaycan Çempionatının final görüşündə məğlub olaraq turniri gümüş medalla başa vurdu.

2025-ci ilin fevralında Məmmədov Xorvatiyada Zagreb Open beynəlxalq turnirinin bürünc medalına sahib oldu.