Səməndər Axundzadə

Səməndər Axund Zəki oğlu 1898-ci ildə Quba şəhərində Kərbəlayı Axund Zəki Hacızadənin və Hacı Seyid Zəki ağanın qızı Məsumənin ailəsində anadan olmuşdur. Axundzadə 1918-ci ildə Bakı realnı məktəbini bitirmişdir. Parlamentin 1919-cu il bir sentyabr qərarına əsasən, təhsilini dağ mədən mühəndisliyi sahəsində davam etdirmək üçün Almaniyanın Frayberq Akademiyasına göndərilmişdir. Azərbaycanda sovet hakimiyyəti qurulduqdan sonra xaricdə dövlət hesabına təhsil alan azərbaycanlı tələbələrin vəziyyətini öyrənən Azərbaycanlı Tələbələr İttifaqının 1923-25-ci illər üçün məlumatında Axundzadənin təhsilinin bitməsinə bir il qaldığı göstərilirdi. O, 24 oktyabr 1924-cü ildə ali təhsilini burada başa vuraraq Dağ-mədən mühəndisi üzrə diplom almışdır. Təhsilini başa vurduqdan sonra vətənə dönmüş, Azərbaycan SSR Dövlət Plan Komitəsində ağır sənaye bölməsində işləmişdir. Repressiya olunmuşdur.^[1]

• Atası Axund Zəki Ərşi Hacızadə — 1850-ci ildə Xızıda doğulub. İraqda Nəcəf şəhərində ali ruhani təhsili alıb,^[2] 15 il Qubada qazilik etmişdir. Türk, ərəb, fars dillərini mükəmməl bilən "Ərşi" təxəllüsü ilə bu dillərdə şeirlər yazan Zəki Hacızadənin 1914-cü ildə Bakıda nəşr edilən "Yədi Beyza" kitabında əsasən, tərbiyəvi əhəmiyyətə malik əsərlər toplanmışdır.^[3] 1919-cu ildə vəfat etmişdir.
• Qardaşı Ağaşərif Axund Zəki oğlu Axundov(1885, Xızı – 1959, Bakı) — 1885-cı ildə Xızıda doğulmuşdur. İlk təhsilini atasından almışdır. Səməd Mənsur, Hüseyn Cavid, Əliağa Vahidlə dostluq etmişdir. Dövrü mətbuatda ara-sıra şerləri dərc olunmuşdur. 1959-cu ildə Bakıda vəfat etmişdir.