Səhifə təsviri dili

Səhifə təsviri dili (Page Description Language - PDL) – printerə və ya ekrana çıxarılan məlumatları təsvir etmək üçün istifadə olunan proqramlaşdırma dilidir(məsələn, PostScript). Səhifə təsviri dilinin göstərişləri əsasında printer və ya ekran səhifənin görüntüsünü formalaşdırır.

PDL-lər digər proqramlaşdırma dilləri kimidir; onlar proqramın məntiqi axınını idarə etməyə və bununla da mürəkkəb vizual təsvirlər yaratmağa imkan verir. Səhifə təsviri dili yalnız spesifikasiyanı (məsələn, şriftləri və onların ölçülərini) təqdim edir; simvolların və qrafik elementlərin çəkilməsi ilə bağlı bütün işlər isə çıxış qurğusunun üzərinə düşür.

Bu yanaşmada işin konkret realizasiyası çıxış qurğusundan asılı olduğuna görə, səhifə təsviri dili aparatdan asılı deyil. Yəni PDL-ni dəstəkləyən istənilən printer və ya digər çıxış qurğusu həmin dildəki təsvirə əsasən görüntünü yarada bilər.

Lakin bu imkanlar “o qədər də ucuz başa gəlmir”. Səhifə təsviri dili tələb edir ki, printerin öz prosessoru və yaddaşı fərdi kompüterin yaddaşı ilə müqayisə edilə biləcək qədər (bəzən isə daha artıq) güclü olsun.