Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edin"Rusiya burada həmişəlikdir" (rus. Россия здесь навсегда) — Rusiya hakimiyyəti və təbliğatçıları tərəfindən Ukrayna ərazilərinin işğalını təsvir etmək məqsədilə istifadə olunmuş şüar. Bu ifadə Rusiya Federasiyasının Ukraynaya qarşı genişmiqyaslı işğalçı müharibəsi dövründə geniş yayılmış, lakin daha əvvəl Krım məsələsinə münasibətdə də işlədilmişdir.
15 may 2022-ci il tarixində peşəkar fotoqraf, Kiyev vilayətində anadan olmuş Anna Pasıçnik "Instagram" sosial şəbəkəsində oğlu Yaroslav və onun ən yaxın rəfiqəsi ilə birlikdə çəkdirdiyi fotosessiyanı paylaşmışdır. Şəkillərdən birində uşaqlar milli vışıvanka geyimində dayanmış, digərində isə Pasıçnik tarlada qız uşağını qucaqlamışdır. Fotoqraf bu fotosessiyanı "Shutterstock" saytına da yerləşdirmiş və şəkillərə ingilis dilində "Uşaqlar Ukraynaya dəstək istəyirlər" başlığını vermişdir. Bununla belə, məhz həmin uşaqların təsvir olunduğu fotolar sonradan işğal olunmuş Xerson şəhərində "Rusiya burada həmişəlikdir" şüarı ilə hazırlanmış reklam lövhələrində istifadə edilmişdir.[1]
Bir neçə həftə sonra "Xerson.ru" adlı Rusiya tərəfdarı nəşr üzərində "Rusiya burada həmişəlikdir!", "Xerson — həmişəlik Rusiya ilə!", "Xerson — rus şəhəridir" kimi şüarlar yazılmış reklam lövhələrinin şəkillərini dərc etmişdir. Həmin materiallarda Anna Pasıçnikin fotoları dəyişdirilmiş formada təqdim olunmuşdur. Uşaqların arxasında Rusiya bayrağı təsvir olunmuş, tarla isə çiçəkli çəmənliklə əvəz edilmişdir. Fotoqraflar arasında yayılan söhbətlərdən Pasıçnik öyrənmişdir ki, onun şəkillərindən təbliğat məqsədilə reklam lövhələrində istifadə olunmuşdur. O, "Shutterstock" vasitəsilə çəkdiyi şəkillərin satışından cəmi 20 sent gəlir əldə etmişdir və bildirmişdir ki, əgər həmin fotoları Rusiya hakimiyyəti nümayəndələrinin alacağını bilsəydi, onları heç bir məbləğ qarşılığında satmazdı.[1]
"BBC"-nin rusca xidməti xəbər vermişdir ki, fotoqrafın uşağının təsvir olunduğu reklam lövhələri Xerson şəhərində 18 iyul 2022-ci ildən sonra yerləşdirilmişdir. Ümumilikdə oxşar üslubda üç reklam lövhəsi hazırlanmışdır. Nəşr Anna Pasıçnikin şəkillərindən istifadə olunmuş reklam lövhələrini həmçinin, Novaya Kaxovkada da aşkar etmişdir. 24 avqust 2022-ci ildə — Ukraynanın Müstəqillik Günündə Anna Pasıçnik "Instagram" hesabında paylaşım edərək Xersonun işğal altında olduğu bir vaxtda onun şəkillərindən təbliğat məqsədilə istifadəyə açıq şəkildə etiraz etmişdir.[1]
- ↑ 1 2 3 Анастасия Платонова, Святослав Хоменко. "Украинка обнаружила свою фотографию с детьми в вышиванках на билборде в поддержку аннексии Херсона". Русская служба Би-би-си. 26 avqust 2022. İstifadə tarixi: 12 noyabr 2022.