Rusiya Federasiyası Ali Məhkəməsinin Plenumu (lat. plenum — "tam") — Rusiya Federasiyası Ali Məhkəməsinin bütün hakimlərinin yığıncağından ibarət olan kollegial orqan. Plenum ədliyyə (mühakimə) fəaliyyətini birbaşa həyata keçirmir, lakin qanunların məhkəmələr tərəfindən düzgün və vahid qaydada tətbiqini təmin edir, qəbul etdiyi qərarlar vasitəsilə hüquq normalarının izahını və şərhini verir.
Rusiya Federasiyası Ali Məhkəməsinin Plenumu Ali Məhkəmənin sədri, sədr müavinləri və Ali Məhkəmənin üzvlərindən (hakimlərindən) ibarət tərkibdə fəaliyyət göstərir.
Plenumun iclaslarında Ali Məhkəmə sədrinin dəvəti ilə Baş prokuror, ədliyyə naziri, hakimlər, Ali Məhkəmə yanındakı Elmi-məsləhət şurasının üzvləri, nazirliklərin, dövlət komitələrinin, idarələrin, elmi müəssisələrin və digər dövlət və ictimai təşkilatların nümayəndələri iştirak edə bilərlər.
Plenumun səlahiyyətlərinə aşağıdakılar daxildir:
- Məhkəmə təcrübəsinin və məhkəmə statistikasının öyrənilməsi və ümumiləşdirilməsi materiallarına, habelə Rusiya Federasiyasının Baş prokurorunun və RF Ədliyyə nazirinin təqdimatlarına baxır və məhkəmə təcrübəsi məsələləri üzrə məhkəmələrə izahatlar verir; məhkəmələrə izahatların verilməsi məsələləri müzakirə edilərkən RF tərkibindəki respublikaların ali məhkəmə sədrlərinin, diyar, vilayət, federal əhəmiyyətli şəhər məhkəmələri, muxtar vilayət və muxtar dairə məhkəmələri, habelə hərbi məhkəmə sədrlərinin məhkəmə təcrübəsi haqqında məlumatlarını dinləyir;
- RF Ali Məhkəməsi sədrinin təqdimatı ilə RF Ali Məhkəməsinin hakimləri sırasından məhkəmə kollegiyalarının tərkibini və Ali Məhkəmə Plenumunun katibini təsdiq edir;
- RF Ali Məhkəməsi sədrinin təqdimatı ilə RF Ali Məhkəməsi yanındakı Elmi-məsləhət şurasını təsdiq edir;
- RF Ali Məhkəməsinin səlahiyyətlərinə aid məsələlər üzrə qanunvericilik təşəbbüsü qaydasında RF Dövlət Dumasına təqdimatların verilməsi məsələlərinə baxır və həll edir;
- RF Ali Məhkəməsi Rəyasət Heyətinin işi haqqında məlumatları, Apelyasiya kollegiyası və Ali Məhkəmənin digər məhkəmə kollegiyalarının sədrlərinin kollegiyaların fəaliyyəti haqqında hesabatlarını dinləyir;
- RF Ali Məhkəməsi Plenumunun izahatlarının (və ya RF ərazisində qüvvədə olan SSRİ Ali Məhkəməsi Plenumunun izahatlarının) RF qanunvericiliyinə və ya Ali Məhkəmə Plenumunun qərarlarına müvafiq gəlməməsi barədə Ali Məhkəmə sədrinin təqdimatlarına baxır;
- Qanunvericiliklə ona verilmiş digər səlahiyyətləri həyata keçirir.[1][2]
- ↑ "Rusiya Federasiyasının "Məhkəmə sistemi haqqında" Federal Konstitusiya Qanunu" (rus). Rusiya Federasiyasının Konstitusiyası (Rəsmi portal).
- ↑ Lebedev, V. M. Kommentariy k Federalnomu konstitutsionnomu zakonu "O sudebnoy sisteme Rossiyskoy Federatsii" (rus). Norma. 2015.