Bu məqalədə heç bir məlumatın mənbəsi göstərilməmişdir. |
Ramiz Duyğun (tam adı: Ramiz Məmməd oğlu Məlikov; 10 fevral 1938, Güdəcühür, Sabirabad rayonu) — şair, publisist, 1988-ci ildən Azərbaycan Yazıçılar Birliyinin üzvü.
| Ramiz Duyğun | |
|---|---|
| Ramiz Məmməd oğlu Məlikov | |
| Doğum tarixi | 10 fevral 1938 (87 yaş) |
| Doğum yeri | |
| Fəaliyyəti | ssenarist, şair |
1938-ci il fevralın 10-da Azərbaycanın Əli Bayramlı (indiki Şirvan) rayonundakı Güdəcühür kəndində anadan olmuşdur. Burada ibtidai, Axtaçıda yeddiillik məktəbi bitirmişdir (1945-1952). Bir il kolxozda işləmişdir. Əli Bayramlı şəhərində orta təhsil almışdır (1953-1956). N.Nərimanov adına Azərbaycan Dövlət Tibb İnstitutunu bitirmişdir (1956-1962). Şimali Qafqaz hərbi dairəsində müəyyən kurs keçdikdən sonra Belorusiya hərbi dairəsində (1962-1971), sonra Zaqafqaziya hərbi dairəsində (1971-1978) xidmət etmişdir. N.Nərimanov adına Azərbaycan Dövlət Tibb İnstitutunun xüsusi hazırlıq kafedrasında müəllim (1978-1985), şöbə rəisi (1985-1990) olmuşdur.
Hazırda ehtiyatda olan tibb xidməti polkovnikidir. Bədii yaradıcılığa kiçik yaşlarından meyl göstərmiş, lakin ilk mətbu şeiri "Yaşa, Azərbaycanım" "Gəncliyin səsi" almanaxında dərc edilmişdir (1959). Bundan sonra dövri mətbuatda, radio və mavi ekranda müntəzəm çıxış edir. "Hünər" televiziya verilişinin müəlliflərindən biri və aparıcısıdır. Gənclərin hərbi vətənpərvərlik tərbiyəsi işində fəal çalışır. Bədii tərcümə ilə də məşğul olur. "Vətən-beşiyim mənim" (1985) oçerklər məcmuəsinin tərtibçilərindən və müəlliflərindən biridir. "Əbədiyyətdən gələn məktub" mənzum pyesi mavi ekranda nümayiş etdirilmişdir (1977). "Ağ atlı oğlanın nağılı (iki hissəli) ssenarisi əsasında sənədli film çəkilmişdir (1985). Azərbaycan Ensiklopediyasında "Xatirə" kitabı redaksiyası rəhbərinin müavini vəzifəsində işləmişdir (1989-1991).
- Vətən kimi şirin. Bakı: Yazıçı, 1983, 104 səh.
- Vətən beşiyim mənim. Bakı: Azərnəşr, 1985, 150 səh. (şərikli)
- Mənim unudulmaz məktəbim... Bakı: Yazıçı, 1986, 96 səh.
- Göy üzü damar-damar. Bakı: Yazıçı, 1987, 134 səh.
- Anatoli Tutık. Onlar başqa cür edə bilməzdilər (sənədli povest). Bakı: Yazıçı, 1988, 224 səh.
- Cəmşid Naxçıvanski (film, 1982)
- Ağ atlı oğlan haqqında nağıl (film, 1986) (qısametrajlı sənədli film)