Ramiz Dəniz (Ramiz Əli oğlu Qasımov, (26 iyul 1965, Bakı) — yazıçı, Azərbaycan Yazıçılar Birliyinin üzvü (1999), Prezident təqaüdçüsü, "Qızıl qələm" mükafatı laureatı.
| Ramiz Dəniz | |
|---|---|
| Doğum adı | Ramiz Qasımov |
| Doğum tarixi | |
| Doğum yeri | Bakı, Azərbaycan |
| Fəaliyyəti | yazıçı |
| Üzvlüyü | Azərbaycan Yazıçılar Birliyi |
Qasımov Ramiz Əli oğlu 1965-ci il iyul ayının 26-da Bakı şəhərində anadan olub. 1983-cü ildə Nizami rayonu 62 nömrəli orta məktəbi bitirib, 1984–1986-cı illərdə Stavropol diyarında SSRİ Silahlı Qüvvələrində hərbi xidmət keçib. 1988-ci ildən ARDNŞ-nın (SOCAR) Heydər Əliyev adına Neft Emalı Zavodunda işləyir.[1]
1993–1996-cı illərdə Qarabağ uğrunda gedən Birinci Qarabağ müharibəsində iştirak edib.
1994-cü ildən Azərbaycan Vətən müharibəsi Veteranları Birliyinin, 2003-cü ildən "Təhsil", 2013-cü ildən "Coğrafiya" cəmiyyətlərinin, 2012-ci ildən AQRA Elmin İnkişafına Dəstək İctimai Birliyinin üzvüdür.[2]
Ramiz Dəniz ədəbi və elmi yaradıcılığa 1981-ci ildən başlayıb. Yazıçı bədii ədəbiyyatın bir neçə janrında və elmi əsərlər də yazır. Ömrünün 44 ildən çox hissəsini coğrafi kəşflər tarixinə həsr etmiş, bir neçə elmi-tədqiqat əsəri ingilis və rus dillərinə tərcümə olunmuşdur. Əsərlərində Braziliyanın və ümumilikdə Amerika qitəsinin kəşf edilməsini əsərlərində göstərmişdir.
Tərcümələrlə birlikdə (alman, fransız, rus, ingilis, italyan, ispan, portuqal, holland və polyak) elmi-populyar, elmi-tədqiqat, bədii-tarixi, publistik-biblioqrafik, bədii-tarixi-macəra, melodrama, faciə janrında nəşr olunan 477 kitabı nəşr olunub (432-si Almaniyada, 15-i Uruqvayda və 30-u ABŞ-də). Kitabları dünyanın 100-ə yaxın ölkəsində yayımlanmışdır.
Yazıçının kitabları "Lap Lambert academica publishing", "AV Akademiker-verlag", "Verlag Unser Wissen", "Sciencia Scripts", "Editions universitaires europeennes", "Editions Not-re Savoir", "Qlobe Edit", "Wydawnictwo Bezkresy Wiedzy", "Wydawnictwo Nasza Wiedza", "Edizioni Accademiche Italiane", "Edizioni Sapienza", "Novas Edições Acadêmicas", "Edições Nosso Conhecimento" "Palmarium Academic Publishing", "Uitgeverij Onze Kennis", "Editorial Akademica Espanola", "Ediciones Nuestro Conocimiento", "Our Knowledge Publishing", "JustFiction Edition", "Scholars' Press", "Amazon" nəşriyyatlarında işıq üzü görüb.
Ramiz Dəniz "Kredo", "Vışka", "Həqiqət naminə", "Açıq söz", "Bakı-Ceyhan", "Təzadlar", "Fədai" və b. qəzetlərdə ədəbiyyat, elm, publisistika ilə bağlı yazılarla çıxış edir, 2005-ci ildə "Uzaq sahillərdə" beynəlxalq ictimai-publistik jurnalın redaktoru olub.
- "Qızıl qələm" mükafatı (2005)
- Prezident təqaüdçüsü (2009)
- Beynəlmiləl Yazıçılar İttifaqının 3 nominasiya üzrə – Tarixi roman, Publisistika və Uşaq Ədəbiyyatı janrı üzrə Beynəlxalq Ədəbiyyat Sülh mükafatı (2020)
- Beynəlmiləl Yazıçılar İttifaqının Tarixi roman üzrə Qran-pri mükafatı laureatının medalı (2021)
- ↑ Əhmədov, T. XX əsr Azərbaycan yazıçıları. Ensiklopedik məlumat kitabı (təkmilləşdirilmiş üçüncü nəşr) /red.: Nərgiz Rüstəmli; rəy.: Mirzə İbrahimov, Məmməd Cəfər Cəfərov, Kamal Talıbzadə. – "Nurlar" NPM, Bakı, 2004. – 984 s. səh. 720–721
- ↑ Əhmədov, T. Azərbaycan yazıçıları (XX–XXI yüzillikdə). Ensiklopedik məlumat kitabı (təkmilləşdirilmiş dördüncü nəşr) /red.: Nərgiz Qurbanova, naşir: Hacı İsmail Allahverdi. – "Nurlar" NPM, Bakı, 2011. – 1056 s. səh. 760