Rəssamlıq

Rəssamlıq — təsviri incəsənətin ən qədim növlərindən biridir. Sərt və yumşaq kətan üzərində rənglərin çəkilməsi, rəqəm texnologiyası və xüsusi texnologiyalarla real predmet və canlıya oxşar vizual təsvirlərin yaradılması ilə bağlıdır. Rəssamları digər sənət adamlarından fərqləndirən bir çox xüsusiyyətlər var. Ən əsası isə odur ki, onlar gözlə görünməyən obrazları belə cızırlar^[1].

Rəssamlıqda real aləmin həcmi, rəngi, məkanı, əşyaların maddi forması, işıq və hava mühiti və s. kimi gözlə qavranılan, obyektiv surətdə mövcud olan əlamətlər canlandırılır. Rəssamlıq sənətinin əsas əlamətləri obrazlıq və emosionallıqdır. Bu əsərlərin obrazları ideya və mövzunun, süjet və xarakterlərin vəhdətinə əsaslanır. Bədii obrazın bu komponentləri rəsm, kompozisiya, kolorit, işıq-kölgə, perspektiv, ritm kimi təsvir və ifadə vasitələri ilə konkretləşdirilir.

Rəssamlıq sənəti, bədii-estetik funksiyaların çoxcəhətliliyi ilə bağlı müxtəlif növlərə bölünür:

• monumental rəssamlıq;
• dekorativ rəssamlıq;
• teatr-dekorativ rəssamlıq;
• miniatür rəssamlıq;
• dəzgah rəssamlığı.

Hər növün özünəməxsus texniki ifadə üsulları və materialları var. Rəssamlığın ən geniş yayılmış forması dəzgah rəssamlığıdır. Kətan və ağac üzərində yağlı boyalarla çəkilən belə əsərlər "molbert" adlanan xüsusi dəzgahda yaradılır. Üzərində əsasən yağlı boya ilə çəkilir. Yağlı boya ilə yanaşı, rəssamlıqda tempera, pastel, akvarel, quaş texnikaları da tətbiq edilir. Monumental rəssamlıq əsərlərindən fərqli olaraq, dəzgah rəssamlığı əsərləri sərbəst olub, istənilən yerdə asıla bilər.

Məzmun etibarilə rəssamlıq sənəti bu janrlara bölünür*

• tarixi rəssamlıq;
• mifoloji rəssamlıq;
• məişət rəssamlığı;
• portret rəssamlığı;
• mənzərə rəssamlığı;
• natürmort rəssamlığı və s.