Rəşad əl-Alimi

Rəşad əl-Əlimi 15 yanvar 1954-cü ildə Taiz qubernatorluğunun Əl-Əlum kəndində anadan olub, hakim Məhəmməd bin Əli əl-Əliminin oğludur.^[1] O, 1969-cu ildə Sənadakı Camal Abdel Nasir adına orta məktəbi bitirib. Daha sonra o, 1975-ci ildə Küveyt Polis Kollecində hərbi elmlər üzrə bakalavr dərəcəsi, 1977-ci ildə Səna Universitetində incəsənət üzrə bakalavr dərəcəi, 1984–1988-ci illər arasında Misirdəki Ayn Şəms Universitetində sosiologiya üzrə magistr və doktorluq dərəcəsi alıb.^[2]

Ümumi Xalq Konqresinin üzvü olan Rəşad əl-Əlimi 2001-ci ildən 2008-ci ilə qədər Daxili İşlər naziri olub. O, 2008-ci ilin may ayında Ali Təhlükəsizlik Komitəsinin sədri və müdafiə və təhlükəsizlik işləri üzrə Baş nazirin müavini olub, daha sonra Yəmən Milli Dialoq Konfransının üzvü, 2014-cü ildə isə Prezident Əbdrabbuh Mənsur Hadinin müşavir təyin edilib

2011-ci il 3 iyun tarixində Səna döyüşü zamanı əl-Alimi Prezident sarayındakı Ən-Nəhdin məscidinə edilən hücum zamanı Əli Abdullah Salehlə birlikdə yaralanmışdı. O, müalicə üçün Səudiyyə Ərəbistanına və Almaniyaya köçürüldü, 13 iyun 2012-ci ildə Sənaya qayıtmışdır. Yəməndə Husilərin hakimiyyəti ələ keçirməsi nəticəsində o, yenidən şəhəri tərk etdi və 2015-ci ildə Səudiyyə Ərəbistanında yaşamağa başladı.

Əl-Alimi 7 aprel 2022-ci ildə Prezident Hadi tərəfindən verilmiş fərmanla Yəmən prezidentinin səlahiyyətlərini öz üzərinə götürən qurum olan Prezidentlik Liderlik Şurasının sədri olmuşdur. Hadi öz səlahiyyətlərini geri dönüşü olmayan şəkildə şuraya ötürmüşdür. Yəmən və Səudiyyə Ərəbistanı hökumətlərindəki bir çox mənbələr bildiriblər ki, həmin vaxt Səudiyyə Ərəbistanında yaşayan Hadi hakimiyyəti Əlimiyə təhvil verməyə məcbur edilmişdir.

2024-cü il 27 avqustda əl-Alimi Yəmənin üçüncü böyük şəhəri olan Təizə ilk rəsmi səfərini edərək, şəhərin husilərin nəzarətində olan ərazilərini azad etməyə, həmçinin ona təsir edən doqquzillik husi mühasirəsinə son qoymağa söz vermişdir. O, həmçinin şəhərdə enerji təchizatı kimi əsas xidmətləri bərpa edəcəyinə və ya təkmilləşdirəcəyinə söz verdi və Səudiyyə Ərəbistanının Yəmən üçün İnkişaf və Yenidənqurma Proqramının maliyyələşdirilməsi ilə 30 meqavatlıq elektrik stansiyası, Taiz Universitetində tibb məktəbi, təhsil kompleksi və Heycət əl-Əbəd marşrutu boyunca təkmilləşdirilmiş yollar kimi bir neçə planlaşdırılan layihəni açıqlamışdır.

Rəşad əl-Alimi hakimiyyəti gücü hökumətyönlü qüvvələr daxilindəki bölünmələr səbəbindən zəifləyir. 2025-ci ilin dekabrında Birləşmiş Ərəb Əmirliklərinin dəstəklədiyi Cənub Keçid Şurası (STC) hökumətin nəzarətində olan ərazilərin böyük bir hissəsini ələ keçirdi. Əvvəllər sahilboyu bölgələrdə cəmlənmiş STC qüvvələri, Hadramaut əyalətinin şimalındakı, neft yataqlarını əhatə edən və Səudiyyə sərhədinə qədər uzanan əraziləri heç bir real müqavimətlə qarşılaşmadan ələ keçiriblər. Məqsəd Müsəlman Qardaşlığı ilə əlaqəli kimi təqdim edilən bir qəbilə liderini və ona bağlı qüvvələri devirmək idi. Bunun nəticəsi olaraq hərəkat nəzarətini qonşu Omanla həmsərhəd olan Mahra qubernatorluğuna qədər genişləndirdi. İndi o, keçmiş Cənubi Yəmənin bütün ərazisinə nəzarət etdiyini iddia edir ki, bu da müstəqillik elan edilməsi ilə bağlı narahatlıqları artırır.