Rüstəm Mürsəlov

Rüstəm Mürsəlov 1 iyul 1956-cı ildə Xaçmaz rayonunun Balaqusarqışlaq kəndində anadan olub O, məktəb illərindən etibarən yüksək çalışqanlığı və intizamı ilə fərqlənmişdir. 1973-cü ildə orta məktəbi başa vurduqdan sonra Rusiya Federasiyasının Müdafiə Nazirliyinin Hərbi Universitetinin Maliyyə və İqtisadiyyat fakültəsinə qəbul olmuş, 1976–1980-ci illərdə isə Yaroslavl Ali Hərbi Maliyyə Məktəbində təhsil alaraq maliyyə sahəsində hərbi kadr kimi formalaşmışdır.^[1]

Hərbi xidmətə 1976-cı ildə SSRİ Silahlı Qüvvələrində zabit olaraq başlamış, 1980–1983-cü illərdə tank alayının, 1983–1985-ci illərdə isə rabitə alayının maliyyə xidməti rəisi vəzifələrində çalışmışdır.^[2]

Xidməti müddətində Rüstəm Mürsəlova 1980-ci ildə leytenant, 1985-ci ildə kapitan, 1988-ci ildə mayor, 1992-ci ildə polkovnik-leytenant və 1994-cü ildə polkovnik rütbələri verilmişdir. 1984–1989-cu illərdə SSRİ Silahlı Qüvvələrinin tərkibində Əfqanıstan müharibəsində iştirak etmişdir.^[3] Müharibədəki xidmətləri Əfqanıstan prezidenti Məhəmməd Nəcibulla tərəfindən yüksək qiymətləndirilmiş və 1988-ci ildə "Beynəlmiləlçi döyüşçüyə minnətdar əfqan xalqından" medalı ilə təltif olunmuşdur. Onun müharibədəki göstərdiyi fədakarlıq SSRİ rəhbərliyinin də nəzərindən qaçmamış və 1988-ci ildə SSRİ Ali Soveti Rəyasət Heyəti tərəfindən ona "Beynəlmiləlçi döyüşçüyə" döş nişanı ilə təltif edilmişdir.^[2]

1991-ci ildə Birinci Qarabağ müharibəsinin başlanması ilə Rüstəm Mürsəlov doğma torpağını qorumaq məqsədilə Vətəninə qayıdaraq Azərbaycan Silahlı Qüvvələrində xidmət etməyə başlamışdır. Onun bu xidməti yalnız döyüş meydanında göstərdiyi şücayət ilə məhdudlaşmayıb; o, həmçinin ordunun maliyyə sisteminin yaradılması və inkişaf etdirilməsi sahəsində də mühüm töhfələr vermişdir.^[4][2]

Rüstəm Mürsəlov 1992–2005-ci illərdə Müdafiə Nazirliyinin maliyyə strukturlarında müxtəlif vəzifələrdə çalışmışdır. O, şöbə rəisi, baş mühasib, qarnizonun maliyyə xidmətinin rəisi, maliyyə xidmət rəisinin müavini, maliyyə xidmət rəisi, maliyyə kafedrasının rəisi və inspektor kimi fəaliyyət göstərmişdir. Bu vəzifələri icra edərkən Rüstəm Mürsəlov ordunun maliyyə təminatının və xidmətlərinin səmərəli təşkili və idarə olunmasında, həmçinin ordumuzun maliyyə sisteminin qanunvericilik bazasının formalaşdırılmasında və hərbi qulluqçuların maddi-məsuliyyəti haqqında qanunun hazırlanmasında iştirak etmişdir.^[2]

Polkovnik Rüstəm Mürsəlov həmçinin qoşunların maliyyə təminatı və maliyyə-təsərrüfat fəaliyyətinə nəzarət sahəsində tədris prosesinin inkişafında xüsusi töhfələr vermişdir. O, 1996-cı ildə 3-cü kurs, 1997-ci ildə isə 4-cü kurs kursantları üçün hərbi təcrübə proqramlarını hazırlamışdır. Əlavə olaraq 1997-ci ildə "Pul müavinətləri və əmək haqqı xərclərinin auditinin təşkili və aparılması" adlı tədris-metodiki vəsaitin müəllifi olmuşdur.^[2][4]

O, SSRİ Silahlı Qüvvələrindəki xidmətlərinə görə 1985-ci ildə 3-cü dərəcəli, 1990-cı ildə 2-ci dərəcəli və daha sonrasında 1-ci dərəcəli "Qüsursuz xidmətə görə" medalı, 1988-ci ildə 2-ci dərəcəli "Hərbi xidmətdə fərqlənməyə görə" medalı, 1986-cı ildə "Döyüş xidmətlərinə görə" medalına layiq görülüb. 1988-ci ildə "Beynəlmiləlçi döyüşçüyə" döş nişanı, o cümlədən müxtəlif vaxtlarda "Cənub qüvvələri qrupu" döş nişanı və "SSRİ Silahlı Qüvvələrinin 70 illiyi" yubiley medalı ilə təltif olunub.^[3]

Polkovnik Mürsəlov Azərbaycan Silahlı Qüvvələrindəki xidmətlərinə görə isə 2013-cü ildə "Azərbaycan Respublikası Silahlı Qüvvələrinin 95 illiyi (1918–2013)" və "Azərbaycan Respublikasi Silahlı Qüvvələrinin 90 illiyi (1918–2008)" yubiley medalları ilə təltif edilib.^[3]

Rüstəm Mürsəlov 2005-ci ildə hərbi xidməti başa vurduqdan sonra "Azəroksigen" ASC-nin direktoru və daha sonra Azərbaycan Xəzər Dəniz Gəmiçiliyində Mühafizənin Komanda Rəisi vəzifələrində çalışıb.^[2]

Həmin dövrdə elmi fəaliyyətini davam etdirən Rüstəm Mürsəlov 50-yə yaxın elmi məqalənin müəllifi olmuş və ali məktəblər üçün 3 metodik vəsait hazırlamışdır. O, eyni zamanda maliyyə savadlılığının artırılması və insan kapitalının gücləndirilməsi sahəsində bir sıra mühüm layihələr və tədqiqatlar həyata keçirmişdir.^[2]

O, maliyyə sahəsindəki qabaqcıl praktikaları öyrənərək, yerli kadrların beynəlxalq standartlara uyğun yetişdirilməsi məqsədilə müvafiq strategiyalar hazırlamışdır. Bu prosesdə beynəlxalq maliyyə idarəetmə modelləri, müasir büdcə planlaşdırma metodologiyaları və risklərin idarə olunması prinsipləri əsasında təhlillər aparmış və əldə etdiyi nəticələri yerli tədris sisteminə inteqrasiya etmişdir.^[2]

2014-cü ildə o, maliyyə idarəetməsinin təkmilləşdirilməsi ilə bağlı tədqiqata rəhbərlik etmişdir. Bu tədqiqat çərçivəsində bir qrup alimlə birlikdə maliyyə idarəetməsindəki mövcud problemlər təhlil olunmuş, eyni zamanda müasir iqtisadi şəraitə uyğun strategiyalar və təkliflər hazırlanmışdır.^[2]

Bu sahədə hazırladığı elmi işlər və təlim materialları peşəkar maliyyə menecerlərinin yetişdirilməsinə mühüm töhfə vermiş və müxtəlif qurumlarda maliyyə idarəetmə mexanizmlərinin təkmilləşdirilməsi prosesində istifadə olunmuşdur.^[2]

Rüstəm Mürsəlov 11 iyun 2018-ci ildə Bakıda vəfat etmiş və doğulduğu Xaçmaz rayonunun Balaqusarqışlaq kənd qəbiristanlığında dəfn olunmuşdur.^[1]