Rübail Nəcəf oğlu Allahverdiyev 21 may 1940-cı ildə Gəncədə anadan olmuşdur. Burada 6 saylı orta məktəbi bitirmişdir. 1959-1964-cu illərdə Azərbaycan Kənd Təsərrüfatı İnstitutunun (indiki Azərbaycan Dövlət Aqrar Universiteti) Baytarlıq fakültəsində təhsil almışdır. Təhsilini bitirdikdən sonra institutda iki il komsomol katibi işləmiş, daha sonra 1966-1969-cu illərdə aspiranturada oxumuşdur. “Kadr uğrunda” qəzetinin redaktoru, 1971-1975-ci illərdə AKTİ-də partiya komitəsinin katibi vəzifələrində çalışmışdır. 1970-ci ildə “Camışlarda sərbəst və zülal təbiətli amin turşularının ontogenezdə dəyişməsi” mövzusunda namizədlik dissertasiyası müdafiə edərək biologiya elmləri namizədi adını almışdır.

1976-cı ildə AKTİ-nin dosenti elmi adını almışdır. 1982-ci ildən Azərbaycan Yazıçılar Birliyinin üzvüdür. 2010-cu ildə Azərbaycan Dövlət Aqrar Universitetinin (ADAU) Yoluxmayan xəstəliklər kafedrasının professoru adına layiq görülmüşdür. Universitetdə müxtəlif vəzifələrdə çalışmışdır.

Yaradıcılığa 1961-ci ildə “Kadr uğrunda” qəzetində dərc olunan “Yaylım atəşi” şeiri ilə başlamışdır. Həmin dövrdən baçlayaraq Azərbaycan mətbuatında davamlı olaraq şeirləri ilə çıxış etmişdir.

Rübailin “Sübhə yaxın” (1966), “Bir işıqlı yol üstəyəm” (1977), “Gecələr yuxusu qaçar qızların” (1983), “Getmişdim günəşi yola salmağa” (1988), “Ömrün fəsilləri” (2000), “İldırımötürən” (2000), “Altı məzar, üstü bazar dünyamız” (2000), “Zamanla əlbəyaxa” (2003), “Dünya dəlilərin şənlik evidi” (2005), “Tələsdikcə gecikirəm” (2008), “Sahilsiz çaya körpü” (2014), “Rübailər” (2015) adlı şeirlər və poemalar kitabı nəşr olunmuşdur.

• Sübhə yaxın (Şeirlər). Bakı: Azərnəşr, 1966, 34 s.
• Bir işıqlı yol üstəyəm (Şeirlər). Bakı: Gənclik, 1977, 56 s.
• Gecələr yuxusu qaçar qızların (Şeirlər və poema). Bakı: Yazıçı, 1983, 82 s.
• Getmişdim günəşi yola salmağa (Şeirlər). Bakı: Yazıçı, 1988, 98 s.
• Ömrün fəsilləri. Gəncə: Agah, 2000, 238 s.
• İldırımötürən (Poemalar). Gəncə, Agah, 2000, 66 s.
• Altı məzar, üstü bazar dünyamız (Şeirlər). Gəncə, Ekologiya, 2000, 360 s.
• Zamanla əlbəyaxa (Şeirlər). Bakl: Gənclik, 2003, 225 s.
• Dünya dəlilərin şənlik evidi. Bakı: Nurlan, 2005, 206 s.
• Tələsdikcə gecikirəm. Bakı: Nurlan, 2008, 251 s.
• Sahilsiz çaya körpü. Bakı: Elm və təhsil, 2014, 287 s.
• Rübailər. Moskva: Yayın yeri yoxdur, 2015, 288 s.

• Pataloji fiziologiyadan təcrübə məşğələləri (dərs vəsaiti). Kirovabad: AKTİ nəşri, 1976, 95 s.
• Kənd təsərrüfatı heyvanlarının pataloji fiziologiyası (dərs vəsaiti). Kirovabad: AKTİ nəşri, 1987, 61 s.

• Elmi-pedaqoji fəaliyyətinə görə ona “Əməkdar müəllim” Fəxri adı verilmişdir.
• “Tələsdikcə gecikirəm” (2008) kitabına görə beynəxalq Rəsul Rza mükafatına layiq görülmüşdür.

2017-ci ilin oktyabr ayının 29-da Gəncədə vəfat etmişdir.