Quba Dövlət Dram Teatrı — Azərbaycanda fəaliyyət göstərmiş dram teatrlarından biri.
Abbasqulu ağa Bakıxanovun adını daşımış Quba Dövlət Dram Teatrı 1940-cı illərin əvvəllərindən 1962-ci ilə qədər Azərbaycanın Quba rayonunda fəaliyyət göstərmiş mədəniyyət müəssisəsidir. Teatr fəaliyyət göstərdiyi dövr ərzində regionun mühüm mədəniyyət ocaqlarından biri hesab olunmuşdur.
Qubada peşəkar teatr sənətinin əsası Sovet dövründə, 1940-cı ildə qoyulmuşdur. Müəssisə fəaliyyətə başladığı ilk illərdə "Kolxoz-Sovxoz Teatrı" statusu ilə fəaliyyət göstərmişdir. 1946-cı ildə teatrın statusu yüksəldilərək Dövlət Dram Teatrına çevrilmiş və həmin il müəssisəyə görkəmli Azərbaycan alimi və maarifçisi Abbasqulu ağa Bakıxanovun adı verilmişdir.
Teatrın peşəkar bir sənət ocağı kimi formalaşmasında və qısa müddətdə inkişaf etməsində görkəmli teatr xadimi, istedadlı aktyor və rejissor İsa Musayevin müstəsna xidmətləri olmuşdur. Onun teatra direktor və bədii rəhbər təyin olunması kollektivin yaradıcılıq intizamının güclənməsinə, repertuarın zənginləşməsinə və tamaşaların bədii keyfiyyətinin artmasına ciddi təkan vermişdir.
Teatrın truppasında müxtəlif illərdə Azərbaycanın və qonşu respublikaların incəsənət tarixində mühüm iz qoymuş Səyavuş Aslan, Düriyyə Rəhimova, Ofeliya Əfqanlı, Məcnun Hacıbəyov, Ağakişi Kazımov, Cəlil Bağdadbəyov, Yusif Yulduz, eləcə də Mustafa Süleymanov, Məmməd Əhmədov, Gülsüm Fərəczadə, Cavanşir Əhmədov, Metetya Ruvinov, Əli Cəfərov və Məmmədağa Rzayev kimi tanınmış sənətkarlar çıxış etmişlər.
Quba teatrı paytaxtın mədəniyyət ocaqları ilə də sıx əməkdaşlıq etmişdir. Bakı teatrlarından dəvət olunan peşəkar rejissor və aktyorlar burada mükəmməl səhnə əsərlərinin ərsəyə gəlməsində yaxından iştirak etmişlər. Müxtəlif dövrlərdə Tofiq Kazımov, Ağaəli Dadaşov və Miryusif Manafov teatrda bir sıra tamaşalara quruluş verərək, yerli truppanın peşəkar inkişafına töhfə vermişlər.
Müəssisə 1962-ci il noyabrın 2-də rəsmi olaraq fəaliyyətini dayandırmışdır. Teatrın bağlanması ilə bağlı müxtəlif mülahizələr mövcuddur. Şahidlərin və dövrün aktyorlarının xatirələrinə əsasən, bağlanma prosesində daxili münaqişələrin və subyektiv amillərin rol oynadığı ehtimal edilir. Teatrın aktrisası Düriyyə Rəhimovanın xatirələrinə görə, kollektiv daxilində millətlərarası gərginlik (erməni əsilli, Anik ləqəbli Anaida Şaginyan adlı aktrisanın yaratdığı qalmaqallar) və yaradıcı heyət arasında baş verən mübahisələr teatrın idarəçiliyinə mənfi təsir göstərmişdir. Xüsusilə, baş rolların bölüşdürülməsi və yaradıcı əməyin qiymətləndirilməsi ilə bağlı yaranan narazılıqlar rəhbərlik səviyyəsində həllini tapmamış, bu da müəssisənin fəaliyyətinin dayandırılmasına zəmin yaradan amillərdən biri kimi göstərilmişdir.
- Fazil, Şahin. Mahmudov, Yaqub; Mustafazadə, Tofiq (redaktorlar ). Quba tarixi (az.). Bakı: "TEAS Press Nəşriyyat evi". 2016. səh. 487-492.