Qot submədəniyyəti

Qot (ing. Goth) – 1980-ci illərin əvvəllərində Birləşmiş Krallıqda ortaya çıxan və musiqiyə əsaslanan bir submədəniyyətdir. Postpank musiqi janrının bir qolu olan qotik rok pərəstişkarları tərəfindən yaradılmışdır. Qot adı birbaşa musiqi janrından götürülüb. Qotik rok janrını ifa edən və qotik subkulturanın formalaşmasında və inkişafında böyük əməyi olan postpank ifaçılarından bəziləri bunlardır: Siouxsie and the Banshees, Bauhaus, The Cure və Joy Division .

Qot submədəniyyəti öz dövrünün digər submədəniyyətlərinə nəzərən daha uzun müddət populyarlığını qoruyub və bütün dünyaya yayılmaqda davam edir. Onun təsvirlərində və mədəni meyillərində 19-cu əsr Qotika fantastikasından və qorxu filmlərindən təsirlər gözə çarpır.

Qərbi Avropada təşkil olunan musiqi festivalları, gecə klublarında təşkil edilən görüşlər bu üslubun nümayiş olunması məkanları idi. Bu submədəniyyət özlüyündə musiqi, estetika və moda ilə əlaqəli zövqləri cəmləyib.

Qotların üstünlük verdiyi musiqi janrlarına qotik rok, det-rok, soyuq dalğa, qaranlıq dalğa və efir dalğası kimi bir sıra janrlar daxildir.^[1] Submədəniyyət daxilində geyim üslubları siyahısına pank, yeni dalğa və Yeni Romantika kimi moda üslubları vardır. O, həmçinin özündə Viktorian, Edvard və "Belle Epoque" dövrləri kimi keçmiş dövrlərin dəbindən izləri daşıyır. Üsluba ən çox tünd (adətən zil qara) geyim, qara makiyaj və zil qara saç daxildir. Bu submədəniyyət meydana çıxdığı vaxtdan onilliklər sonra da geniş auditoriya tərəfindən maraqla qarşılanmağa davam edir.