Zaur Qasımlı
Doğum tarixi	1 yanvar 1975 (50 yaş)
Doğum yeri	Tiflis, Gürcüstan SSR, SSRİ
Milliyyəti	azərbaycanlı
Vətəndaşlığı	Azərbaycan
Fəaliyyəti	Kinorejissor
Fəaliyyət illəri	2002-cı ildən
İstiqamət	kino, reklam
IMDb	ID5000764

Zaur Elton oğlu Qasımlı (1 yanvar 1975, Bakı) — Azərbaycan kinorejissoru və ssenaristi. Kino, reklam və sənədli film sahələrində uzun illər fəaliyyət göstərmiş, xüsusilə tarixi mövzulu bədii filmləri ilə tanınmışdır. 2025-ci ildə onun Tağıyev: Neft bədii filmi Azərbaycanı 98-ci Oskar mükafatında "Ən yaxşı beynəlxalq bədii film" kateqoriyasında təmsil etmişdir.^[1][2]

Zaur Qasımlı 1 yanvar 1975-ci ildə Tiflis şəhərində anadan olub. 1981-ci ildə Bakı şəhəri, Hövsan qəsəbəsində orta məktəbə başlamış, 1989-cu ildə orta təhsilini başa vurmuşdur. 1989–1992-ci illərdə 31 nömrəli peşə məktəbində təhsil almışdır.

1993–1996-cı illərdə həqiqi hərbi xidmət keçmişdir. Hərbi xidmətdən sonra əmək fəaliyyətinə və yaradıcılıq axtarışlarına davam etmişdir.

1997–2010-cu illərdə Hövsan qəsəbəsində "Chip Club" adlı kompüter oyun salonunu təsis etmişdir. Bu məkan uzun müddət ərzində qəsəbə gəncləri arasında istirahət və ünsiyyət yeri kimi tanınmış, bölgədə kompüter oyun mədəniyyətinin formalaşmasında önəmli rol oynamışdır.

Zaur Qasımlı ailəlidir, üç övladı var.

"Reklam və vizual layihələr"

Zaur Qasımlı yaradıcılıq fəaliyyətinə 2000-ci illərin əvvəllərində televiziya və post-production sahəsində başlamışdır. 2002-ci ildə ANS TV-də montajçı kimi çalışmış, burada televiziya istehsalının texniki və dramaturji əsaslarını mənimsəmişdir. Daha sonra VP Production şirkətində CGI supervisor və vizual effektlər üzrə mütəxəssis kimi fəaliyyət göstərmişdir.

2005-ci ildə "Dinozaur Production" adlı prodakşn studiyasını yaratmışdır. Bu dövrdə o, iri şirkətlər və tanınmış brendlər üçün çoxsaylı reklam çarxları üzərində çalışmışdır. Bank sektoru, energetik içkilər, telekommunikasiya sahəsi və sosial mövzulu video layihələr üçün hazırlanmış işlər televiziya və rəqəmsal platformalarda yayımlanmış, geniş auditoriyaya çatdırılmışdır. Reklam sahəsindəki fəaliyyəti onun vizual dilinin və rejissor yanaşmasının formalaşmasında mühüm rol oynamışdır.

2010–2012-ci illərdə Ultra Production şirkətində post-production supervisor kimi çalışmışdır. 2014-cü ildən etibarən Bakı Media Mərkəzi ilə əməkdaşlığa başlayaraq sənədli və bədii kino layihələri üzərində fəaliyyətini davam etdirmişdir.

"Sənədli və qısametrajlı filmlər"

Reklam sahəsində topladığı təcrübədən sonra Zaur Qasımlı sənədli və müəllif kino işlərinə müraciət etmişdir. Bu mərhələdə çəkdiyi layihələrdə tarixi mövzulara, real faktlara və vizual mühitin qurulmasına xüsusi diqqət yetirilir. Zaur Qasımlı Azərbaycan kino mühitində tarixi mövzulara müraciəti, genişmiqyaslı istehsal yanaşması və vizual detallara diqqəti ilə seçilən rejissor kimi tanınır. Onun ekran işləri Azərbaycan kinosunda iri həcmli tarixi layihələr sırasında yer alır.

Zaur Qasımlının yaradıcılığında əsas yer tutan iş "Tağıyev" adlı dörd hissəli tarixi bədii film layihəsidir. Layihə XIX–XX əsrin sonu və XX əsrin əvvəllərində yaşamış sənayeçi və xeyriyyəçi Hacı Zeynalabdin Tağıyevin həyat və fəaliyyətinə həsr olunmuşdur. Zaur Qasımlı intervyusunda: "İlk növbədə qeyd edim ki, "Tağıyev: Neft" tammetrajlı bədii film olaraq mənim kinoda debütümdür. Çətinliyim ondan ibarət idi ki, bir gedişə bir yox, dörd film çəkməli oldum. Bu çox böyük həcmdir. Şəxsən bir rejissor olaraq mənim üçün problemlərin əsası bununla bağlı idi. Həmçinin film bütün komanda üçün də böyük həcmli bir iş sayılırdı. Onlar da çox böyük bir dəstək göstərdilər. Nəticədə filmi ərsəyə gətirə bildik. Ümumiyyətlə, hər sahədə çətinlik var. Bildiyimiz kimi bu gün Azərbaycanda kino istehsalı istədiyimiz səviyyədə deyil. İstər qrafika, istər geyim, istər rekvizit və ümumiyyətlə insan faktoru ilə bağlı çatışmayan çoxlu cəhətlərimiz var. Bax, belə bir şəraitin içində filmi çəkməyə müvəffəq olduq."…^[3] Filmin beynəlxalq tanıdılması çərçivəsində ekran əsəri ABŞ-ın Los Angeles şəhərində yerləşən "Ross House"^[4] məkanında Hollivud kino sənayesi nümayəndələri üçün nümayiş etdirilmişdir. Tədbirdə 100-dən çox qonaq, o cümlədən "Oskar" mükafatı qazanmış kino rejissorları və tanınmış sənət nümayəndələri iştirak etmişdir. Film nümayişindən sonra rejissor Zaur Qasımlı ilə sual-cavab sessiyası təşkil olunmuşdur. Bu tədbir "Tağıyev" filminin beynəlxalq səviyyədə tanıdılması və Azərbaycan kinosunun xarici auditoriyaya təqdim edilməsi baxımından mühüm addım kimi qiymətləndirilir.

Eləcə də 2025-ci ildə keçiriləcək "Qızıl Pəri"^[5] kino mükafatının nominantları arasında Zaur Qasımlı da var.