Qaralama:Xəqani Aslanov(Hərbçi)

Xəqani Aslanov 1955-ci il avqust ayının 18-də Ağdam rayonunun Şelli kəndində ziyalı ailəsində anadan olmuşdur. Orta təhsilini tamamladıqdan sonra Şelli kənd orta məktəbində hərbi hazırlıq müəllimi kimi fəaliyyət göstərmişdir. O, müharibənin başlanmasına qədər gənclərin hərbi biliklərə yiyələnməsində və vətənpərvərlik ruhunun formalaşmasında mühüm rol oynamışdır.

1991-ci ildə könüllü olaraq ön cəbhəyə yollanmış və Şirin Mirzəyevin rəhbərlik etdiyi 836 saylı hərbi hissənin tərkibində vuruşmuşdur. Füzuli və Ağdam istiqamətlərindəki döyüşlərdə iştirak edərək rota komandiri vəzifəsinə yüksəlmişdir.

1992-ci ilin fevralında baş vermiş Xocalı soyqırımı zamanı onlarla dinc sakini düşmən mühasirəsindən çıxararaq həyatlarını xilas etmişdir.

1992-ci il iyunun 16-da Ağdərə rayonunun Sırxavənd kəndi uğrunda gedən həlledici döyüşlərdə qəhrəmancasına vuruşmuşdur. Döyüşün ağır keçdiyi anlarda bir müddət itkin düşmüş hesab olunsa da, döyüş yoldaşlarının böyük fədakarlığı nəticəsində nəşi xilas edilərək döyüş meydanından çıxarılmışdır.

Xəqani Aslanovun dörd oğlu yadigar qalmışdır. Aslanovlar ailəsi Qarabağ müharibəsində vətənə üç şəhid vermişdir. Xəqaninin qardaşları — Hasil və Vidadi Aslanovlar da 1993-cü il iyulun 23-də Ağdamın işğalı günü eyni döyüşdə şəhid olmuşlar.

• Xəzər rayonunun Binə qəsəbəsində küçələrdən birinə onun adı verilmişdir.
• Doğulduğu Şelli kənd orta məktəbi hal-hazırda onun adını daşıyır.
• Binə qəsəbəsində onun xatirəsinə ucaldılmış abidə kompleksi yerləşir.