| Orxan Bahadırsoy | |
|---|---|
| Doğum tarixi | |
| Doğum yeri | Lerik rayonu, Hamarmeşə kəndi |
| Vətəndaşlığı | Azərbaycan |
| Fəaliyyəti | yazıçı, şair, dramaturq, publisist, aktyor, bloqer |
| Fəaliyyət illəri | 2010 - günümüz |
| Əsərlərinin dili | Azərbaycan türkcəsi |
Orxan Elsevər oğlu Bahadırsoy - Azərbaycanlı yazıçı, şair, dramaturq, publisist, aktyor və bloqer
Orxan Bahadırsoy 1993-cü ilin avqust ayının 4-də, Lerik rayonunun Hamarmeşə kəndində, ailəsinin ilk övladı kimi anadan olub.[1] İbtidai təhsilini bu kənddəki orta məktəbdə alıb. Daha sonra ailəsi ilə birlikdə Bakı şəhərinə köçərək, 92 saylı orta məktəbdə orta təhsilini başa vurub. 2011-ci ildə Azərbaycan Dövlət Neft Akademiyasının (indiki Azərbaycan Dövlət Neft və Sənaye Universitetinin) Biotibbi Texnologiyalar Mühəndisliyi ixtisasına qəbul olunub. Daha sonra buradakı təhsilindən öz istəyi ilə imtina edərək, 2012-ci ildə Azərbaycan Dövlət Mədəniyyət və İncəsənət Universitetinin Kino və Dram Teatrı Aktyorluğu ixtisasına qəbul olunub.[2] 2017-ci ildə Berlin İncəsənət Universitetinin professoru John von Düffeldən Teatr və Dramaturgiya üzrə ustad dərsi alıb.
2014-2016-cı illərdə Zaman-press qəzetində Mədəniyyət və İncəsənət şöbəsinin rəhbəri, 2016-2021-ci illərdə Sputnik Beynəlxalq İnformasiya Agentliyində Köşə Yazarı kimi çalışıb. [3]
2021-ci ildə ailə həyatı qurub və bir qız övladı var.
Orxan Bahadırsoy bədii yaradıcılığa 2007-ci ildə "Gülüş olmasa" adlı şeirlə başlayıb. Daha sonra ədəbiyyatın müxtəlif növlərində və müxtəlif janrlarda əsərlər yazıb. Şeirləri, hekayələri və məqalələri 2010-cu ildən etibarən yerli mətbuatda tirajlanmağa başlayıb.[4] Onun "Üşüdünsə bağışla", "Gedək asaq özümüzü", "Taksafon", "Qolların ömür yolum", "Sən bilmədin" və başqa çoxsaylı şeirləri, "Fahişə Mələklər" və "Günahdır səni sevmək" romanları, "Baldırğan otu", "Şəfəq Nebulası", "Saliva" kimi hekayələri, "Saçını satan aktrisa", "Kimsəsizlər sığınacağı", "Zaman maşını", "Terror", "Yalançı Akasiya" kimi pyesləri və yerli mətbuatda dərc olunan çoxsaylı publisistik yazıları qısa müddətdə geniş oxucu kütləsi qazanıb.
Şeirləri Tural Əhməd, Kamran Yunis, Ləman Mərrih, Sabirə Abdullayeva, Zemfira Əbdülsəmədova, Rövşən İsax, Kamran Ağabalayev və digər tanınmış aktyor və aktrisaların ifasında qiraət olunub.[1]
Filologiya üzrə elmlər doktoru İradə Musayeva özünün "Ədəbi Tənqid və Bədii Söz" kitabında Orxan Bahadırsoy yaradıcılığına geniş yer ayırıb və onu "Şeirimizdə yeni intonnasiya" adlandırıb.[5] Kitab 2017-ci ildən etibarən ali məktəblərin bakalavr və magistr pillələrində tədris olunur.[6]
Orxan Bahadırsoy 2017-ci ildə Almaniyanın Berlin, Potsdam və Frankfurt şəhərlərində keçirilən "Next Stage Europe 3" adlı dramaturgiya festivalına dünyanın müxtəlif ölkələrindən namizəd olan 400 müəllif arasından seçilmiş 12 dramaturqdan biri olub. O, özünün "Saçını satan aktrisa" pyesi ilə bu festivala qatılıb və festivalın laureatı seçilib. "Saçını satan aktrisa" pyesi rus, ingilis və alman dillərinə tərcümə olunaraq Dramaturgiya Antologiyasına daxil edilib və Potsdam Hans Otto Teatrında səhnələşdirilib. Beləliklə, Orxan Bahadırsoy bu festivala qatılan və laureat olan ilk azərbaycanlı dramaturq olub.[7]
2012-ci ildə "Fahişə mələklər", 2014-cü ildə "Günahdır səni sevmək", 2016-cı ildə "Şeir Adam", 2018-ci ildə "Kimsəsizlər Sığınacağı" adlı kitabları çap olunub. [8]
Əsərləri rus, ingilis, alman və fars dillərinə tərcümə olunub.[9]
Orxan Bahadırsoy 2010-cu ildən etibarən xalq teatrlarında müxtəlif tamaşalarda rol alıb. Eyni zamanda, Səda Teatrında Elçin Əfəndiyevin "Mənim sevimli dəlim" əsərində Ədəbi İşçi, Gənc Tamaşaçılar Teatrında Qeybulla Rəsulovun "Rəhmə gəl mələyim" əsərində Kazım, Azərbaycan Dövlət Mədəniyyət və İncəsənət Universitetində Stefan Sveyqin "Yad qadının məktubları" əsərində Kişi obrazlarını canlandırıb. 2015-ci ildə müstəqil ODA Teatrında müəllifi olduğu "Sirli Dahi" və "Suriyalı" pyeslərinə quruluş verib.[1]
2021-ci ildə Şuşa haqqında çəkilən "28 il" filmnin ssenari müəllifidir. Bu film Türkiyədə keçirilən və 120 ölkədən 3 123 filmin qatıldığı Diaspor Beynəlxalq Qısa Film Festivalının final mərhələsinə yüksəlib.[10] Orxan Bahadırsoy 2021-ci ildə çəkilən "Qəsrin Ulduzu" tok-şou tipli absurd komediya serialının ssenari müəllifi olub və əsas rollardan birini canlandırıb.[11]
O, bir sıra film və serillar haqqında təhlil-tənqid yazılarının, teatr tamaşaları haqqında resenziyaların müəllifidir.
Orxan Bahadırsoy həmçinin teatr, kino və musiqi tarixi haqqında genişmiqyaslı araşdırmalar təqdim edən Youtube kanalı yaradıb və buradakı bloqların aparıcısı olub. 2020-ci ildən etibarən bu kanalda yayımladığı araşdırmalarla geniş tamaşaçı rəğbəti toplayıb. Bu kontentin təməlini ataraq qısa müddətdə 10 milyondan çox izlənməyə və 100 mindən çox abunəçiyə sahib olub. Bununla da Youtube şirkətinin "Gümüş loqo" mükafatını qazanıb.[12]
Orxan Bahadırsoyun "Yağış yağdıran" şeirinə xalq artisti Tünzalə Ağayeva "Ehtiyacımsan" adlı mahnı bəstələyib və ifa edib.[13] Həmçinin, şeirlərinə bəstələnmiş mahnılar arasında Elnur Məmmədov (müğənni)un ifasında "Ad günün", Yaşar Cəlilovun ifasında "Üşüdünsə bağışla", Çinarə Məlikzadənin ifasında "Eybi yox", Mirələm Musazadənin ifasında "Getsəm" və "Dəhşət" mahnıları da yer alır.
Eyni zamanda öz şeirlərinə musiqilər bəstələyib və bu mahnıları öz ifasında yayımlayıb. "Sən bilmədin", "Yaz mənə", "Özün bilərsən" kimi mahnılarını misal göstərmək olar. [14] Orxan Bahadırsoy əməkdar artist, opera müğənnisi Səidə Şərifəliyevadan ifaçılıq üzrə ustad dərsi alıb.
- ↑ 1 2 3 "Orxan Bahadırsoy İctimai Televiziyanın efirində". Sənət (az.). itv. 7 iyun 2019. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Orxan Bahadırsoyun oxu.az portalına müsahibəsi". Müsahibə (az.). oxu.az. 12 noyabr 2018. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Bakı şəhər Mədəniyyət Baş İdarəsinin rəsmi saytı". Rəsmi (az.). az.baku-art.com. 3 may 2019. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Orxan Bahadırsoyun şeirləri kulis.az portalında". Ədəbiyyat (az.). kulis.az. 21 yanvar 2021. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "İradə Musayevanın "Ədəbi Tənqid və Bədii Söz" kitabı təqdim olundu". Ədəbi Tənqid (az.). Ədəbiyyat Qəzeti. 5 iyun 2017. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Xəzər Universiteti, Fənnlər və Dərsliklər" (PDF). Ədəbi Tənqid (az.). Xəzər Universiteti. 2024-2025 tədris ili. İstifadə tarixi: 10 oktyabr 2025.
- ↑ "Orxan Bahadırsoy Almaniya festivalında". Festival (az.). Ədalət Qəzeti. 19 may 2017. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Azərbaycan Milli Kitabxanasının yeni kitablar siyahısı" (PDF). Kitablar (az.). Milli Kitabxana, səhifə 265, sıra nömrəsi 1388. 2021. İstifadə tarixi: 10 oktyabr 2025.
- ↑ "Orxan Bahadırsoy Almaniya mətbuatında". Mətbuat (german). tagesspiegel.de. 8 iyul 2017. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ ""28" filmi Beynəlxalq festivalda". Kino (az.). modern.az. 23 avqust 2021. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Tok-şou tipli absurd komediya - Azərbaycanda bir ilk". Kino (az.). kulis.az. 6 sentyabr 2021. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ Orxan Bahadırsoyun rəsmi YouTube kanalı
- ↑ "Tünzalə Ağayevanın yeni mahnısı təqdim olundu". Musiqi (az.). olay.az. 12 noyabr 2021. 10 oktyabr 2025 tarixində arxivləşdirilib. İstifadə tarixi: 10 oktyabr 2025.
- ↑ "Sən bilmədin" mahnısı