Elşən Əli oğlu Əliyev (Elshan Ali oglu Aliyev, 24.01.1961, Ağdam rayonu, Seyidli kəndi) - jurnalist, redaktori. "Vətən səsi" qəzetinin baş redaktoru (2018). Azərbaycan Respublikasının Əməkdar jurnalisti (2020).[1]
Əmək fəaliyyətinə 1977-ci ildə Ağdam Şəhər Mədəniyyət Evində rəssam köməkçisi kimi başlayıb. 1978-ci ildə Azərbaycan Dövlət Universitetinin (indiki Bakı Dövlət Universiteti) Jurnalistika fakültəsinin qiyabi şöbəsinə daxil olub. 1978-80-ci illərdə Ağdam Rayon Mətbəəsində işləyib.
1980-1982-ci illərdə əvvəlcə Rusiya Federasiyasının Stavropol vilayətinin Zelençuk rayonunun Storojevaya yaşayış məntəqsində, sonra isə Arxangelsk vilayətinin Mirnıy şəhərində həqiqi hərbi xidmətdə olub.
1982-ci ildən Ağdam Rayon Mətbəəsində əmək fəaliyyətini davam etdirib.
1987-ci ildə ali təhsilini başa çatdırıb və həmin il avqust ayının 18-də Ağdamda «Lenin yolu» rayon qəzetində məsul katib vəzifəsinə təyin edilib.
1990-cı ildə Bakı Ali Partiya Məktəbinin əyani şöbəsinə müdavim qəbul edilməsi ilə əlaqədar Bakı şəhərinə köçüb. 1991-2002-ci illərdə «Kommunist» ( «Xalq qəzeti»), «Azərbaycan», «Respublika», «Maarifçi», «Panorama», «Bizim əsr» qəzetlərində müxbir, məsul katib, redaktor vəzifələrində işləyib. 2003-2018-ci illərdə «Azərbaycan işıqları» ("Azərenerji" ASC-nin mətu orqanı) qəzetinin baş redaktoru, əlavə olaraq, "Azərbaycanın vergi xəbərləri" jurnalının (Azərbaycan Respublikası Vergilər Nazirliyi) məsul katibi olub.
2018-ci ilin avqust ayından “Vətən səsi” qəzetinin baş redaktorudur.
İki kitab müəllifidir. 30-dək kitabın redaktoru olub.
Azərbaycan Respublikası Prezidentinin 22 iyul 2020-ci il tarixli Sərəncamı ilə Azərbaycan Respublikasında kütləvi informasiya vasitələrinin inkişafında xidmətlərinə görə “Əməkdar Jurnalist” fəxri adına layiq görülüb.[2]
Azərbaycan Mətbuat Şurası Nəzarət-təftiş komissiyasının üzvüdür.[3]
- ↑ "Vətən Səsi | Onlayn qəzet". vetensesi.az. İstifadə tarixi: 2025-03-04.
- ↑ "Azərbaycan Respublikasının kütləvi informasiya vasitələrinin əməkdaşlarına fəxri adların verilməsi haqqında Azərbaycan Respublikası Prezidentinin Sərəncamı". azertag.az (az.). İstifadə tarixi: 2025-03-04.
- ↑ "NTK". https://presscouncil.az (az.). İstifadə tarixi: 2025-03-04.