Əliağa Güləli oğlu Əmirov (10 avqust 1922, Corat, Bakı qəzası – 31 mart 1984, Corat, Sumqayıt) — Azərbaycanlı SSRİ polkovniki, Böyük Vətən Müharibəsi veteranı.
Əliağa Əmirov 1922-ci ilin 10 avqustunda Bakı qəzasının Corat kəndində anadan olmuşdur. Gənclik illərində tələbə olan Əmirov II Dünya Müharibəsi başladıqda könüllü olaraq cəbhəyə yollanmışdır. Orconikidze adına hərbi piyadalar məktəbində altı aylıq təhsil almış, xüsusi fərqlənməsi nəticəsində leytenant rütbəsi qazanmışdır. Daha sonra 416-cı atıcı diviziyanın 1368-ci polkunda gənc əsgərlərin hazırlığı ilə məşğul olmuşdur.
| Əliağa Əmirov | |
|---|---|
| Şəxsi məlumatlar | |
| Doğum tarixi | |
| Doğum yeri | Corat kəndi, Bakı qəzası |
| Vəfat tarixi | |
| Vəfat yeri | Corat qəsəbəsi, Sumqayıt |
| Vəfat səbəbi | Ürək tutması |
| Dəfn yeri | Corat qəbiristanlığı |
| Vətəndaşlığı | SSRİ |
| Milliyyəti | Azərbaycanlı |
| Həyat yoldaşı | Əmirova Səlimə Əsgər qızı |
| Atası | Əmirov Güləli |
| Hərbi fəaliyyəti | |
| Mənsubiyyəti | Azərbaycanlı |
| Qoşun növü | 416-cı atıcı diviziya |
| Xidmət illəri | 1939-1945 |
| Rütbəsi | Polkovnik |
| Döyüşlər | Qafqaz döyüşü, Berlin əməliyyatı |
| Təltifləri | "Qırmızı ulduz" ordeni, "İgidliyə görə", "Hərbi xidmətlərə görə", "Almaniya üzərində qələbəyə görə" medalları, “Böyük Vətən Müharibəsində şücaətli əməyə görə” xidmət medalı |
Əliağa Əmirov II Dünya Müharibəsi zamanı 416-cı atıcı diviziyanın tərkibində iştirak etmiş, Mozdokdan Böyük Qafqaz dağlarına qədər olan 15 döyüş əməliyyatında fərqlənmişdir. O, Qafqaz döyüşləri, həmçinin Don əməliyyatında və həlledici Berlin döyüşündə xidmət göstərmişdir. Berlin döyüşündə piyada əleyhinə mina partlaması nəticəsində bir ayağını itirmiş və əlil olmuşdur.
Əliağa Əmirov müharibədə göstərdiyi şücaətə görə aşağıdakı orden və medallarla təltif olunmuşdur:
- “Qırmızı Ulduz” ordeni
- “İgidliyə görə” medalı
- “Hərbi xidmətlərə görə” medalı
- “Almaniya üzərində qələbəyə görə” medalı
Müharibədən sonra Əliağa Əmirov doğulduğu Corat qəsəbəsində yaşamışdır. Sovet hakimiyyəti dövründə Coratda fəaliyyət göstərən “Oktyabr” kolxozu 1949-cu ildə ləğv edilərək ərazisi Saray qəsəbəsindəki Voroşilov adına kolxoza birləşdirilmişdir. Ə. Əmirov həmin kolxoza mühasib vəzifəsində təyin edilmiş və uzun müddət burada çalışmışdır.
Əliağa Əmirov 1984-cü il, 31 mart tarixində 61 yaşında Corat qəsəbəsində ürək tutmasından vəfat etmiş və burada dəfn olunmuşdur.
- Xanım Əlabbas qızı. Corat — Tarixin bir parçası (tarixi ədəbiyyat) "Səda" nəşriyyatı, 2009. (259 s. səh 95–96, səh 102)