Qara gözlü uşaqlar

Bu varlıqlarla qarşılaşdığını iddia edən insanlar bildirirlər ki, onların zahiri görünüşü adi uşaqlardan və ya yeniyetmələrdən demək olar ki, fərqlənmir.^{[mənbə göstərilməyib, 2357 gündür]}Yaşları təxminən 6 ilə 16 arasında dəyişə bilər.^[1] Lakin bəzi hallarda şahidlər onların bir qədər daha yaşlı göründüklərini də qeyd etmişlər.^[2] Bu uşaqların dərisi adi insanlara nisbətən daha solğun olur. Onlar tez-tez insanlarla tamamilə uşaq olmayan səslə — soyuq, inamlı və monoton bir tonda danışırlar. Bu danışıq tərzi insanlarda tədricən artan narahatlıq və güclü qorxu hissi yaradır. Şahidlərin sözlərinə görə, ən böyük dəhşəti onların tam qara, dərin və boşluğa bənzər gözlərinə baxdıqları anda hiss ediblər. İddia olunur ki, həmin gözlərdə nə bəbək, nə də rəngli qişa var idi – yalnız qapqara göz alması görünürdü.^[3]

Bu əfsanənin nə vaxt yayılmağa başladığı ilə bağlı yekdil fikir yoxdur. Müxtəlif mənbələrə görə, onun mənşəyi XX əsrin 1980-ci və ya 1990-cı illərinə gedib çıxır.^[4][5][6][7]

Qara gözlü uşaqla ilk qarşılaşma hadisəsi guya 1982-ci ilə aiddir. Bildirilir ki, bir yeniyetmə qız dostları ilə birlikdə Cannock Chase meşəsinin yaxınlığında vaxt keçirirmiş. Alatornalıq vaxtı qız uşaq səsi kimi eşidilən yüksək qışqırıqlar eşidir və səsin dalınca qaçaraq torpaq yola çatır. Orada uzaqlaşan bir siluet görür. Yaxınlaşdıqca bunun təxminən 6 yaşlarında bir qız uşağı olduğunu anlayır. Qız geriyə dönüb şahidə tamamilə qara gözləri ilə baxanda, şahid çox güclü bir dəhşət hissi keçirir. Qız dərhal arxasını çevirib meşəyə doğru qaçır. Polis bu qəribə hadisə ilə bağlı araşdırma aparsa da, heç bir nəticə əldə olunmur.^[4]

İnsanla qara gözlü uşaqlar arasında ən məşhur qarşılaşmalardan biri 1996-cı ildə Texas ştatında yaşayan jurnalist Brayan Bethelin yaşadığı hadisə hesab olunur. Onun sözlərinə görə, həmin gecə kinoteatrın qarşısında maşınını saxlamışdı və fikrini yayındırdığı anda pəncərəyə kimsə döyür. Bethel pəncərədən baxanda orada 12–13 yaşlarında iki uşaq görür. Onlardan yalnız biri danışır, digəri isə susur. Uşaqların dediyinə görə, kino biletləri almağı unudublar və evlərinə qayıdıb pullarını götürmək üçün Brayanın onları maşınla aparmasını istəyirlər. Lakin Bethel ani olaraq anlayır ki, onların getmək istədikləri film artıq çoxdan başlayıb və demək olar ki, bitmək üzrədir. Bu ziddiyyət onu şübhələndirir. Sonra uşaqların gözlərinə baxır və qorxu içində onların gözlərinin tamamilə qara olduğunu görür. Dərhal maşını işə salıb uzaqlaşır. Bir qədər getdikdən sonra dayanır və arxaya baxır — uşaqlar artıq yox olmuşdular. Həmin ildən etibarən Bethelə ABŞ-ın müxtəlif şəhərlərindən oxşar hadisələrlə bağlı çoxsaylı məktublar gəlməyə başlayır. O, bu cür hekayələrin siyahısını nəşr etdirir.^[8]

Bəzi hallarda isə qəribə uşaqlar yalnız maşına deyil, evə daxil olmağa da çalışıblar. Bəzi şahidlər onlara inanaraq onları evə buraxdıqlarını bildiriblər. Onlar müxtəlif bəhanələrlə — zəng etmək, su içmək və ya ayaqyoluna getmək istəyi ilə evə daxil olmağa çalışıblar. Bəziləri isə bu qərarlarının səhv olduğunu anlayaraq ya evdən qaçıblar, ya da otaqlardan birində gizləniblər. Bir müddət sonra vəziyyəti dərk edib geri döndüklərində, artıq həmin qəribə uşaqlar evdə olmurmuş. Müxtəlif bölgələrdə və təsadüfi şəraitdə yaşanmış buna bənzər çoxsaylı hekayələr şahidlər tərəfindən danışılmışdır.^[3][8]

• 2012-ci ildə Brayan Bethelin iştirakı ilə "Amerikada canavarlar və sirlər" (ing. “Monsters and Mysteries in America”) adlı televiziya şousu yayımlandı. Bu proqramda qara gözlü uşaqların real mövcudluğuna xüsusi diqqət yetirilmişdi.^[9]
• Elə həmin il "Sunshine qızın qara gözlü uşaqları axtarışı"(ing. “Sunshine Girl and the Hunt for Black Eyed Kids”) adlı qorxu filmi təqdim olundu. Film Kickstarter platformasının maliyyə dəstəyi ilə çəkilmişdi.^[10]
• 2014-cü ildə isə “Daily Star” tabloid qəzetində qəribə gözlü uşaqlarla bağlı bir neçə hadisə haqqında məqalələr dərc olunmuşdur.

Qəribə uşaqlarla qarşılaşanların hamısı dərin panika və qorxu hissi keçirdiklərini bildiriblər. Onlardan yalnız bəziləri ani reaksiya, möcüzə və iradə gücü sayəsində bu qeyri-adi varlıqlardan qaça bilmişlər. Bu varlıqların mövcudluğuna inananlar onları paralel dünyadan gəlmiş varlıqlar, kosmik mənşəli yadplanetlilər, demonlar, nefilimlər,^[3] ruhlar^[11] və ya kriptidlər^{[mənbə göstərilməyib, 2719 gündür]} (elm tərəfindən tanınmayan canlılar) kimi təsvir edirlər – guya onlar uşaq görünüşündə gizlənirlər.

Şahidlərin dediyinə görə, bu varlıqlarla qarşılaşma zamanı baş verən qandonduran qorxu hissi bəzən onlara baxmazdan əvvəl də yaranır və hətta görüşdən sonra da müəyyən müddət davam edir. Əfsanəyə görə, bu uşaqlar insanları hipnoz vəziyyətinə salır, beləliklə insanlar onları evlərinə və ya avtomobillərinə özləri dəvət edirlər. Lakin bu varlıqlar icazəsiz heç vaxt içəri daxil olmurlar. Əksər görüşlər gecə vaxtı, həmçinin uşaqların heç gözlənilmədiyi yerlərdə baş verir. Hər necə olsa da, bu hadisələr hələlik şəhər əfsanəsi kimi qiymətləndirilir.^[11]

Rasional (elmi və məntiqi) izahlara gəldikdə isə aşağıdakı ehtimallar irəli sürülür:

• Şahidlərin sadəcə mistifikasiya və ya uydurma halları;
• Onlara qarşı zarafat və ya qorxutma məqsədli oyunlar, məsələn, tamamilə qara kontakt linzalar taxmış şəxslər (belə linzalardan adətən karnavallarda istifadə olunur);
• Eləcə də bəzi göz xəstəlikləri, məsələn, gözün rəngli qişasının (raduzkanın) olmaması, nəticədə gözlərin demək olar ki, tamamilə qara görünməsi.