Qanlı illər

"Qanlı illər" və ya "Qanlı sənələr" (tam adı: "Qanlı sənələr. 1323-cü səneyi-hicridə [1905-ci səneyi-miladidə] Qafqazda sərzədeyi-zühur olan erməni-müsəlman davasının tarixi" (az.-əski. قانلو سنه لر. ۱۳۲۳ نجی سنه هجرینده (۱۹۰۵ سنه میلادیده) قافقازده سرزدهٔ ظهور اولان ارمنی مسلمان دعواسندن تاریخی‎) — Məmməd Səid Ordubadinin 1905–1906-cı illərdə baş vermiş Azərbaycan–erməni qırğınları barədə sənədli-tarixi əsəri.

Qanlı illər
az.-əski. قانلو سنه لر‎
Müəllif	Məmməd Səid Ordubadi
Orijinalın dili	Azərbaycan dili
Orijinalın nəşr ili	1911
Nəşriyyat	Səda mətbəəsi

XX əsr Azərbaycan nəsrinin yaradıcılarından biri, böyük yazıçımız Məmməd Səid Ordubadi qələminin məhsulu olan, uzun illərin siyasi təbəddülatlarından keçmiş bu əsər tarixi həqiqətlərin üzə çıxarılmasına kömək edən dəyərli bir nümunədir. Yazıçının 1908-ci ildə "Qanlı sənələr" adı ilə yazıb başa çatdırdığı kitab ilk dəfə onun "Tazə həyat" qəzeti vasitəsilə millətin sərvət sahiblərinə müraciətindən sonra Bakı milyonçu-xeyriyyəçisi Murtuza Muxtarovun maddi yardımı ilə 1911-ci ildə nəşr olunmuşdur.^[1] XX əsrin əvvəllərində baş vermiş erməni-müsəlman davasının müxtəlif bölgələrdən gələn müxbir məktubları əsasında təsviri münaqişənin məzmunu və gedişi haqqında oxucuda tam təsəvvür yaradır.^[2] Həmin hadisələrin eyni ssenari üzrə yetmiş ildən sonra təkrarən baş verməsi sadəlövhcəsinə keçmişi unutduğumuzu göstərir. Bu səbəbdən də əsərin yenidən nəşri xalqımızın yaddaşını oyatmağa, baş verənlərdən ibrət dərsi almasına xidmət edir. ^[3]