Qırx kimsənə məscidi — Naxçıvan ərazisində orta əsrlər zamanı yaradılmış türk-islam mədəniyyəti nümunələrindən biri də XIV əsrə aid "Qırx kimsənə" məscididir. Оrdubad rayonunun Nüsnüs kəndində yerləşən və yerli əhali arasında "Qırx kimsənə" adlanan bu məscid həm də ziyarətgahdır. Məscidin binasının ortasında birinci mərtəbədən başlayaraq qalxan, daşdan hündürlüyü təxminən beş metr olan bir sütun vardır. Məscidin birinci mərtəbəsində yerləşən ziyarətgahın giriş qapısı üzərində ərəb dilində doqquz sətirdə həkk edilmiş kitabənin mətnindən aydın olur ki, bu məscid Səid Bahadır xanın səltənəti dövründə (1316–1335-ci illər) Atabəyin candarı Sədr bin Sarim bin Səncər bin Aytəkin tərəfindən inşa edilmişdir. Kitabə hicri təqvimi ilə çərşənbə axşamı, 4 ramazan 726-cı ildə (4.08.1326) yazılmışdır. Kitabədə verilən məlumatdan aydın olur ki, Naxçıvan ərazisi Hülakilər dövlətinin son dövrlərində də həmin dövlətin tərkibində olmuşdur. Məscid 1993-cü ildə bərpa edilmişdir.
