İngiltərə (ing. England [ˈɪŋɡlənd]) — Böyük Britaniya və Şimali İrlandiya Birləşmiş Krallığının ən böyük tarixi və inzibati vahididir. O, Böyük Britaniya adasının cənub və mərkəzi hissəsini əhatə edir. İngiltərə əhalisi Birləşmiş Krallığın ümumi əhalisinin təxminən 83%-ni təşkil edir. Paytaxtı Londondur.
İngiltərə 927-ci ildə müxtəlif döyüşən qraflıqların birləşməsi nəticəsində vahid krallığa çevrilmişdir. Adını eramızın V–VI əsrlərində bu ərazilərə köçmüş german tayfalarından biri olan angllardan almışdır.
İngiltərə ingilis dilinin və İngiltərə kilsəsinin yaranma məkanıdır. Burada formalaşmış ingilis hüququ sonradan bir çox ölkələrin hüquq sistemlərinə təsir göstərmişdir. London uzun müddət Britaniya imperiyasının paytaxtı olmuş və ölkə Sənaye inqilabının başladığı yer kimi tarixə düşmüşdür. İngiltərə dünyanın ilk sənayeləşmiş ölkəsi olmaqla yanaşı, konstitusiya və parlament demokratiyası sahəsindəki yenilikləri ilə də tanınır.
İngiltərə krallığı 1707-ci il 1 may tarixinədək, Uels knyazlığı da daxil olmaqla, müstəqil dövlət olmuşdur. Həmin tarixdə Şotlandiya ilə birləşərək Böyük Britaniya Krallığını yaratmışdır.